SEHLUKO 12
Yini Longayenta Kute Ube Ngumngani Wankulunkulu?
1, 2. Bekubobani labanye bebangani baJehova?
NGUBANI lofisa abe ngumngani wakho? Ngumuntfu lomtsandzako, lovana naye nalonebuntfu lobuhle lobutsandzako.
2 Jehova ukhetsa labanye bantfu kutsi babe bangani bakhe. Abrahama bekangulomunye webangani baNkulunkulu. (Isaya 41:8; Jakobe 2:23) Jehova bekamtsandza naDavide, waze watsi ‘abengumuntfu lowemukelwe yinhlitiyo yakhe.’ (Imisebenti 13:22) Umphrofethi Danyela ‘bekatsandzeka’ kakhulu kuJehova.—Danyela 9:23.
3. Kungani bo-Abrahama, Davide, kanye naDanyela baba bangani baJehova?
3 Kwenteka njani kutsi bo-Abrahama, Davide, kanye naDanyela babe bangani baNkulunkulu? Jehova watsi ku-Abrahama: “Ngobe ulalele livi lami.” (Genesisi 22:18) Jehova uba ngumngani webantfu labamtfobelako. Ngisho nebantfu bonkhe bangaba bangani baNkulunkulu. Jehova wachazela sive sema-Israyeli watsi: “Ngilaleleni, mine-ke ngiyawuba nguNkulunkulu wenu, nine nibe sive sami.” (Jeremiya 7:23) Ngako-ke nawe kufanele umlalele Jehova nawufuna kuba ngumngani wakhe.
JEHOVA UYABAVIKELA BANGANI BAKHE
4, 5. Jehova ubavikela njani bangani bakhe?
4 LiBhayibheli litsi Jehova ufuna tindlela ‘tekucinisa labo labatinhlitiyo tabo titinikele kuye ngalokuphelele.’ (2 Tikhronike 16:9) KuTihlabelelo 32:8, naku Jehova lakwetsembisa bangani bakhe: “Mine ngiyawukufundzisa ngikukhombise indlela lofanele kuhamba ngayo, ngikweluleke, liso lami lingesuki kuwe.”
5 Kunesitsa lesinemandla lesingafuni sibe bangani baNkulunkulu. Kodvwa Jehova utimisele kusivikela. (Fundza Tihlabelelo 55:22.) Njengobe sibangani baJehova simkhonta ngenhlitiyo yetfu yonkhe. Sichubeka setsembekile kuye ngisho nobe sihlangabetana nebumatima. Siyametsemba Jehova kutsi utasisita njengobe asita umhlabeleli, lowabese usho naku ngaJehova: “Yena ungasesandleni sami sangesekudla, ngiyawuhlala kuye ngitinte.” (Tihlabelelo 16:8; 63:8) Yini Sathane layentako kute asiyekelise kuba bangani baNkulunkulu?
EMANGA ASATHANE
6. Ngumaphi emanga Sathane lawasho ngebantfu?
6 ESehlukweni 11 sifundzile kutsi Sathane wacala emanga ngaJehova. Watsi ungumcambimanga futsi akacabangelani ngekutsi angabavumeli bo-Adamu na-Eva kutsi batikhetsele bona lokulungile nalokungakalungi. EmBhalweni waJobe sifundza kutsi Sathane wakhuluma emanga ngebantfu labafuna kuba bangani baNkulunkulu. Sathane utsi bakhonta Nkulunkulu ngobe kukhona langabentela kona hhayi ngobe bamtsandza. Sathane utsi angenta nome ngubani ahlubuke kuNkulunkulu. Ase sibone kutsi yini lesingayifundza kuJobe nekutsi Jehova wamvikela njani.
7, 8. (a) Jehova bekativa njani ngaJobe? (b) Yini Sathane layisho ngaJobe?
