Jehova Wacinisa Elija

Jezebeli weva ngaloko lebekwenteke kubaphrofethi baBhali futsi watfukutsela kakhulu. Watfumela umlayeto ku-Elija lotsi: ‘Kusasa wena utawufa njengalabaphrofethi baBhali lobabulele.’ Elija wesaba kakhulu, wase uyabaleka uya ehlane. Wathantaza watsi: ‘Jehova sekwenele, ngicela nyalo usale utsatsa kuphila kwami.’ Elija lobekadziniwe walala ngephansi kwesihlahla.

Kwefika ingilosi yamvusa yatsi: “Vuka udle.” Elija wabona sinkhwa lesiyindingilizi sibekwe ematjeni lashisako, eceleni kwawo kunelijeke lelinemanti. Wavuka wadla, wanatsa waphindze walala. Lengilosi yaphindze yamvusa, yatsi: ‘Dlani ngobe usetawutsatsa luhambo loludze kakhulu.’ Elija waphindze wavuka wadla. Wahamba emalanga langu-40 nebusuku lobungu-40, waze wefika eNtsabeni iHorebe. Nakafika wangena emgedzeni walala. Jehova wakhuluma naye watsi: “Wentani lapha ye-Elija?” Elija waphendvula watsi: “Bantfu baka-Israyeli basishiyile sivumelwane sakho, ema-al’thare akho bawadzilitile futsi babulele baphrofethi bakho ngenkemba, ngimi kuphela losasele. Nyalo sebafuna kubulala nami.”

Jehova watsi kuye: ‘Phuma, uyokuma entsabeni.’ Kwacala kwahhusha umoya lomkhulu ngakulomhume. Ngemva kwaloko kwatamatama umhlaba futsi kwaba nemlilo. Ekugcineni Elija weva livi lelipholile likhulumela phansi. Wambonya buso bakhe ngengubo yakhe wema ngaphandle kwalomgedze. Jehova wambuta kutsi ubalekeleni. Elija watsi: ‘Ngimi kuphela losasele.’ Jehova watsi kuye: ‘Awukasali wedvwa. Ngisenebantfu l labangu-7 000 ka-Israyeli labangikhontako. Ngako hamba ugcobe Elisha kutsi abe ngumphrofethi esikhundleni sakho.’ Ngekushesha, Elija wahamba wenta loko Jehova latsi akakwente. Ucabanga kutsi Jehova angakusita yini nawenta loko lakufunako? Yebo, angakusita. Asesibone loko lokwenteka ngesikhatsi sesomiso.