INkhosi Yekucala Ka-Israyeli

Jehova abebeke tikhulu kutsi tihole ema-Israyeli, kodvwa wona abefuna inkhosi. Ngako atsi kuSamuweli: ‘Tonkhe letinye tive tinemakhosi. Natsi sifuna yetfu.’ Samuweli wabona kutsi loko bekukubi, ngako wathantaza kuJehova. Jehova watsi kuye: ‘Labantfu abali wena kepha bala mine. Batjele kutsi bangaba nayo inkhosi, kodvwa lenkhosi itawufuna tintfo letinyenti kubo.’ Nobe kunjalo, ema-Israyeli atsi: ‘Asinandzaba, sifuna kuba nenkhosi!’

Jehova watjela Samuweli kutsi Sawula abetawuba yinkhosi yekucala. Ngesikhatsi Sawula aya kuyovakashela Samuweli eRama, Samuweli wamgcoba njengenkhosi, ngekutsela emafutsa enhloko yakhe.

Ngekuhamba kwesikhatsi Samuweli wabita ema-Israyeli kute atewakhombisa inkhosi yawo. Kodvwa awazange ambone Sawula. Uyati kwentiwa yini? Kutsi abebhace emitfwalweni. Nabamtfola Sawula, bahamba naye bafike bammisa emkhatsini wema-Israyeli. Sawula abemudze kunabo bonkhe futsi abemuhle kakhulu. Samuweli watsi: ‘Niyambona yini loyo Jehova lamkhetsile?’ Ema-Israyeli amemeta atsi: ‘Lunwele loludze nkhosi!’

Nakasandza kuba yiNkhosi, Sawula abemlalela Samuweli futsi alalela naJehova. Kodvwa ngekuhamba kwesikhatsi washintja. Ngekwesibonelo, inkhosi bekungakafanele inikele imihlatjelo. Ngalelinye lilanga, Samuweli watjela Sawula kutsi ammele, kodvwa Samuweli wephuta kufika. Ngako Sawula wase utentela yena imihlatjelo. Wenta njani Samuweli nakefika? Watsi kuye: ‘Awukawulaleli umtsetfo waJehova Nkulunkulu wakho.’ Sawula wafundza yini emaphutseni akhe?

Ngesikhatsi Sawula ayokulwa nema-Amaleki, Samuweli watjela Sawula kutsi awabulale onkhe. Kodvwa Sawula akazange ayibulala iNkhosi Agagi. Jehova watsi kuSamuweli: ‘Sawula sewuyekele kungilandzela, nemavi ami akasawalaleli.’ Samuweli wakhubeka kakhulu wase utsi kuSawula: ‘Ngesizatfu sekutsi awukalaleli, Jehova sewutawukhetsa lenye inkhosi.’ Watsi nakahamba Samuweli, Sawula wadvonsa umphetfo wengubo yakhe yaze yadzabuka. Samuweli wase utsi kuSawula: ‘Jehova ubutsetse bukhosi baka-Israyeli kuwe.’ Jehova abetawukhetsa lenye inkhosi lebeyitamtsandza futsi imlalele.