UMbuso Lofana Nesihlahla Lesikhulu

Ngalobunye busuku, Nebukhadnezari waba neliphupho lelametfusa. Ngako wabita bantfu labachaza emaphupho kuze batomchazela kutsi lisho kutsini. Kodvwa bonkhe behluleka. Wase ubita Danyela.

Nebukhadnezari watsi kuDanyela: ‘Ephusheni lami ngibone sihlahla. Sikhule kakhulu saze satsintsa sibhakabhaka, futsi sabonakala emhlabeni wonkhe. Emacembe aso abemahle netitselo taso titinyenti. Tilwane betilele phasi kwemtfunti waso, netinyoni takhele tidleke emagaleni aso. Kwabese kwehla ingilosi ivela ezulwini, yatsi: “Juba lesihlahla, ujube nemagala aso. kodvwa uboshiya siphunti kanye netimphadze taso emhlabatsini,futsi usibophe ngensimbi nangelitfusi. Inhlitiyo yaso itawushintja ibe yesilwane sesiganga futsi ingasabi yemuntfu kuze kwendlule tikhatsi letingu-7. Bonkhe bantfu batawukwati kutsi Nkulunkulu unguMbusi nekutsi umbuso angawunika nobe ngubani lafuna kumnika.”’

Jehova watjela Danyela kutsi belisho kutsini leliphupho. Kwatsi Danyela nakeva inchazelo yalo, wacala kwesaba. Watsi enkhosini: ‘Nkhosi yami, kube mane leliphupho belicondzene netitsa takho, kodvwa licondzene nawe. Nguwe lesihlahla lesajutjwa. Utawucoshwa emkhatsini webantfu futsi udle tjani njengetilwane tesiganga. Njengobe ingilosi itsite ungasijubi siphunti salesihlahla kanye netimphandze taso, kusho kutsi utawuphindze ube yinkhosi.’

Ngemuva kwemnyaka, kwatsi Nebukhadinezari asahambahamba etulu eluphahleni lwesigodlo sakhe, futsi ancoma iBhabhulona, watsi: ‘Awubuke indlela lelilihle ngayo lidolobha lengalakha. Makhulu kakhulu emandla ami!’ Asakhuluma, weva livi livela ezulwini litsi: ‘Nebukhadinezari! Nyalo awusesiyo inkhosi.’

Ngaleso sikhatsi, Nebukhadinezari wacala kuhlanya futsi wafana nesilwane sesiganga. Wakhishwa esigodlweni sakhe, wahlala ehlatsini netilwane tesiganga. Tinwele taNebukhadinezari takhula taba tindze kakhulu futsi netingalo takhe besetifana netingalo tenyoni.

Ngemuva kweminyaka lengu-7, Nebukhadinezari abengasahlanyi, ngako Jehova waphindze wamenta inkhosi yaseBhabhulona. Nebukhadinezari wase utsi: ‘Ngidvumisa Jehova inkhosi yasezulwini. Nyalo sengiyati kutsi Jehova unguMbusi. Uyabatfobisa labatigcabhako futsi angabeka nome ngangubani kutsi abe yinkhosi.’