Loko Jesu Lakufundzisa NgeMbuso WaNkulunkulu

“Wahamba wadzabula emadolobha nemadolobhana ashumayela liVangeli ngembuso waNkulunkulu.”—LUKHA 8:1.

SIYATSANDZA kukhuluma ngetintfo letibalulekile kitsi, futsi lesitibuka njengaletiligugu. Njengobe Jesu asho, “umlomo ukhuluma loko lokugcwele enhlitiyweni.” (Matewu 12:34.) Nasifundza loko Jesu lakukhuluma ngalesikhatsi enta umsebenti wakhe wekushumayela, singaphetsa ngekutsi uMbuso waNkulunkulu wawusihloko lesibalulekile kuye.

Uyini uMbuso waNkulunkulu? Umbuso nguhulumende loholwa yinkhosi. Ngako-ke, uMbuso waNkulunkulu nguhulumende lobekwe nguNkulunkulu. Jesu wakhuluma kakhulu ngeMbuso waNkulunkulu futsi wawenta sihloko semlayeto labeshumayela ngawo. Nobe kunjalo, Jesu akazange afundzise ngemavi kuphela. Tento takhe tafundzisa lokunyenti ngeMbuso waNkulunkulu naloko lotawukwenta.

Ngubani iNkhosi Yawo? INkhosi yeMbuso waNkulunkulu ayikakhetfwa bantfu ngendlela yekuvota. Kodvwa loMbusi ukhetfwe nguNkulunkulu lucobo lwakhe. Etimfundzisweni takhe, Jesu wakhombisa kutsi nguye lokhetfwe nguNkulunkulu kutsi abe yiNkhosi.

Jesu bekati kutsi tiphrofetho teliBhayibheli tabiketela kutsi Mesiya lotsenjisiwe utawubusa uMbuso longeke uphelelwe sikhatsi. (2 Samuweli 7:12-14; Danyela 7:13, 14; Matewu 26:63, 64) Uyakhumbula kutsi Jesu washo kutsi yena unguMesiya lotsenjisiwe. Ngalamanye emagama, Jesu abesho kutsi uyiNkhosi lebekwe nguNkulunkulu. (Johane 4:25, 26) Jesu abekhuluma liciniso nakasebentisa inkhulumo letsi “umbuso wami” ayibhekisele kuye.—Johane 18:36.

Jesu waphindze watsi kunalabanye labatawubusa naye kuloMbuso. (Lukha 22:28-30) Labo latawubusa nabo ubabita ngekutsi ‘ngumhlambi lomncane’ ngobe inombolo yabo ibaliwe. Naku lakusho kubo: “uYihlo utfokotela kona kutsi aninike umbuso.” (Lukha 12:32) Incwadzi yekugcina yeliBhayibheli ikhombisa kutsi kutawuba bantfu labangu-144 000 labatawujabulela kubusa naKhristu.—Sembulo 5:9, 10; 14:1.

Utinte kuphi loMbuso? Naku Jesu lakusho kumbusi waseRoma Philatu: “Umbuso wami awusiwo wakulelive.” (Johane 18:36) Umbuso waNkulunkulu angeke udzinge bantfu labatsite labatawusekela kute uphumelele. Jesu watsi uMbuso waNkulunkulu ‘ngumbuso welizulu.’a (Matewu 4:17; 5:3, 10, 19, 20) Ngako-ke, uMbuso waNkulunkulu nguhulumende wasezulwini.

Jesu abelindzele kubuyela ezulwini ngemuva kwekuba ahleti sikhatsi lesidze lapha emhlabeni. Ngako watsi ‘uyawulungisa indzawo’ kute labo layawubusa nabo bakwati kuba naye.—Johane 14:2, 3.

Yini uMbuso waNkulunkulu lotawuyifeza? Jesu wafundzisa tilaleli takhe kutsi tithandaze kuNkulunkulu: “Umbuso wakho awute. Intsandvo yakho ayentiwe emhlabeni, njengobe yentiwa ezulwini.” (Matewu 6:9, 10) Intsandvo yaNkulunkulu iyentiwa ezulwini nyalo. LoMbuso utawukwenta kutsi injongo yaNkulunkulu ngemhlaba iphumelele. Kute injongo yaNkulunkulu iphumelele, loMbuso utawukwenta tingucuko letinyenti lapha emhlabeni.

Yini loMbuso lotawuyenta lapha emhlabeni? Jesu wafundzisa kutsi uMbuso waNkulunkulu utawususa bonkhe bubi ngekutsi ubhubhise bonkhe bantfu labenta lokubi. (Matewu 25:31-34, 46) Loko kutawusho kuphela kwako konkhe kungetsembeki kanye nekungalungi. Jesu wafundzisa kutsi umhlaba utawugcwala bantfu “labamnene” labalungile, labanemusa, “labahlantekile enhlitiyweni” futsi labanekuthula.—Matewu 5:5-9.

