UMbuso Loyawubusa Phakadze

Ngalobunye busuku, iNkhosi Nebukhadnezari yaba neliphupho lelesabekako. Yacala kwesaba yaze yehluleka ngisho nekulala. Ngako yabita bantfu labachaza emaphupho yatsi kubo: ‘Ngichazeleni liphupho lami.’ Batsi kuyo: ‘Awu Nkhosi, sicela usitjele kutsi yini loyiphuphile.’ Kodvwa Nebukhadnezari watsi kubo: ‘Cha! Nine tjelani mine liphupho lami, futsi nanehluleka ngitanibulala.’ Baphindze batsi kuye: ‘Sicela usitjele liphupho lakho futsi tsine sitawubese siyalichaza.’ Watsi kubo: ‘Sengiyabona kutsi nidlala ngami. Ngitjeleni liphupho lami!’ Batsi enkhosini: ‘Kute ngisho namunye umuntfu longenta loku. Loku lokufunako Nkhosi kulukhuni kakhulu.’

Nebukhadnezari wakwata kakhulu, waze watsi onkhe emadvodza lahlakaniphile aseBhabhulona akabulawe. Bekafaka ekhatsi Danyela, Shadraki, Meshaki na-Abednego. Danyela wacela kuyobona inkhosi. Yena nebangani bakhe bathantaza kuJehova bacela kutsi abasite. Yini Jehova layenta?

Ephusheni, Jehova wakhombisa Danyela liphupho laNebukhadnezari futsi wamtjela kutsi lisho kutsini. Ngakusasa, Danyela watjela inceku yenkhosi kutsi ingabulali ngisho nayinye indvodza lehlakaniphile ngobe utayichazela inkhosi liphupho layo. Lenceku yahamba naDanyela baya kuNebukhadnezari. Danyela watsi enkhosini: ‘Nkulunkulu ukukhombise lokutawenteka esikhatsini lesitako. Ephusheni lakho ubone sitfombe lesikhulu, inhloko yaso yentiwe ngeligolide, sifuba saso nemikhono yaso beyiyelisiliva, sisu saso nematsanga aso kulitfusi, sinemilente yensimbi bese tinyawo taso tiyinsimbi lebhicwe nelubumba. Kwabese kucetulwa litje entsabeni lashaya tinyawo talesitfombe. Lesitfombe sabhidlika saba ticucu futsi sapheshulwa ngumoya. Lelitje laba yintsaba lenkhulu futsi lagcwala umhlaba wonkhe.’

Danyela wachubeka watsi: ‘Nayi inchazelo yeliphupho lakho: Umbuso wakho ngulenhloko yeligolide. Lisiliva ngumbuso lotawulandzela. Kutawubese kuba nembuso locine njengelitfusi lotawubusa umhlaba wonkhe. Umbuso lolandzelako utawucina njengensimbi. Ekugcineni kutawuba nembuso lowehlukene ekhatsi, incenye yawo itawucina njengensimbi kantsi lelenye itawutsamba njengelubumba. Lelitje leliba yintsaba lenkhulu nguMbuso waNkulunkulu. Utawupitjita yonkhe lemibuso futsi wona utawuma kuze kube phakadze.’

Nebukhadnezari waguca embikwaDanyela wabheka phansi. Watsi: ‘NguNkulunkulu wakho lokuchazele leliphupho, futsi ubendlula bonkhe bonkulunkulu labakhona.’ Esikhundleni sekutsi abulale Danyela, wambeka esikhundleni lesiphakeme kakhulu futsi wamenta umbusi wayo yonkhe indzawo yaseBhabhulona. Uyabona yini kutsi Jehova wawuphendvula njani umthantazo waDanyela?