SIFUNDVO 01
LiBhayibheli Lingakusita Njani?
Cishe sonkhe sinemibuto lesitibuta yona mayelana nekuphila, kuhlupheka, kufa, kanye nelikusasa. Siphindze sikhatsateke ngekutsi singayitfola njani imali leyenele kuze sinakekele tidzingo tetfu, nangekutsi yini lesingayenta kuze sibe nemindeni lejabulako. Bantfu labanyenti batfole kutsi liBhayibheli aligcini nje ngekubasita batfole timphendvulo temibuto lebalulekile, kodvwa liphindze libanikete teluleko labangatisebentisa ekuphileni kwabo kwamalanga onkhe. Ukhona yini umuntfu lomcabangako longasitwa liBhayibheli?
1. Ngumiphi leminye imibuto lephendvulwa liBhayibheli?
LiBhayibheli liphendvula nayi imibuto lebalulekile: Kwacala njani kuphila? Iyini injongo yekuphila? Kwentiwa yini kutsi bantfu labalungile bahlupheke? Kwentekani kumuntfu nakafa? Nangabe bonkhe bantfu bafuna kuthula, kungani kugcwele timphi? Yini letawukwenteka emhlabeni esikhatsini lesitako? LiBhayibheli lisikhutsata kutsi sitifune timphendvulo talemibuto, futsi bantfu labanyenti batitfolile timphendvulo letenetisako.
2. LiBhayibheli lingasisita njani kutsi sijabulele kuphila?
LiBhayibheli lisiniketa teluleko letinhle. Sibonelo saloko kutsi lifundzisa imindeni indlela yekutfola injabulo sibili. Lisitjela loko lesingakwenta nasicindzetelekile, nendlela lesingawujabulela ngayo umsebenti lesiwentako. Njengobe sichubeka sifundza lencwadzi ndzawonye, utawufundza lokushiwo liBhayibheli ngaloku lesicedza kukubala kanye nalokunye lokunyenti. Utawuvumelana nalamavi latsi: “Yonkhe imiBhalo [konkhe lokushiwo liBhayibheli] . . . ilusito.”—2 KuThimothi 3:16.
Lencwadzi ayisilo liBhayibheli, kunaloko, ikukhutsata kutsi uhlolisise liBhayibheli. Ngako sikukhutsata kutsi uyifundze yonkhe imiBhalo lekuletifundvo futsi uyihlobanise naloko lokufundzako.
CHUBEKA UFUNISISA
Cabanga ngendlela liBhayibheli lelibasite ngayo labanye bantfu, indlela longakujabulela ngayo kulifundza, nekutsi kungani kukahle kusitwa ngulotsite kuze ulicondzisise kahle.
3. LiBhayibheli lingasicondzisa
LiBhayibheli lifanana nelithoshi lelikhanyisa kakhulu. Lingasisita sente tincumo letikahle, futsi lisitjele kutsi yini letawukwenteka esikhatsini lesitako.
Fundza Tihlabelelo 119:105, bese nicoca ngalemibuto lelandzelako:
Yini umbhali waletihlabelelo bekayicabanga ngeliBhayibheli?
Yini wena loyicabangako ngeliBhayibheli?
4. LiBhayibheli lingayiphendvula imibuto lesinayo
Lomunye make watfola kutsi liBhayibheli liyayiphendvula imibuto lebeseyimhluphe sikhatsi lesidze. Dlala le-VIDEO, bese nicoca ngalemibuto lelandzelako.
Kule-video, lomake bekanamiphi imibuto?
Kutadisha liBhayibheli kwamsita njani?
LiBhayibheli lisikhutsata kutsi sibute imibuto. Fundza Matewu 7:7, bese nicoca ngalombuto lolandzelako:
Ngumiphi imibuto lonayo locabanga kutsi ingaphendvulwa liBhayibheli?
5. Ungakujabulela kufundza liBhayibheli
Bantfu labanyenti bayakujabulela kufundza liBhayibheli, futsi bayazuza kulo. Dlala le-VIDEO, bese nicoca ngalemibuto lelandzelako.
Kule-video, labantfu labasha bebativa njani ngekufundza?
Ngisho nobe bangakutsandzi kufundza, kodvwa kungani bakujabulela kufundza liBhayibheli?
LiBhayibheli lingasinika ticondziso letingasidvudvuta futsi tisinikete litsemba. Fundza KubaseRoma 15:4, bese nicoca ngalombuto:
Kuyakujabulisa yini loko liBhayibheli lelisetsembisa kona ngendvudvuto nelikusasa?
6. Labanye bantfu bangasisita kutsi silicondze liBhayibheli
Ngetulu kwekumane nje batifundzele bona, labanye batfole kutsi kucoca nalomunye umuntfu ngeliBhayibheli kubasita balicondza kahle. Fundza Imisebenti 8:26-31, bese nicoca ngalombuto:
Yini lengasisita silicondze kahle liBhayibheli?—Buka emavesi 30 na-31.
Indvodza lengumTopiya beyidzinga lusito kute icondze imiBhalo. Bantfu labanyenti lamuhla bakutfola kulusito kucoca nalabanye ngeliBhayibheli
LABANYE BANTFU BATSI: “Usuke udlala ngesikhatsi nawufundza liBhayibheli.”
Wena utsini? Kungani usho njalo?
LOKO LESICOCE NGAKO
LiBhayibheli lineteluleko lesingatisebentisa ekuphileni kwamalanga onkhe, liphendvula imibuto lebalulekile, futsi liniketa bantfu indvudvuto nelitsemba.
Yini Loyifundzile?
Teluleko letinjani lesingatitfola eBhayibhelini?
Ngumiphi leminye imibuto lephendvulwa liBhayibheli?
Yini longatsandza kuyifundza eBhayibhelini?
LOKUNYE LONGAKUHLOLA
Cabanga ngendlela seluleko seliBhayibheli lesingakusita ngayo ekuphileni kwakho lamuhla.
“Tifundvo LetiseBhayibhelini—Kuhlakanipha Lokungaphuphi” (Sicongosekulindza No. 1 2018)
Bona indlela liBhayibheli leliyisite ngayo indvodza lebeyingatetsembi futsi itikhobosa kusukela iseyincane.
Indlela Imphilo Yami Lensha Nalejabulisako Leyacala Ngayo (2:53)
Hlolisisa seluleko seliBhayibheli lesingasita imindeni.
“Izinto Ezingu-12 Ezenza Imindeni Iphumelele” (Phaphama! No. 2 2018 letfolakala ngesiZulu)
Fundza indlela liBhayibheli leliwulungisa ngayo umbono longasiwo mayelana nekutsi ngubani lobusa umhlaba.
Kungani Kufanele Sifundze LiBhayibheli?—I-Video Lendze (3:14)