Labantfu labalungile batawuhlala emhlabeni longcolile yini? Angeke! Jesu wetsembisa kutsi umhlaba utawulungiswa nasekubusa uMbuso waNkulunkulu. Indvodza leyabetselwa eceleni kwaJesu, yatsi: “Ungikhumbule, Jesu, nase ufikile ebukhosini bakho.” Jesu watsi kuyo: ‘Ngikutjela lamuhla, kutsi utakuba nami ePharadisi.’ (Lukha 23:42, 43, NW.) Nkulunkulu utawugucula lomhlaba wonkhe awente iPharadisi—ufanane nalelo lelake laba khona ensimini yase-Edeni.

Umbuso utawuphindze ubenteleni bantfu? Jesu wenta lokungetulu kwekumane nje atsembise loko uMbuso waNkulunkulu lotawukwenta, waphindze wakubonisa. Jesu welapha bantfu labanyenti, kute akhombise loko latakwenta nasekubusa uMbuso wakhe. Naku liVangeli laMatewu lelikushoko ngaJesu: “Walihamba lonkhe laseGalile, afundzisa emasinagogeni abo, ashumayela liVangeli lembuso, aphilisa bantfu kuto tonkhe tifo nasekuguleni kwabo.”—Matewu 4:23.

Jesu welapha tinhlobonhlobo tekugula. “Wavula emehlo emuntfu lowatalwa ayimphumphutse.” (Johane 9:1-7, 32, 33) Jesu welapha indvodza lebeyinesifo lesesabekako sebulephelo ngekuyibamba ngesineke. (Makho 1:40-42) Ngalesikhatsi kuletfwa kuye “indvodza lebeyisihhulu, futsi ingakhulumi nakahle” Jesu wakhombisa kutsi angakwati kwenta “labangeva beve, nalabangakhulumi bakhulume!”—Makho 7:31-37.

Inkhosi lebekwe nguNkulunkulu ingakwati ngisho nekuvusa bantfu labafile. Jesu wavusa bantfu emahlandla lamatsatfu. Wavusa indvodzana yemfelokati leyayilitinyo lekubulala, nesidzandzane lesineminyaka lengu-12, kanye nemngani wakhe Lazaro.—Lukha 7:11-15; 8:41-55; Johane 11:38-44.

Nakachaza likusasa lelijabulisako lesitalitfola ngephansi kweMbuso waNkulunkulu, naku Jesu lakubiketela ngemphrofethi Johane: “Nyalo likhaya laNkulunkulu likubantfu. Nkulunkulu utawuhlala emkhatsini wabo, bona babe bantfu bakhe, Nkulunkulu cobo lwakhe uyawuhlala nabo, abe nguNkulunkulu wabo. Uyakwesula tonkhe tinyembeti emehlweni abo, sekuyawubate kufa, nekulila, nekukhala, nebuhlungu, ngobe kwakucala sekwendlulile.” (Sembulo 1:1; 21:3, 4) Ase ucabange—umhlaba lapho kungekho khona tinyembeti telusizi, buhlungu kanye nekufa. Umthandazo lokhuluma ngentsandvo yaNkulunkulu kutsi yentiwe emhlabeni njengasezulwini, utawugcwaliseka.

Utawufika nini uMbuso waNkulunkulu? Jesu wafundzisa kutsi utawucala kubusa ngesikhatsi lesibitwa ngekutsi ‘sikhatsi sekubuya kwakhe.’ Jesu waniketa tiphrofetho letinemininingwane lekhombisa kutsi utawuwatfola nini emandla ekubusa. Lesikhatsi sitawubonakala ngetinhlupheko letitsintsa bonkhe bantfu, timphi, indlala, kutamatama kwemhlaba, tifo letingumshayabhuce kanye nekwandza kwekona. (Matewu 24:3, 7-12; Lukha 21:10, 11, NW.) Nguloku kanye nalokunye Jesu lakubiketela, lokwacala kubonakala nga-1914 ngalesikhatsi kucala Imphi yeLive yekucala. Nobe kunjalo, Jesu sewucalile kubusa njengeNkhosi. Ngekushesha nje loMbuso utawufika lana emhlabeni futsi ubangele kutsi kwenteke intsandvo yaNkulunkulu.b

Kufika kweMbuso waNkulunkulu kutawusho kutsini kuwe? Kutawuya ngekutsi uyawulalela yini umlayeto waJesu.

[Imibhalo lengentasi]