Nkulunkulu Ukhulula Bantfwana Baka-Israyeli

BESEKWENDLULE iminyaka leminyenti ema-Israyeli ahlala eGibhithe, aphumelela futsi andza kakhulu. Kwasekubusa lomunye Faro, lobekangamati Josefa. Lombusi locindzetelako wesaba ngoba ema-Israyeli abesamanyenti kakhulu, ngako-ke wawenta tigcili. Wakhipha umtsetfo wekutsi tonkhe tinswane letibafana tibulawe ngekumitiswa eMfuleni iNayili. Umfati lotsite lobekanesibindzi wavikela luswane lwakhe lolungumfana ngekulufaka ebhasikidini, wase ulufihla emhlangeni. Indvodzakati yaFaro yalutfola loluswane, yalubita ngekutsi nguMosi futsi yalukhulisela ebukhosini baseGibhithe.

Kwatsi ngesikhatsi Mosi aneminyaka lengu-40, wangena enkingeni lapho avikela sigcili lesingumIsrayeli endvuneni yemsebenti lengumGibhithe. Wabalekela kulelinye live, lapho aphila khona njengesihambi. Lapho aneminyaka lengu-80 budzala, Jehova wamtfuma kutsi ayokhipha ema-Israyeli ebugcilini. Wamtjela kutsi aye eGibhithe kuFaro ayomtjela kutsi akhulule bantfu baKhe.

Faro wala waphetsa kubakhulula. Ngako-ke Nkulunkulu washaya baseGibhithe ngetinhlupho letilishumi. Sikhatsi ngasinye lapho Mosi atjela Faro kutsi akhulule bantfu baNkulunkulu, kute abalelekele letinhlupho, Faro akalalelanga. Ekugcineni inhlupho yelishumi yabulala onkhe ematibulo aseGibhithe, ngephandle kwematibulo emindeni yema-Israyeli leyalalela Jehova ngekutsi inindze tinsika teminyango ngengati yelizinyane lelalentiwe umhlatjelo. Ingilosi yaNkulunkulu lebeyibulala ematibulo aseGibhithe yatendlula leto tindlu. Ngemuva kwaloko ema-Israyeli abekhumbula lokukhululwa kwawo ngekugubha umkhosi waminyaka yonkhe, lobitwa ngekutsi liPhasika.

Ngemuva kwekufelwa litibulo lakhe, Faro watjela Mosi nawo onkhe ema-Israyeli kutsi bahambe. Balungiselela luhambo lwabo ngekushesha. Kwatsi lapho ema-Israyeli asengakahambi nelibanga lelidze, Faro washintja umcondvo. Wabalandzela nemasotja lamanyenti kanye netinkalishi. Ema-Israyeli avimbeteleka ngaseLwandle loLubovu. Bekubonakala kungatsi emaGibhithe atawubavimbetela. Jehova wawasindzisa ngekutsi ehlukanise emanti elwandle loLubovu, entela kutsi ema-Israyeli ahambe emhlabatsini lowomile. Lapho baseGibhithe babalandzela, Nkulunkulu wabuyisa emanti, ngako-ke Faro nelibutfo lakhe bamita.

Ngemuva kwaloko, ema-Israyeli ahlala ngaseNtsabeni iSinayi lapho Nkulunkulu enta sivumelwane nawo. Asebentisa Mosi njengemkhulumeli wakhe, Nkulunkulu waniketa ema-Israyeli imitsetfo lebeyitawuwacondzisa futsi iwavikele ekuphileni kwawo. Kuphela nje nangabe ema-Israyeli abetawuyemukela lemitsetfo, Jehova abetawuba nawo futsi awabusise ngetulu kwato tonkhe letinye tive.

Ngetulu kwako konkhe loko Jehova labewentele kona, ema-Israyeli amtfukutselisa ngekubabete lukholo kuye. Ngako-ke Jehova wawabangela kutsi azulazule ehlane iminyaka lengu-40. Ngembi kwekufa kwakhe, Mosi wayala Joshuwa indvodza leyayilungile kutsi ibe ngumholi walesive. Ekugcineni ema-Israyeli akulungela kungena eveni Nkulunkulu abeletsembise Abrahama.

​—Lendzaba itsetfwe encwadzini ya-Exodusi; Levithikhusi; Numeri; Dutheronomi; Tihlabelelo 136:10-15; Imisebenti YebaPhostoli 7:17-36.