Liciniso NgeMbuso WaNkulunkulu
Jesu wafundzisa balandzeli bakhe kuthantaza: “Babe wetfu losezulwini, alingcweliswe libito lakho. UMbuso wakho awute. Intsandvo yakho ayentiwe emhlabeni njengasezulwini.” (Matewu 6:9, 10) Uyini uMbuso waNkulunkulu? Yini lotayenta? Kungani kufanele siwuthantazele?
Jesu uyiNkhosi yeMbuso waNkulunkulu.
Lukha 1:31-33: “Kufanele uyetse utsi nguJesu. Itawuba ngumuntfu lomkhulu, ibitwe ngekutsi yiNdvodzana yaLosetikwako Konkhe, futsi Jehova Nkulunkulu utayinika sihlalo sebukhosi seyise Davide, itawubusa njengeNkhosi endlini yaJakobe kute kube phakadze, neMbuso wayo ngeke uphele.”
Jesu bekashumayela kakhulu ngeMbuso waNkulunkulu.
Matewu 9:35: “Ngako Jesu wahamba kuwo onkhe emadolobha nemadolobhana, afundzisa emasinagogeni futsi ashumayela tindzaba letimnandzi letimayelana neMbuso, elapha tonkhe tinhlobo tetifo, nato tonkhe tinhlobo tekugula.”
Jesu watjela bafundzi bakhe ngesibonakaliso lebebatawubona ngaso kusondzela kweMbuso.
Matewu 24:7: “Ngobe sive siyawuvukela lesinye sive, nembuso uvukele lomunye umbuso, futsi kuyawuba khona indlala nekutamatama kwemhlaba etindzaweni letehlukahlukene.”
Bafundzi baJesu bashumayela ngeMbuso emhlabeni wonkhe.
Matewu 24:14: “Letindzaba letimnandzi teMbuso tiyawushunyayelwa emhlabeni wonkhe, kuze kube bufakazi etiveni tonkhe, bese-ke kuphela kuyefika.”