IJerusalema Iyabhujiswa

Bantfu bakaJuda bamshiya Jehova bakhonta bonkulunkulu bemanga. Jehova wetama kubasita iminyaka leminyenti. Watfumela baphrofethi labanyenti kutsi babecwayise kodvwa abazange balalele. Esikhundleni saloko, bebahlekisa ngalabaphrofethi. Jehova wabayekelisa njani kukhonta titfombe?

Nebukhadnezari, inkhosi yaseBhabhulona wancoba letive ngekulandzelana kwato. Wacale wancoba iJerusalema, watfumba iNkhosi Jehoyakini, tikhulu, emasotja nebacoti bematje wabayisa eBhabhulona. Watsatsa tonkhe tintfo letiligugu lebetisethempelini laJehova. Nebukhadnezari wase ubeka Sedekiya kutsi abe yinkhosi yakaJuda.

Sedekiya abemhlonipha Nebukhadnezari. Kodvwa tive letatibomakhelwane kanye nebaphrofethi bemanga batjela Sedekiya kutsi ajikele inkhosi yaseBhabhulona. Jeremiya wamekhuta watsi: ‘Nangabe uyijikela, bantfu batawubulawa, kube nendlala netifo kaJuda.’

Ngemuva kweminyaka lengu-8 abusa, Sedekiya wacala kuvukela iBhabhulona. Wacela libutfo laseGibhithe kutsi limsite. Ngako-ke Nebukhadnezari watfumela libutfo lakhe kutsi liyohlasela iJerusalema futsi lifike lihlale edvute nalelidolobha. Jeremiya watsi kuSedekiya: ‘Jehova utsi nangabe utinikela kubaseBhabhulona, wena kanye nalelidolobha nitawusindza. Kodvwa nawungatinikeli, baseBhabhulona batawushisa iJerusalema bese bayakutfumba.’ Sedekiya watsi: ‘Angeke ngitinikele.’

Ngemuva kwemnyaka nehhafu, libutfo laseBhabhulona labhidlita tindvonga taseJerusalema lase lishisa lelidolobha ngemlilo. Lashisa lithempeli, labulala bantfu labanyenti futsi latfumba labanye.

Sedekiya wabaleka eJerusalema, kodvwa libutfo laseBhabhulona lamcosha laze lamkhandza edvute naseJerikho lase limyisa kuNebukhadnezari. Emadvodzana aSedekiya abulawa embikwakhe abukile. Nebukhadnezari wase ukupuluta emehlo aSedekiya wamyisa eBhabhulona lapho afike afela. Kodvwa Jehova wetsembisa bantfu bakaJuda watsi: ‘Ngemva kweminyaka lengu-70, ngitanibuyisela eJerusalema.’

Bekutawentekani kubantfu labebasebasha lebebatfunjelwe eBhabhulona? Bebatawuhlala betsembekile yini kuJehova?