Kukhuluma Ngendlela Lovame Kukhuluma Ngayo

KUKHULUMA ngendlela yakho levamile kwenta labakulalele bakwetsembe. Ungayetsemba yini intfo leshiwo ngumuntfu lotifihle buso? Kungawenta yini umehluko nangabe loko latifihle ngako kukuhle kunaye? Cha. Ngako-ke, kunekutsi utente lomunye umuntfu, bani nguwe.

Kukhuluma ngendlela leyetayelekile akufani nekukhuluma ngekunganaki. Akusikahle kungayilandzeli imitsetfo yelulwimi, kubita kabi emagama nekungevakali nawukhuluma. Kufanele sikubalekele kukhuluma ngendlela lengakahlonipheki. Ngaso sonkhe sikhatsi sifuna kuhlale sikhombisa inhlonipho ngendlela lesikhuluma ngayo kanye nalesitiphatsa ngayo. Umuntfu lokhuluma ngendlela leyetayelekile akakhulumi ngendlela lehlonipheke kakhulu futsi akakhatsateki kakhulu ngekutsi bantfu batawutsini.

Ensimini. Nakufanele ufakaze endlini letsite nobe kumuntfu lomtfola endzaweni yawonkhe wonkhe ushaywa luvalo yini? Kuba njalo kulabanyenti betfu, kodvwa kulabanye kwenteka kakhulu. Luvalo lungenta livi lakho lingavakali kahle nobe lichachatele, futsi kwetfuka kungabonakala ngekutsi unyakatise tandla nenhloko ngendlela lengahambisani nalokushoko.

Kummemeteli lenkinga ingabangwa tizatfu letehlukehlukene. Mhlawumbe ucabanga ngekutsi bantfu batsini nobe ucabanga ngekutsi inkhulumo yakhe utayetfula kahle yini. Loko kuvamile, kodvwa nangabe ukunaka kakhulu kuba netinkinga. Yini lengakusita nangabe ushaywa luvalo nawusensimini? Kulungiselela kahle kanye nekuthantaza kuJehova. (Imis. 4:29) Kufanele ucabange nangemusa Jehova lanawo ngekutsi ameme bantfu kutsi batojabulela imphilo lete sono kanye nekuphila lokuphakadze ePharadisi. Cabanga nangebantfu lowetama kubasita nekutsi badzinga kuva tindzaba letimnandzi.

Khumbula nekutsi bantfu banenkhululeko yekutikhetsela. Ngako-ke, kungenteka batemukele nobe bangatemukeli tindzaba letimnandzi. Bekunjalo nakuJesu ngesikhatsi afakaza kuma-Israyeli asendvulo. Sabelo lonikwe sona kutsi ushumayele. (Mat. 24:14) Ngisho nome bantfu bangavumi kutsi ucoce nabo, kuba khona kwakho kunganiketa bufakazi. Utawube uphumelele ngobe uvumele Jehova wakusebentisa ekufezeni intsandvo yakhe. Nangabe bantfu bakuvumela kutsi ucoce nabo, utawukhuluma ngani? Nawucabanga ngetidzingo talabanye, loko lokushoko kutawutsandzeka futsi utawukhuluma ngendlela lotayele kukhuluma ngayo.

Nangabe lapho ushumayela wenta futsi ukhuluma ngendlela lohlale ukhuluma ngayo malanga onkhe, bantfu lokhuluma nabo batawukhululeka. Bangase bafise nekulalela emaphuzu lasekelwe emBhalweni lofuna nicoce ngawo. Kunekutsi ubetfulele inkhulumo, coca nabo. Bani nebungani. Khombisa kutsi uyabakhatsalela, futsi ubakhutsate nekutsi bavete imibono yabo. Kuliciniso kutsi nangabe elulwimini nobe endzaweni yakini kudzingeka kutsi ulandzele imitsetfo letsite njengendlela yekukhombisa inhlonipho nawukhuluma nebantfu longabati, kufanele uyigcine leyo mitsetfo. Kodvwa kufanele uhlale ukulungele kukwenta loko, kepha ukwente ujabulile.

Endzaweni Yesikhulumi. Kuhle kutsi nawukhuluma nelicembu ukhulume ngendlela lovame kukhuluma ngayo nalesancociswano. Kuliciniso kutsi nangabe bantfu babanyenti kungase kudzingeke kutsi uphakamise livi. Nawetama kuyibamba ngenhloko inkhulumo yakho nobe nangabe luhlaka lwakho lunemininingwane leminyenti kakhulu, loko kutawubangela kutsi ukhatsateke kakhulu ngemagama lotawasebentisa. Kusebentisa emagama lafanele kubalulekile, kodvwa nangabe sewukhatsateka kakhulu ngako, ngeke ukhululeke nawukhuluma futsi ngeke ukhulume ngendlela lovame kukhuluma ngayo. Emaphuzu akho kufanele uwahlele kahle kusenesikhatsi futsi kufanele unake wona kakhulu hhayi emagama.

