Tingoma Letiphefumulelwe, Tiyadvudvuta Futsi Tiyafundzisa

INCWADZI lendze kunato tonkhe eBhayibhelini iyinhlanganisela yetingoma letingcwele. Seyiyonkhe yatsatsa iminyaka lengaba ngu 1 000 kubhalwa. Lencwadzi yeTihlabelelo inemavi lamahle kakhulu nalabonisa lukholo kunawo onkhe lake abhalwa. Achaza tindlela letehlukahlukene babhali labativa ngato, njengekujabula, kudvumisa kanye nekubonga, kuva buhlungu kanye nekuphendvuka. Kuyacaca kutsi labahlabeleli bebanebuhlobo lobuhle naNkulunkulu. Ase ucabangele letinye tetihloko taletingoma.

Jehova unguMbusi lolungile, lofanelwe kukhulekelwa nekudvunyiswa. KuTihlabelelo 83:18 siyafundza: “Nguwe wedvwa lolibito lakhe [“linguJehova,” NW], nguwe Losetikwako Konkhe, lophakeme abuse umhlaba wonkhe.” Tihlabelelo letinyenti tidvumisa Jehova ngemisebenti yakhe yekudala, njengemazulu lagcwele tinkhanyeti, buhle betintfo latidalile emhlabeni, kanye nemtimba wemuntfu lodalwe ngalokumangalisako. (Tihlabelelo 8, 19, 139, 148) Letinye tato tikhatimulisa Jehova njengaNkulunkulu losindzisa futsi avikele labo labatsembekile kuye. (Tihlabelelo 18, 97, 138) Letinye titsi unguNkulunkulu lonekulunga, lokhulula labacindzetelekile futsi ajezise lababi.​—Tihlabelelo 11, 68, 146.

Jehova usita aphindze advudvute bonkhe labamtsandzako. Sihlabelelo 23 satiwa kakhulu kuto tonkhe letikhona, lapho Davide achaza Jehova njengeMelusi lonelutsandvo, locondzisa, avikele, futsi anakekele timvu takhe. Tihlabelelo 65:2 tikhumbuta tikhonti taNkulunkulu kutsi Jehova ‘uyayiva imithandazo.’ Labanyenti labake benta tono letinkhulu batfole indvudvuto encwadzini yeTihlabelelo 39 na-51, lapho Davide achaza ngalokusuka enhlitiyweni kuphendvuka kwakhe etonweni letinkhulu lake watenta, futsi aba nelukholo ekutsetselelweni nguJehova. Tihlabelelo 55:22 tisikhutsata kutsi setsembele kuJehova futsi silahlele yonkhe imitfwalo yetfu kuYe.

NgeMbuso waMesiya, Jehova utawugucula lomhlaba. Emavesi lamanyenti alencwadzi yeTihlabelelo akhuluma ngaMesiya, iNkhosi lokwakhulunywa ngayo. Tihlabelelo 2 tiphrofetha ngekutsi loMbusi utawubhubhisa tive letimbi, letimelene naye. Tihlabelelo 72 tiveta kutsi leNkhosi itawucedza indlala, kungalungi, kanye nekucindzeteleka, bese kutsi Tihlabelelo 46:⁠9 tona titsi Nkulunkulu utawucedza timphi aphindze abhubhise tonkhe tikhali temphi. KuTihlabelelo 37, sifundza kutsi bantfu lababi batawubhujiswa, kantsi labalungile batawuhlala emhlabeni phakadze, bajabulele kuthula nebunye emhlabeni wonkhe.

​—Lendzaba itsetfwe encwadzini yeTihlabelelo.