Kuvuma Tono Kuyintfo Lefunwa NguNkulunkulu Yini?

Emasontfweni lamanyenti, kuvuma tono embikwemphristi nobe umfundisi, kuchubeka kuba yincenye yelisiko lenkholo kanye nekukhonta Nkulunkulu. Nobe kunjalo, kulelive lalamuhla lelivumela yonkhe intfo, sikhona yini sidzingo sekuvuma tono, futsi kuyafaneleka yini kwenta njalo?

KUNEMIBONO lephikisanako ngalendzaba. Cabanga nganasi sibonelo, i-National Post yase-Canada ibika ngemuntfu lovumako kutsi ngisho nobe kulukhuni kutjela umuntfu ngentfo loyentile, kodvwa “kuba nemuntfu lotawukulalela athandaze nawe, futsi akutjele kutsi yini lokufanele uyente, kuyakhululana sibili.” Incwadzi letsi Bless Me, Father, for I Have Sinned, icaphuna indvodza leyasho lokwehlukile kuloko: “Kuvuma tono, kungulomunye yemikhuba yeLisontfo lelimata kuyendlula yonkhe, kwenta umuntfu ahlale akhatsateke kakhulu.” LiBhayibheli litsini ngalendzaba?

Loko Lokushiwo LiBhayibheli

EMtsetfweni Nkulunkulu lawunika sive saka-Israyeli, sitfola ticondziso leticondzile taloko lobekudzingeka kwentiwe nangabe umuntfu onile. Sibonelo saloko sikutsi ngalesikhatsi umuntfu one umnakabo nobe aphule lomunye wemitsetfo yaNkulunkulu, bekufanele ayewuvuma lesono sakhe kumphristi lobekiwe wesive semaLevi lobekatawumentela inhlawulo ngekumentela umnikelo wekutsetselelwa kwetono kuNkulunkulu.—Levithikhusi 5:1-6.

Ngemuva kwemakhulu eminyaka ngalesikhatsi umphrofethi Nathani asole iNkhosi Davide ngetono tayo, watsini Davide ngaloko? Wavuma ngekushesha: “Ngonile kuSimakadze [Jehova].” (2 Samuweli 12:13) Waphindze wathandaza, wancenga Nkulunkulu kutsi amtsetselele. Waba yini umphumela waloko? Ngemuva kwesikhatsi Davide wabhala: “Ngasivuma kuwe sono sami, angizange ngisifihle siphambuko sami. Ngatsi: ‘Ngiyawutivuma kuSimakadze tono tami.’ Wena walitsetselela licala lesono sami.”—Tihlabelelo 32:5; 51:1-4.

Kuvuma tono bekuhlala kuyintfo lefunekako kuNkulunkulu ebandleni lebuKhristu langelikhulu lekucala leNkhatsi yetfu Levamile. Jakobe umnakabo Jesu ngemtali munye futsi lobekangulomunye wemadvodza laholako ebandleni laseJerusalema, wancenga emaKhristu labekanye nawo: “Ngako-ke vumani tono tenu lomunye kulomunye, nithandazelane, kuze nitewuphiliswa.” (Jakobe 5:16) Ngutiphi-ke tono emaKhristu lokulindzeleke kutsi ativume, futsi kufanele ativume kubani?

Ngutiphi Tono Lokufanele Tivunywe?

Onkhe emalanga, tsine bantfu labanesono sihlale senta ngekungacabangi nobe sisebentise lulwimi lwetfu kabi bese sivisana buhlungu. (Roma 3:23) Loko kusho kutsi kufanele yini sibike nobe ngabe ngumaphi emaphutsa kumuntfu lotsite losegunyeni?