7 Abengubani Jobe? Abeyindvodza lelungile leyaphila eminyakeni lengu-3 600 leyendlulile. Jehova watsi kute labefana naye emhlabeni ngaleso sikhatsi. Abemhlonipha kakhulu Nkulunkulu futsi akutondza lokubi. (Jobe 1:8) Jobe abengumngani waJehova sibili.
8 Sathane watsi Jobe ukhonta Nkulunkulu ngenca yetizatfu tebugovu. Sathane wase utsi kuJehova: “Awukambiyeli ngelutsango yini Jobe kanye nemndeni wakhe nako konkhe lanako? Uwubusisile umsebenti wakhe wetandla, waze wamupha ngisho nemihlambi yetifuyo lesetigcwele kulo lonkhe lelive. Kodvwa ase welulele sandla sakho kuko konkhe lanako, ubone kutsi angeke yini akwetfuke.”—Jobe 1:10, 11.
9. Yini Jehova lavumela Sathane kutsi ayente?
9 Sathane watsi Jobe ukhonta Jehova ngobe bekamentela tintfo letinhle. Waphindze watsi angamyekelisa kukhonta Jehova. Jehova akazange avumelane naSathane kuloko labekusho, kodvwa wamvumela kutsi alinge Jobe kuze kubonakale kutsi bekangumngani waJehova ngobe amtsandza yini.
SATHANE UHLASELA JOBE
10. Sathane wamhlasela njani Jobe futsi yini Jobe layenta?
10 Kwekucala, Sathane wabhubhisa yonkhe imfuyo yaJobe. Wabese ubulala tisebenti takhe letinyenti. Jobe walahlekelwa nguko konkhe labenako. Ekugcineni Sathane wabulala bantfwana baJobe labalishumi ngesiphepho. Kodvwa Jobe wachubeka etsembekile kuJehova. “Kuko konkhe loku Jobe akazange one ngekutsi asole Nkulunkulu.”—Jobe 1:12-19, 22.
Jehova wanika Jobe umvuzo ngobe bekangumngani lowetsembekile
11. (a) Yini lenye Sathane layenta kuJobe? (b) Wenta njani Jobe?
11 Sathane akazange ayekele kulinga Jobe. Watsi kuNkulunkulu: “Ase welule sandla sakho utsintse inyama yakhe nematsambo akhe, ubone kutsi angeke yini akwetfuke.” Sathane wabangela kutsi Jobe agule kamatima. (Jobe 2:5, 7) Nangetulu kwaloko, Jobe wachubeka etsembekile kuJehova. Watsi: “Ngiyawuze ngife ngingakehlukani nebucotfo bami.”—Jobe 27:5.
12. Jobe wakhombisa njani kutsi Sathane abenemanga?
12 Jobe abengakwati lobekushiwo nguSathane nobe kutsi yini lebeyibangela kutsi ahlupheke kangaka. Abecabanga kutsi nguJehova lombangela letinkinga. (Jobe 6:4; 16:11-14) Nanobe kunjalo, Jobe wachubeka etsembekile kuJehova. Manje besekucaca kutsi Jobe abenetinhloso letinhle tekukhonta Nkulunkulu. Abengumngani waNkulunkulu ngobe amtsandza. Kwakhanya kutsi Sathane abenemanga laluhlata!
13. Waba yini umphumela wekwetsembeka kwaJobe?
13 Jobe abengakwati lobekwenteka ezulwini kodvwa wachubeka etsembekile kuNkulunkulu futsi wakhombisa kutsi Sathane unenhlitiyo lembi. Jehova waniketa Jobe umvuzo wekuba ngumngani lowetsembekile.—Jobe 42:12-17.
SATHANE UKUCALELA NJANI EMANGA?
14, 15. Ngumaphi emanga Sathane lawacalela bonkhe bantfu?
