Jehova “Akakhetsi”

Wake wabandlululwa yini? Kukhona yini lowake wakucela wanganikwa kona, nome umsebenti lotsite longazange wentelwe wona, nome wake waphatfwa kabi yini ngenca yelibala lesikhumba sakho, indzawo losuka kuyo nobe ngenca yendlela lowatiwa ngayo? Nangabe kunjalo, loku akucali ngawe. Naka nati tindzaba letimnandzi: Ngisho nobe kubukelwa phansi kukhona emhlabeni, kepha akukho ezulwini. Umphostoli Phetro labengumKhristu washo ngekuciniseka kutsi “Nkulunkulu akakhetsi.”—Fundza Imisebenti 10:34, 35.

Phetro wakhuluma lamavi asendzaweni langakayetayeli, abesemtini wemuntfu weTive libito lakhe kunguKhoneliyuse. Phetro labengumJuda ngekutalwa, abephila ngalesikhatsi emaJuda atsatsa bantfu beTive njengebantfu labangcolile futsi labangakufaneli kuba semkhatsini walabanye bantfu. Ngako-ke, abefunani Phetro emtini waKhoneliyuse? Kafishane nje, nguNkulunkulu Jehova lowahlela kutsi aye lapho. Phetro abebone umbono lovela kuNkulunkulu lapho atjelwa khona: “Ungasho kutsi kungcolile loko lokuhlantwe nguNkulunkulu.” Phetro abengati kutsi ngayitolo naKhoneliyuse abebone umbono lapho ingilosi beyimtjele khona kutsi abite Phetro. (Imisebenti 10:1-15) Ngalesikhatsi Phetro acaphela kutsi nguJehova labehlele loku, wehluleka kutibamba.

Watsi: “Nembala sengibonile kutsi Nkulunkulu akakhetsi libala lemuntfu.” (Imisebenti 10:34) Ligama lesiGriki lelihunyushwe ngekutsi ‘khetsa’ nalibekwe njengobe linjalo, lisho “kubuka libala lemuntfu.” (The Kingdom Interlinear Translation of the Greek Scriptures) Mayelana naleligama, lesinye sati seliBhayibheli silichaza ngalendlela: “Limayelana nelijaji lelibuka umuntfu ebusweni bese likhipha sincumo, lingawanaki emaciniso endzaba, limane libuke kutsi liyamtsandza yini lomuntfu nobe alimtsandzi.” Nkulunkulu akabuki buso bemuntfu ngenca nje yekutsi usive sini, watiwa njani nome ngenca yekubonakala kwakhe kwangephandle.

Esikhundleni saloko, Jehova ubona loko lokungekhatsi enhlitiyweni yetfu. (1 Samuweli 16:7; Taga 21:2) Phetro wabese utsi: “Lowo lomesabako ente lokulungile uyemukeleka kuye, nome angewasiphi sive.” (Imisebenti 10:35) Kwesaba Nkulunkulu kusho kumhlonipha, kumdvumisa nekumetsemba, kukubalekela kwenta nome yini lengamjabulisi. Kwenta kulunga kufaka ekhatsi kukwenta ngekutitsandzela lokuhle embikwaNkulunkulu. Jehova uyajabula ngemuntfu lonenhlitiyo lemesabako futsi lementa ente lokulungile.—Dutheronomi 10:12, 13.

Nangabe wake wabandlululwa unetizatfu letinhle tekukhutsatwa ngulamavi aPhetro mayelana naNkulunkulu. Jehova udvonsela bantfu bato tonkhe tive ekukhonteni kweliciniso. (Johane 6:44; Imisebenti 17:26, 27) Uyayilalela futsi ayiphendvule imithantazo yetikhonti takhe ngisho nome tinaliphi libala lesikhumba, titasiphi sive nome tatiwa ngayiphi indlela. (1 Emakhosi 8:41-43) Singaciniseka-ke ngekutsi nangabe Jehova abuka emhlabeni ubona sive sinye—sive sebantfu. Awutsandzi yini kufundza lokunyenti ngaloNkulunkulu longakhetsi?