SEHLUKO 7
Uke Utive Yini Unesitunge Futsi Wesaba?
Asewubuke lomfana lomncane lokulesitfombe. Uyambona yini kutsi ubonakala anesitunge futsi esaba? Kuke kwenteka yini nawe wativa ngalendlela?— Sonkhe sike sitive ngalendlela ngaletinye tikhatsi. LiBhayibheli lisitjela ngebangani baJehova nabo labake bativa banesitunge futsi besaba. Lomunye wabo bekungu-Elija. Ase sifundze ngaye.
Jezebeli bekafuna kubulala Elija
Elija bekahlala ka-Israyeli kadzeni, Jesu asengakatalwa. Ahabi, labeyinkhosi yaka-Israyeli bekangamkhonti Jehova, Nkulunkulu weliciniso. Yena nemfati wakhe Jezebeli bebakhonta Bhali, longunkulunkulu wemanga. Ngesizatfu saloko, bantfu labanyenti baka-Israyeli nabo bacala kukhonta Bhali. Indlovukazi Jezebeli beyinenhlitiyo lembi futsi ifuna kubabulala bonkhe bantfu lebebakhonta Jehova, lokufaka ekhatsi na-Elija. Yini Elija layenta?—
Elija wabaleka! Wabalekela endzaweni lekhashane leyomile futsi lengenamanti, wefika wabhaca emhumeni. Ucabanga kutsi wakwentelani loko?— Vele bekesaba. Kodvwa besingekho sidzingo sekutsi Elija esabe. Kungani kunjalo? Kungenca yekutsi bekati kutsi Jehova abengamsita. Jehova bekambonisile Elija emandla akhe ngaphambili. Ngalesinye sikhatsi, Jehova waphendvula umthantazo wa-Elija ngekutsi atfumele umlilo lovela ezulwini. Ngako-ke, Jehova bekangakhona kumsita Elija nangaleso sikhatsi.
Jehova wamsita njani Elija?
Ngesikhatsi Elija asemhumeni, Jehova wakhuluma naye futsi wambuta watsi: ‘Wentani lapha?’ Elija wamphendvula watsi: ‘Ngimi kuphela lokukhontako. Sengisele ngedvwa, futsi ngesaba nekutsi batangibulala.’ Elija bekacabanga kutsi bonkhe bantfu labakhonta Jehova besebabulewe. Kodvwa Jehova watsi kuye: ‘Cha, akusinjalo. Kunalabanye bantfu labangu-7 000 labasangikhonta. Bani nesibindzi. Munyenti umsebenti lokusafanele uwente!’ Ucabanga kutsi Elija wajabula yini nakeva loku?—
Yini longayifundza kuloko lokwenteka ku-Elija?— Kute sidzingo sekutsi utive unesitunge nome wesaba. Bakhona bangani labatsandza Jehova futsi labakutsandzako nawe. Ngakulokunye, Jehova unemandla lamakhulu, ngako utawuhlale akusita. Kuyakujabulisa yini kwati kutsi ngeke sekwenteke ube wedvwa?—