14 Ungafundza tifundvo letibalulekile kulokwenteka kuJobe. Nalamuhla Sathane utsi sikhonta Jehova ngenca yetintfo lasentela tona. KuJobe 2:4 Sathane watsi: “Umuntfu angalahlekelwa nguko konkhe lanako ngenca yemphilo yakhe.” Sathane bekangasho kuJobe kuphela kodvwa watsi bonkhe bantfu bakhonta Jehova ngenca yebugovu. Ngisho nobe besekuphele emakhulu eminyaka Jobe afile, Sathane wachubeka ahlambalata Jehova futsi acambela tinceku takhe emanga. Loko sikubona emBhalweni weTaga 27:11 lotsi: “Ndvodzana yami, hlakanipha, khona ngitewujabula, ngitekwati kuphendvula nome ngabe ngubani longedzelelako [noma longihlambalatako].”
15 Ungakhetsa kulalela Jehova futsi ube ngumngani wakhe lowetsembekile kute ukhombise kutsi Sathane ungumcambimanga. Ngisho noma kungadzingeka wente lushintjo lolukhulu ekuphileni kute ube ngumngani waNkulunkulu, awuyuze utisole! Lesi sincumo lesibalulekile. Sathane utsi angeke uhlale wetsembekile kuNkulunkulu nawunetinkinga. Uzama kusiyekelisa kwetsembeka kuNkulunkulu. Ukwentanjani loko?
16. (a) Ngutiphi tindlela Sathane latisebentisako kuze ayekelise bantfu kukhonta Jehova? (b) Sathane angakuyekelisa njani wena kukhonta Jehova?
16 Sathane usebentisa tindlela letinyenti letehlukahlukene kute asiyekelise kuba bangani baNkulunkulu. Uhlasela “njengelibhubesi lelibhodlako, lelifuna lotsite lelingamshwabadzela.” (1 Phetro 5:8) Ungamangali nangabe bangani bakho, tihlobo kanye nalabanye betama kukuyekelisa kudadisha liBhayibheli nekwenta lelikushoko. Nakwenteka loko ungativa uhlaselwa.a (Johane 15:19, 20) Sathane uphindze atente “ingilosi yekukhanya.” Angetama kusenta singamlaleli Jehova. (2 Khorinte 11:14) Lenye indlela layisebentisako kute asiyekelise kukhonta Jehova, kusenta sitikhobose sicabange kutsi asiyuze sikhone kwenta tintfo kahle ngendlela Jehova lafuna sitente ngayo nasimkhonta.—Taga 24:10.
LALELA IMIYALO YAJEHOVA
17. Yini lesenta silalele Jehova?
17 Nasilalela Jehova sisuke sikhombisa kutsi Sathane ungumcambimanga. Yini lengasisita kutsi silalele Jehova? LiBhayibheli litsi: “Tsandza Simakadze [Jehova] Nkulunkulu wakho, ngayo yonkhe inhlitiyo yakho, nangawo wonkhe umphefumulo wakho, nangawo onkhe emandla akho.” (Dutheronomi 6:5) Silalela Jehova ngobe siyamtsandza. Njengobe simtsandza kakhulu Jehova sitawufuna kwenta konkhe lakushoko. Umphostoli Johane wabhala: “Nguloku lokushiwo kutsandza Nkulunkulu, kutsi sigcine imiyalo yakhe; kantsi nemiyalo yakhe ayisiwo umtfwalo.”—1 Johane 5:3.
18, 19. (a) Ngutiphi letinye tintfo Jehova latsi timbi? (b) Sati ngani kutsi Jehova akasiceli kutsi sente intfo lesingeke sikhone kuyenta?
18 Ngutiphi letinye tintfo Jehova latsi timbi? Letinye taletintfo tikulelibhokisi lelitsi “Kwenyanye Loko Jehova Lakwenyanyako.” Ekucaleni letinye taletintfo ungatibona tingasito letimbi kangako. Kodvwa nawufundza emavesi eliBhayibheli futsi ucabangisisa ngawo, utawubona kutsi kukuhlakanipha kulalela imitsetfo yaJehova. Ungaphindze ubone nekutsi kufanele wente lushintjo ekuphileni kwakho. Nawenta lolushintjo utawuba nekuthula nenjabulo leletfwa kuba ngumngani lowetsembekile waNkulunkulu ngisho noma kungaba matima kulwenta. (Isaya 48:17, 18) Sati ngani kutsi singakhona kwenta lolushintjo?
