Khoneliyuse Unikwa Umoya Longcwele

EKhesariya, bekunendvodza lebeyibitwa ngekutsi nguKhoneliyuse, futsi iyindvuna yelibutfo laseRoma. Nanobe beyingasuye umJuda, emaJuda abeyihlonipha. Beyibasita bantfu labaphuyile. Khoneliyuse abekholelwa kuJehova futsi abethantaza njalo kuye. Ngalelinye lilanga ingilosi yefika kuKhoneliyuse yatsi: ‘Nkulunkulu uyivile imithantazo yakho. Ngako tfuma emadvodza kutsi aye eJopha, lakuhlala khona Phetro, futsi amcele kutsi ete kuwe.’ Ngekushesha Khoneliyuse watfuma emadvodza lamatsatfu kutsi aye eJopha, lokuluhambo lolungemakhilomitha lacishe abe ngu-50.

NakaseJopha, Phetro wabona umbono. Wabona tilwane emaJuda lebekangakavumeleki kutsi atidle futsi weva livi limtjela kutsi akadle. Phetro wala kudla, watsi: ‘Angizange sengike ngisidle silwane lesingcolile.’ Lelivi latsi kuye: ‘Yekela kubita letilwane ngekutsi tingcolile.’ Phetro wabese utjelwa kutsi kunemadvodza lamatsatfu emnyango wakhe lokufanele ahambe nawo. Ngako Phetro waya emnyango wafike wabuta lamadvodza kutsi atokwentani. Lamadvodza amphendvula atsi: ‘Sitfunywe nguKhoneliyuse indvuna yelibutfo, utsi asikulandze ute endlini yakhe leseKhesariya.’ Phetro wawangenisa lamadvodza kutsi alale busuku bunye. Ngakusasa, Phetro wahamba nalamadvodza kanye nalabanye bazalwane baseJopha baya eKhesariya.

Nabefika, Khoneliyuse waguca embikwaPhetro. Kodvwa Phetro watsi: ‘Sukuma, nami ngingumuntfu njengawe. Nkulunkulu utse ngite lapha endlini yakho ngisho nobe emaJuda angayi emakhaya ebantfu baletinye tive. Ngicela ungitjele kutsi ungibiteleni.’

Khoneliyuse watsi kuPhetro: ‘Emalangeni lamane lendlulile ngesikhatsi ngithantaza kuNkulunkulu, kwefika ingilosi yatsi angikubite. Ngicela usifundzise emavi aJehova.’ Phetro watsi: ‘Nyalo sengifundzile kutsi Nkulunkulu akakhetsi, kodvwa wemukela nome ngubani lofuna kumkhonta.’ Phetro wabafundzisa tintfo letinyenti ngaJesu. Umoya longcwele wehlela kuKhoneliyuse nakubo bonkhe lebekanabo futsi bonkhe babhajatiswa.