INCENYE 5

Buyelani “KuMelusi NeMbonisi Wemiphefumulo Yenu”

Ikhona yini inkinga lefana neyakho kuleti lokucocwe ngato kulencwajana? Nangabe ikhona, banyenti labafana nawe. Tinyenti tikhonti taNkulunkulu letetsembekile esikhatsini salamuhla nesasendvulo letilwisene netinkinga letifananako. Nawe angakusita Jehova njengobe nato atisita.

Jehova utakusekela njengoba ubuyela kuye

UNGANGABATI kutsi Jehova utakusekela njengoba ubuyela kuye. Utakusita kutsi ulwisane nekukhatsateka, wendlulise tintfo letikuvise buhlungu futsi utfole kuthula engcondvweni nasenhlitiyweni yakho lokubangelwa kuba nanembeza lote licala. Kungenteka loko kutakhutsata kutsi ubuyele ukhonte Jehova kanye nalabanye labamkhontako. Simo sakho sitawufana nesalamanye emaKhristu angelikhulu lekucala umphostoli Phetro lawabhalela watsi: “Ngobe naninjengetimvu letidukako, kodvwa nyalo senibuyele kumelusi nembonisi wemiphefumulo yenu.”—1 Phetro 2:25.

Kubuyela kuJehova kuyintfo lenhle kakhulu longayenta. Sisho ngani? Sisho ngobe ngekwenta loko utayijabulisa kakhulu inhlitiyo yaKhe. (Taga 27:11) Njengobe wati, Jehova unemiva, ngako lesikwentako kuyamtsintsa. Kuliciniso kutsi Jehova akasiphoceleli kutsi simtsandze futsi simkhonte. (Dutheronomi 30:19, 20) Lesinye sati seliBhayibheli sayibeka kanje lendzaba: “Umnyango wenhlitiyo yemuntfu uvulwa ngumnikati wayo kuphela. Umuntfu longephandle akakhoni kuwuvula.” Kukhonta Jehova ngobe simtsandza kakhulu ngiko lokungasenta kutsi sikhetse kuwuvula lowo mnyango. Nasenta kanjalo, sisuke simniketa sipho lesiligugu—bucotfo betfu—futsi siyijabulisa kakhulu inhlitiyo yakhe. Kute lesingakulinganisa nenjabulo lesiyitfola ngekukhonta Jehova ngendlela lemfanele.—Imisebenti 20:35; Sembulo 4:11.

Dzadze lobekapholile wemukelwa ngelutsandvo ebandleni

Ngetulu kwaloko, nawubuyela ekukhonteni Nkulunkulu, utawukhona kunakekela sifiso sakho sekumkhonta. (Matewu 5:3) Ngayiphi indlela? Bantfu emhlabeni wonkhe bayatibuta kutsi ‘Kungani silapha?’ Balambele timphendvulo temibuto lemayelana nenjongo yekuphila. Bantfu banesifiso sekunakisisa tintfo letiphatselene naloko ngobe Jehova wabadala banaso. Wasakha ngendlela yekutsi sitfole kwenetiseka ekumkhonteni. Kute lokunye lokungasenetisa kwengca kwati kutsi sikhonta Jehova ngobe simtsandza.—Tihlabelelo 63:1-5.

Sicela wati kutsi Jehova ufisa ubuyele kuye. Ungakwetsemba njani loko? Cabanga nganaku lokulandzelako: Kwentiwe imithantazo leminyenti nakusalungiselelwa lencwajana ngekucophelela. Kungenteka uyiletselwe ngulomunye walabadzala nobe lomunye losikhonti saJehova. Ubese uyakhutsateka kutsi uyifundze futsi wemukele umlayeto wayo. Konkhe loku kubufakazi bekutsi Jehova akakakukhohlwa. Kodvwa kunaloko ukusondzeta kuye ngemusa.—Johane 6:44.

Kungasidvudvuta kwati kutsi Jehova akwenteki atikhohlwe tinceku takhe letilahlekile. Nguloko lokwajabulisa lomunye dzadze libito lakhe lokunguDonna. Watsi: “Kancane kancane ngase ngikhweshile ecinisweni, kodvwa ngangivamise kutikhandza sengicabanga ngemavi lasemBhalweni weTihlabelelo 139:23, 24 latsi: “Ngihlolisise, Nkulunkulu, wati inhlitiyo yami! Ngilinge, wati imicabango yami, ubone kutsi kute yini lokubi ekuhambeni kwami, bese ungiholela endleleni yaphakadze.” Bengati kutsi angisiye welive. Ecinisweni bengingativa ngemukelekile kulo futsi bengati kutsi enhlanganweni yaJehova ngulakufanele ngibe khona. Ngase ngiyabona kutsi Jehova bekangakangilahli, kwakudzingeka nje kutsi ngitfole indlela yekubuyela kuye. Ngiyajabula kakhulu kutsi ngakwenta loko!”

“Ngase ngiyabona kutsi Jehova bekangakangilahli, kwakudzingeka nje kutsi ngitfole indlela yekubuyela kuye”

Kungumthantazo wetfu locotfo kutsi nawe uphindze uyitfole ‘injabulo levela kuJehova.’ (Nehemiya 8:10) Awuyuze utisole ngekubuyela kuJehova.

Timphendvulo Temibuto Lemayelana Nekubuyela KuJehova

NGICALAPHI?

