SIFUNDVO 2

Yenta Kuvakale Kutsi Uyakhuluma

2 Khorinte 2:17

LOKUFANELE UKWENTE: Khuluma ngalosuka enhlitiyweni, ngendlela lovame kukhuluma ngayo, futsi leveta indlela lotiva ngayo ngalabo labakulalele nangesihloko lokhuluma ngaso.

INDLELA YEKUKWENTA:

Lungiselela kahle futsi uthantaze. Thantaza ucele lusito lwekutsi ungatigcabhi, kepha unake indzaba lokhuluma ngayo. Kufanele emaphuzu lotawukhuluma ngawo akhanye engcondvweni yakho. Esikhundleni sekumane ufundze phansi, khuluma ngalokusuka enhlitiyweni.

Nawutawufundza indzaba leseBhayibhelini nobe lekulenye incwadzi, yidadishe kahle kute nasewuyifundza uvakale kamnandzi. Nawufundza emavi alabanye bantfu, veta imiva yabo, kepha ufundze ngendlela bantfu labavame kukhuluma ngayo.
Khuluma ngendlela lesuka enhlitiyweni. Tibute kutsi kungani bantfu labakulalele badzinga kukuva lokushoko, bese ucabanga ngabo nawusakhuluma. Loko kutawenta kutsi buso bakho, indlela loma ngayo, naloshukumisa ngayo umtimba wakho kukhombise bungani nekuciniseka ngalokushoko.

Kukhuluma ngendlela lesuka enhlitiyweni akusho kukhuluma ngendlela lengakahlonipheki. Khuluma ngendlela lecacile nalehambisana nemitsetfo yelulwimi kute indzaba yakho ibe nesitfunti.
Babuke bantfu lokhuluma nabo. Babuke emehlweni nangabe kwenta njalo kukahle endzaweni yakini. Nawubeka inkhulumo, buka umuntfu munye ngesikhatsi, esikhundleni sekumane uhambise emehlo kubo bonkhe labakulalele.