19 Jehova akasiceli kutsi sente tintfo lesingeke sikhone kutenta. (Dutheronomi 30:11-14) Njengemngani mbamba, Jehova usati kakhulu kunendlela lesicabanga kutsi sitati ngayo. Uyakwati lesingakhona kukwenta kanye nebutsakatsaka betfu. (Tihlabelelo 103:14) Umphostoli Pawula uyasikhutsata nakatsi: “Nkulunkulu wetsembekile futsi ngeke avume kutsi nilingwe ngalokungetulu kwaloko leningakhona kukwetfwala, kepha nanilingwa utawukwenta nendlela yekuphuma kuze nikwati kubeketela.” (1 Khorinte 10:13) Singaciniseka kutsi Jehova utawusipha emandla ekwenta lokulungile. Utakunika “emandla lamakhulu kakhulu” ekubeketelela timo letimatima. (2 Khorinte 4:7) Ngemuva kwekusitwa nguJehova etikhatsini letimatima, umphostoli Pawula watsi: “Nginemandla kuto tonkhe tintfo ngenca yaloyo longipha emandla.”—Filiphi 4:13.
FUNDZA KUTSANDZA LOKO JEHOVA LAKUTSANDZAKO
20. Ngubuphi buntfu lokufanele sibulingise futsi leni?
20 Nasifuna kuba bangani baJehova asigcini ngekubalekela loko Jehova latsi kubi, kodvwa kunalokunye lokufanele sikwente. (Roma 12:9) Bangani baNkulunkulu batsandza loko lakutsandzako. Bachazwa kahle kuTihlabelelo 15:1-5. (Fundza.) Bangani baJehova balingisa buntfu bakhe futsi bakhombisa “lutsandvo, injabulo, kuthula, kubeketela, umusa, buhle, kukholwa, umoya lomuhle, nekutibamba.”—Galathiya 5:22, 23.
21. Ungafundza njani kukhombisa buntfu lobutsandvwa nguNkulunkulu?
21 Ungafundza njani kulingisa lobuntfu lobuhle? Udzinga kwati loko Jehova lakutsandzako ngekufundza nangekudadisha liBhayibheli njalo. (Isaya 30:20, 21) Njengobe wenta loku, utamtsandza kakhulu Jehova bese ufuna kwenta loko lakushoko.
22. Utawuba yini umphumela nawulalela Jehova?
22 Lushintjo longalwenta ekuphileni lungafananiswa nekukhumula timphahla letindzala, wembatse letinsha. LiBhayibheli litsi kudzingeka sikhumule “buntfu lobudzala” futsi sembatse “buntfu lobusha.” (Kholose 3:9, 10) Ngisho nobe kwenta lolushintjo kungasimelula, kodvwa nasilwenta kute silalele, Jehova utsembisa kusinika ‘umvuzo lomkhulu.’ (Tihlabelelo 19:11) Ngako-ke khetsa kulalela Jehova futsi ukhombise kutsi Sathane ungumcambimanga. Khonta Jehova ngobe umtsandza hhayi ngobe kunetintfo lasetsembisa tona. Nawenta njalo utawuba ngumngani waJehova sibili!
a Loku akusho kutsi bantfu nabetama kukuyekelisa kudadisha liBhayibheli basuke basentjetiswa nguSathane. Kodvwa Sathane ‘ungunkulunkulu walelive’ futsi ‘lonkhe live lisemandleni akhe.’ Akumangalisi-ke nangabe labanye betama kusiyekelisa kukhonta Jehova.—2 Khorinte 4:4; 1 Johane 5:19.