Nanobe Nkulunkulu atsi tonkhe tono timbi, kodvwa ngemusa uyabucabangela butsakatsaka betfu lobubangelwa sono lesasitfola njengelifa. Umhlabeli watsi: “Kube wena, Simakadze [Jehova] bewusibalela tono tetfu, ngubani labengaphunyula angalahlwa? Kodvwa wena uyasitsetselela kuze sitewuhlala ngekukwesaba.” (Tihlabelelo 130:3, 4) Ngako-ke, yini lokufanele siyente nangabe senta emaphutsa nobe sona labanye singakacondzi? Khumbula kutsi umthandazo losibonelo Jesu lawufundzisa balandzele bakhe wawufaka ekhatsi nasi sicelo: “Sitsetselele netono tetfu, njengobe natsi sibatsetselela labo labasonako.” (Lukha 11:4) Nkulunkulu utawusinika intsetselelo nangabe siyicela ngelibito laJesu.—Johane 14:13, 14.

Caphela kutsi Jesu watsi loko kungenteka nangabe natsi sibatsetselela “labo labasonako.” Umphostoli Pawula wakhumbuta labo labekakholwa nabo: “Phatsanani ngebumnene nihawukelane, nitsetselelane, njengobe naNkulunkulu wanitsetselela ngaKhristu.” (Efesu 4:32) Nangabe sibatsetselela labanye emaphutsa abo, sitawuba netizatfu letinhle tekulindzela kutsi naNkulunkulu asitsetselele emaphutsa etfu.

Kutsiwani-ke ngetono letinkhulu letinjengekweba, kucala emanga engemabomu, kutiphatsa kabi ngekwelicasi, kudzakwa kanye nalokunye? Nobe ngubani lowenta tono letinjalo wephula umtsetfo waNkulunkulu futsi wonela Nkulunkulu. Yini lokufanele ayente?

Tono Kufanele Tivunywe Kubani?

Nkulunkulu akazange anike bantfu ligunya lekutsetselela tono letentiwe kuye; nguye kuphela longatitsetselela. LiBhayibheli lisitjela ngalokucacile: “Kodvwa nasitivuma tono tetfu, Nkulunkulu wetsembekile, futsi ulungile, utasitsetselela tono tetfu abuye asihlambulule kuko konkhe kungalungi.” (1 Johane 1:9) Nobe kunjalo, ngubani lokufanele sivume kuye tono tetfu?

Njengobe lositsetselela tono kunguNkulunkulu, nguye-ke lokufanele sivume tono tetfu kuye. Njengobe sifundzile, nguloko kanye lokwentiwa nguDavide. Yini lokufanele uyente kute utsetselelwe tono? LiBhayibheli liyasitjela: “Ngako-ke, phendvukani, nibuyele kuNkulunkulu, kuze esule licala letono tenu.” (Imisebenti 3:19) Kutsetselelwa kwemuntfu, akuyi nje ngekutsi uyabona kutsi wonile bese uyasivuma leso sono, kodvwa kuphindze kuye ngekutsi utimisele yini kusishiya. Kwenta loko kuvamise kuba matima. Kodvwa singalutfola lusito.

Ase uphindze ucabange ngemavi emfundzi longuJakobe lesikhulume ngaye ekucaleni: “Ngako-ke vumani tono tenu lomunye kulomunye, nithandazelane, kuze nitewuphiliswa.” Ngemuva kwekusho lamavi, Jakobe wachubeka watsi: “Kuncusa kwemuntfu lolungile kunemandla kakhulu.” (Jakobe 5:16) ‘Umuntfu lolungile’ angaba ngulomunye ‘webabonisi belibandla,’ Jakobe lakhuluma ngabo evisini 14. Ebandleni lebuKhristu, ‘kunebabonisi,’ nobe labadzala belibandla lababekwe ngenjongo yekutsi basite labo labafuna kutsetselelwa nguNkulunkulu. Kute kulabo “babonisi” longesula tono letentiwe ngulotsite, ngobe kute umuntfu loneligunya lekutsetselela lomunye ngebubi lobentiwe kuNkulunkulu.a Nobe kunjalo, bakulungele kusola nekulungisa umuntfu lowente sono, bamsite kute acondze bukhulu besono lasentile nesidzingo sekutsi aphendvuke.—Galathiya 6:1.