Umuntfu lobekagula kungase kudzingeke abuyele kancane kancane eluhlelweni lwakhe. Ngendlela lefanako, nawe njengobe ungumKhristu ungaticinisa ngekutondla kancane kancane lilanga ngalinye. Ungacabangi kutsi kumele ukwente konkhe sikhatsi sinye. Ungase utsatse imizuzu lembalwa ufundza nome ulalela incenye letsetjuliwe yeliBhayibheli, utadishe lenye yetincwadzi tetfu, ungene ku-jw.org nobe ubukele letinye tinhlelo letisakatwa ku-jw.org. Lokunye longakwenta kutsi usheshe wetame kuya emihlanganweni yelibandla. Ngetulu kwaloko, thantaza kuJehova ucele lusito lwakhe. ‘Phonsa konkhe kukhatsateka kwakho kuye, ngobe uyakukhatsalela.’—1 Phetro 5:7.

“Ngemuva kwekutsi sengipholile ngaba nemahloni ngisho ekuthantaza. Ngesikhatsi ngiba nesibindzi sekuthantaza ngavakashelwa ngulomdzala wasebandleni lebengikulo. Wangisita ngacondza kutsi Jehova bekangakalilahli litsemba ngami. Lomzalwane longulomdzala wangikhutsata kutsi ngicale kufundza liBhayibheli onkhe malanga. Kwenta loko kwangisita ngatfola emandla ekubuyela emihlanganweni. Ngemva kwesikhatsi ngaphindze ngacala kushumayela. Ngijabula kakhulu ngekutsi Jehova akalilahlanga litsemba kimi.”—Eeva.

LITANGEMUKELA NJANI LIBANDLA?

Ungangabati kutsi emalunga elibandla atakwemukela ngetandla letifutfumele. Kunekutsi akusole nome akwehlulele, atakukhombisa lutsandvo aphindze ente konkhe lokusemandleni kutsi akukhutsate.—Hebheru 10:24, 25.

“Bekungidlisa emahloni kucabanga ngekubuyela eHholeni LeMbuso. Bengitibuta kutsi bangani bami batangiphatsa njani. Lomunye wabodzadze lesebakhulile lengasengimshiye eminyakeni lengu-30 ebandleni lakitsi watsi: ‘Siyakwemukela ekhaya Ndvodzana!’ Loko kwangitsintsa kakhulu. Ngativa ngisekhaya.”—Javier.

“Ngaya eHholeni leMbuso ngafike ngahlala emuva ekugcineni kuze kube bete longibonako. Noma kunjalo, labanyenti bebasangikhumbula kusukela ngesikhatsi ngiseta esifundvweni ngisesemncane. Bangemukela ngelutsandvo ngaze ngativa nginekuthula lokukhulu. Ngativa shengatsi ngibuyile ekhaya.”—Marco.

LABADZALA BATANGISITA NJANI?

Labadzala batakuphatsa ngemusa. Batakuncoma ngesifiso sakho sekuphindze ube ‘nelutsandvo lobewunalo ekucaleni.’ (Sembulo 2:4) Ngemusa batakusita kutsi ulungise emaphutsa akho futsi loko batawukwenta “ngemoya lomuhle.” (Galathiya 6:1; Taga 28:13) Labadzala bangase bahlele kutsi kube khona lokuchubela sifundvo mhlawumbe asebentisa incwadzi letsi Jabulela Kuphila Kuze Kube Phakadze! nobe letsi Sondela KuJehova. Ungangabati kutsi labadzala batakudvudvuta baphindze bakusekela ngaso sonkhe sikhatsi.—Isaya 32:1, 2.

“Kuleminyaka lesiphohlongo ngipholile labadzala bebasolo bachubeka banginaka. Ngalelinye lilanga lomunye lomdzala wangikhombisa titfombe lesasitishuthe sindzawonye. Tangikhumbuta tikhatsi letimnandzi kangangekutsi ngacala kulangatelela injabulo lebenginayo ngesikhatsi ngikhonta Jehova. Ngelutsandvo labadzala bangisita ngaphindze ngacalisa luhlelo lwami lwekunakisisa tintfo letiphatselene naNkulunkulu.”—Victor.

“Uyonicinisa Nibe Nemandla”

Liculo lelinesihloko lesitsi “Hlabelelani Jehova Ngenjabulo” linetingoma letinyenti letimnandzi letitokudvudvuta futsi tikucinise njengoba ubuyela ekukhonteni Jehova. Cabanga ngemagama engoma 38. Isekelwe emagameni latfolakala ku-1 Phetro 5:10, lengoma inesihloko lesitsi “Uyonicinisa Nibe Nemandla.”

Nkulunkulu waninika liciniso

Wanibitela ekukhanyeni.

Wabona sifiso sekwenta lokuhle

Ngenhlitiyo yonkhe nimlalele.

Natsembisa kwent’ intsandvo yakhe;

Wanisita futs’ uyonisita.
Jehova waninik’ indvodzana yakhe;

Ngob’ afuna nitfole kuphila.

Kuniph’ indvodzana yakhe kusho kutsi,

Nani utanipha won’ emandla.

Kukholwa kwenu ngeke ak’khohlwe;

Uyonakekela bantfu bakhe.

(LIKHORASI)

Ngengati yaJesu wanisondzeta kuye.

Uyonicinisa, Aniphe emandla.

Usetawc’hubeka anivikela njalo.

Uyonicinisa, Aniphe emandla.

Kuze ulalele letingoma kanye naletinye tingoma teMbuso, ngena ku-website letsi jw.org.