Kukhuluma Shengatsi Uyacoca

BANTFU bavame kukhululeka nabacoca nebangani. Emavi labawashoko avele atifikele. Labanye bantfu bayiveta ngekukhululeka indlela labativa ngayo; kodvwa kulabanye akusinjalo. Nanobe kunjalo, lokushoko kuyatsandzeka nangabe ukhuluma ngendlela lovame kukhuluma ngayo.

Nawukhuluma nemuntfu longamati, akukafaneli ukhulume shengatsi uyamati nobe ukhululeke kakhulu. Emasikweni lamanyenti, nawukhuluma nemuntfu longamati kufanele usebentise indlela lehloniphekile. Ngemuva kwekukhombisa leyo nhlonipho, kungaba kuhle kutsi ubese ukhuluma ngekukhululeka nangendlela lovame kukhuluma ngayo, kodvwa loku ukwente ngekuhlakanipha.

Kufanele unake nalapho wetfula inkhulumo ebandleni. Kukhuluma ngendlela lekhululeke kakhulu kwenta imihlangano yebuKhristu ingahlonipheki, futsi kwenta loko lokushoko kungabi nesisindvo. Kuletinye tilwimi, kudzingeka usebentise emagama latsite nawukhuluma nemuntfu lomdzala, nathishela, nemuntfu losesikhundleni, nobe nemtali. (Naka emagama lasetjentiswe kuMisebenti 7:2 na-13:16.) Nawukhuluma nemuntfu loshade naye nobe nemngani wakho lomkhulu usebentisa emagama lehlukile. Kuliciniso kutsi nasetfula inkhulumo kufanele sikhulume ngendlela lekhululekile, kodvwa indlela lesikhuluma ngayo kufanele ikhombise inhlonipho.

Kodvwa-ke tikhona letinye tintfo letingabangela kutsi indlela umuntfu lakhuluma ngayo ihlonipheke kakhulu nobe avakale angakakhululeki. Lenye yaletintfo yindlela lakha ngayo imisho. Kungaba nenkinga nangabe sikhulumi setama kusho loko lokubhalwe phansi njengobe kunjalo. Lulwimi lesilusebentisa nasikhuluma alufani nalolo lesilusebentisa nasibhala. Kuliciniso kutsi nasicwaninga kwatiswa kwenkhulumo sisebentisa tincwadzi letishicilelwe. Ngalokuvamile luhlaka lolubhalwe phansi luba sisekelo senkhulumo yetfu. Kodvwa nangabe wetama kusho imicondvo njengobe ibhalwe phansi kuloluhlaka nobe uyifundza phansi nawetfula inkhulumo yakho, ngeke ukhone kukhuluma shengatsi uyacoca. Kuze ukhone kukhuluma shengatsi uyacoca, imicondvo kufanele uyisho ngemavi akho futsi ungasebentisi imisho lemidze kakhulu.

Lokunye lokungaba yinkinga litubane. Nawungakakhululeki nawukhuluma nobe nawukhuluma ngendlela lehlonipheke kakhulu, esikhatsini lesinyenti uyawabala emagama futsi ukhuluma ngelitubane lelifanako. Nasikhuluma malanga onkhe, siyalishintjashintja litubane lesikhuluma ngalo futsi sihlaba nemakhefu langalingani.

Nawukhuluma nelicembu lelikhulu lebantfu, kufanele uphakamise livi, ube nemfutfo, futsi ube nemdlandla njengobe ukhuluma shengatsi uyacoca, kuze labo lokhuluma nabo bachubeke bakulalele.

Kuze ukhone kukhuluma shengatsi uyacoca nawusensimini, kufanele wetayele kukhuluma kahle malanga onkhe. Loku akusho kutsi kudzingeka ube ngumuntfu lofundze kakhulu. Kodvwa kuhle kwetayela kukhuluma ngendlela letawukwenta labanye bakulalele ngenhlonipho loko lokushoko. Njengobe ufuna kwenta loku, cabanga ngalamaphuzu lalandzelako kuze ubone kutsi kukhona yini lakudzingeka ulungise khona endleleni lokhuluma ngayo malanga onkhe.

1. Ungawasebentisi emavi lephula imitsetfo yelulwimi nobe lakwenta ufane nebantfu labaphila imphilo lephambene netimiso taNkulunkulu. Ngekuvumelana neseluleko lesitfolakala kuKholose 3:8, ungalusebentisi lulwimi lolubi nobe lolunenhlamba. Ngakulolunye luhlangotsi, kute lokubi ngekusebentisa lulwimi lolusebentisa malanga onkhe. Indlela yekukhuluma yamalanga onkhe ayikahlonipheki kakhulu, kodvwa iyavumelana nemitsetfo yelulwimi.

2. Ungalibali kuphindzaphindza emavi nobe imishwana lefanako kuze uvete umcondvo ngamunye. Yetayela kusebentisa emagama lakuveta ngalokucacile loko lokushoko.

3. Ungaphindzaphindzi loko lesewukushito. Lokungakusita kutsi ucale ukwati kahle loko lofuna kukusho, ngemuva kwaloko bese uyakhuluma.

4. Ungasebentisi emagama lamanyenti kakhulu latawukwenta kutsi imicondvo lemihle ingasabonakali. Yetayela kusebentisa imisho lemelula kuze wente liphuzu lofuna bantfu bali khumbule licace.

5. Khuluma ngendlela letawukhombisa kutsi uyaba hlonipha labanye.