Kungani Kufanele Sivume Tono?

Nobe lesono sisikhulu nobe sisincane, loyo muntfu losentile usuke alimete budlelwane bakhe nalabanye kanye naNkulunkulu. Kungako angativa akhatsatekile futsi nemoya wakhe ute kuphumula. Loko kubangelwa ngunembeza lesawunikwa nguMdali wetfu. (Roma 2:14, 15) Yini lokufanele siyente?

Nasiphindze sibuka incwadzi yaJakobe, sitfola nankha emavi lakhutsatako: “Ukhona yini logulako [ngakamoya] emkhatsini wenu? Akabite babonisi belibandla, bamthandazele ngekumgcobisa ngemafutsa egameni leNkhosi [Jehova]. Umthandazo wekukholwa uyawumphilisa logulako, iNkhosi imvuse, nome entile tono uyawutsetselelwa tona.”—Jakobe 5:14, 15.

Nalapha futsi, babonisi nobe labadzala belibandla, kutsiwa banakekela tidzingo temhlambi. Njani? Hhayi nje kuphela ngekulalela lotsite avuma sono. Kodvwa ngesizatfu sekutsi loku kusuke kufaka ekhatsi kugula ngakamoya, kunalokutsite lokufanele kwentiwe kute ‘logulako aphile.’ Kunetintfo letimbili Jakobe lativeta lokufanele tentiwe.

Kwekucala, kukhulunywa “ngekumgcobisa ngemafutsa.” Loku kubhekisela emandleni eliVi laNkulunkulu ekwelapha. Umphostoli Pawula wachaza kutsi “livi laNkulunkulu liphilile, linemandla . . . [lehlulela] imicabango netifiso tenhlitiyo.” (Hebheru 4:12) Ngekulisebentisa ngelikhono liBhayibheli, labadzala belibandla bangasita labo labagulako ngakamoya kutsi babone imbangela yenkinga lababhekene nayo futsi batsatse tinyatselo letifanele kute bayilungise embikwaNkulunkulu.

Kuphindze kukhulunywe ‘ngemthandazo wekukholwa.’ Nanobe imithandazo yalabadzala belibandla ingeke ikushintje kulunga kwaNkulunkulu, kodvwa ibalulekile kuye, ngobe unenkhaphunkhaphu yekutsetselela tono ngesisekelo semhlatjelo waKhristu wesihlengo. (1 Johane 2:2) Nkulunkulu ukulungele kusita nobe ngubani lowonile kuphela nje nangabe aphendvuka futsi ‘enta imisebenti lekhombisa kuphendvuka.’—Imisebenti 26:20.

Sizatfu lesihamba embili sekuvuma sono losentile kulomunye umuntfu nobe kuNkulunkulu, sikutsi utfole kwemukelwa nguNkulunkulu futsi ube nebudlelwane lobuhle naye. Jesu Khristu watsi kute sikhonte Nkulunkulu nganembeza lokahle, kufanele sicatulule nobe ngabe ngukuphi kungevani lesinako nalabanye kucala. (Matewu 5:23, 24) Taga 28:13 titsi: “Umuntfu lofihla tono takhe angeke aphumelele; kodvwa lotivumako atishiye uyawutfola umusa.” Nasititfoba kuNkulunkulu Jehova futsi sicela intsetselelo, utawujabula kakhulu ngatsi futsi asiphakamise ngesikhatsi lesifanele.—1 Phetro 5:6.

[Umbhalo longentansi]

[Emavi lahambisana nesitfombe ekhasini 30]

Nkulunkulu angeke awanake emaphutsa etfu nangabe sita kuye sicele intsetselelo ngelibito laJesu

[Sitfombe ekhasini 31]

Sizatfu lesihamba embili sekuvuma sono lesisentile, sikutsi sibe nebudlelwane lobuhle naNkulunkulu