Loku kufanele ukwente nalapho kucocwa nawe enkhulumeni emhlanganweni. Lungiselela kahle kodvwa ungatifundzi nobe utibambe ngenhloko timphendvulo takho. Nawuphendvula, khuluma ngemavi akho kuze timphendvulo takho titewusuka enhlitiyweni.

Ngisho netindlela letikahle tekukhuluma nangabe tisetjentiswe ngalokwecile, kubantfu tingevakala tingaketayeleki. Nasi sibonelo: Kufanele kutsi ukhulume ngendlela lecacile futsi uwabite kahle emagama, kodvwa loko ungakwenti kakhulu kangangekutsi loko lokushoko kungasevakali kahle nobe kuvakale kungasiyo indlela levamile yekukhuluma. Nakwentiwe kahle, kushukuma kwemtimba kungenta inkhulumo iphile, kodvwa nangabe kungentiwa ngekukhululeka nobe kwentiwa ngalokwecile kungabangela kutsi bantfu bangakunaki loko lokushoko. Phakamisa livi ngendlela lefanele kodvwa yetama kutsi ungamemeti. Kuhle kutsi ngalesinye sikhatsi ube nemdlandla nawetfula inkhulumo yakho kodvwa kufanele ukubalekele kubukisa. Kushintjashintja livi, kuba nemdlandla kanye nemiva akukafaneli kusetjentiswe ngendlela letawukwenta kutsi kunakwe tsine nobe letawukwenta kutsi labo labalalele bangakhululeki.

Labanye bantfu banendlela yabo yekukhuluma ngisho nome bangetfuli inkhulumo. Labanye bakhululeka kakhulu nabakhuluma. Intfo lebalulekile kutsi sikhulume kahle malanga onkhe futsi sitiphatse ngenhlonipho njengobe singemaKhristu. Ngako-ke nasewusendzaweni yesikhulumi utawukhona kukhuluma kanye nekwenta tintfo ngalokusuka enhlitiyweni.

Nawufundzela Linyenti. Nawufundzela libandla, kudzingeka imetamo kuze ukhulume ngendlela lovame kukhuluma ngayo. Kuze wente loku, tfola emaphuzu layinhloko endzabeni lotawube uyifundza, uphindze unake nendlela lachazwe ngayo. Wacondze kahle; ngobe nawungenti njalo utawumane ufundze emagama nje. Tfola kutsi emagama longakawetayeli abitwa njani. Phrakthiza kufundza ngelivi lelivakalako kuze ukhone kushintjashintja livi futsi ufundze emagama uwahlanganise kuze imicondvo ivele ngendlela lecacile. Phrakthiza kanyenti kuze kube ngulapho sewufundza ngekushelela. Kwati kahle loko lotakufundza kuze kutsi nawukufundza ngelivi lelivakalako kube shengatsi uyacoca, ube nemdlandla. Nawenta njalo utawube ukhuluma ngendlela lovame kukhuluma ngayo.

Kuliciniso kutsi nasifundzela linyenti sisuke sifundza tincwadzi letisekelwe eBhayibhelini. Ngetulu kwesabelo sekufundza eSikolweni Semsebenti WemaKhristu, siphindze sifundze imibhalo nasisensimini nanasetfula tinkhulumo ebandleni. Bazalwane babelwa kufundza tigaba eSifundvweni se-Sicongosekulindza naseSifundvweni SeliBhayibheli Selibandla. Labanye bazalwane labanelikhono batfola tabelo tekwetfula tinkhulumo letifundvwako emihlanganweni lemikhulu. Ngisho nome ufundza liBhayibheli nome letinye tincwadzi, tincenye leticashuniwe kufanele utifundze ngendlela leyenta loko lokufundzako kuphile. Nangabe kucashunwe emavi ebantfu labanyenti, shintja livi lakho nasewufundza emavi alomunye umuntfu. Lokufanele ukunake: Kufanele ungecisi nawenta loku, kodvwa fundza ngalokusuka enhlitiyweni kuze indzaba loyifundzako iphile.

Nangabe ufundza ngalokusuka enhlitiyweni usuke ufundza shengatsi uyacoca. Utawuvakala kutsi unguwe kanye nekutsi uyaciniseka.