SIHLOKO LESIFUNDVWAKO 7
INGOMA 15 Dvumisani Litibulo LaJehova!
Kucolela KwaJehova—Kusho Kutsini Kuwe?
“Wena utsetselelana mbamba.”—HLA. 130:4.
LOKUTAWUCOCWA NGAKO
Sitawucoca ngaleminye imifanekiso leseBhayibhelini, lechaza indlela lemangalisako Jehova lasicolela ngayo. Lesihloko sitasisita kutsi sikhulise indlela lesibonga ngayo ngekucolela kwaJehova.
1. Yini leyenta ididane indlela bantfu labacolelana ngayo?
“NGIYAKUCOLELA.” Amnandzi lamagama, ikakhulukati nangabe ushito intfo nobe wente lokutsite lokuvise buhlungu lomunye umuntfu! Kodvwa asho kutsini vele emavi latsi “ngiyakucolela”? Lomuntfu lokuvise buhlungu usuke atsi bungani benu butawuchubeka njengobe bebunjalo yini? Nobe usuke atsi akafuni kuphindze akhulume ngalendzaba? Ngalokuvamile, iyadidana indlela tsine bantfu lesicolelana ngayo.
2. Indlela Jehova lacolela ngayo ichazwe njani emiBhalweni? (Buka nembhalo longentasi.)
2 Indlela Jehova lasicolela ngayo tsine bantfu lesinesono, yehluke kakhulu endleleni tsine lesicolelana ngayo. Kute ngisho munye longacolela ngendlela Jehova lacolela ngayo. Umhlabeleli washo naku ngaJehova: “Wena utsetselelana mbamba, kuze bantfu batokuhlonipha.”a (Hla. 130:4) Jehova “utsetselelana” mbamba. Nguye losikhombisako kutsi kusho kutsini vele kucolela. Kuletinye timo, babhali beliBhayibheli basebentisa ligama lesiHebheru lelisho kucolela lokungenteki lisentjentiswe nakuchazwa indlela bantfu labacolelana ngayo.
3. Yehluke njani indlela Jehova lasicolela ngayo? (Isaya 55:6, 7)
3 Jehova nakacolela lotsite, uyasisula sono saloyo muntfu. Bungani lebebonakele buphindze bubuyele bube sesimeni lesikahle. Jehova usicolela ngalokuphelele.—Fundza Isaya 55:6, 7.
4. Jehova usisita njani sicondze kutsi kusho kutsini vele kucolela?
4 Njengobe sibantfu labanesono, singayicondza njani kahle indlela Jehova lacolela ngayo njengobe yehlukile endleleni tsine bantfu lesicolela ngayo? Jehova usebentisa imifanekiso kuze achaze indlela lacolela ngayo. Kulesihloko sitawucoca ngaleminye yayo. Itasikhombisa kutsi Jehova usisusa njani sono, futsi ngesikhatsi lesifanako alungise bungani lebebonakele ngenca yalesono. Njengobe sitawube sicoca ngalemifanekiso, itawukhula indlela lesimtsandza ngayo Babe wetfu lokhombisa ngetindlela letinyenti kutsi uyacolela.
JEHOVA USUSA SONO
5. Yini leyentekako Jehova nakacolela tono tetfu?
5 EBhayibhelini, tono tivame kufananiswa nemtfwalo losindzako. INkhosi Davide yatichaza nganayi indlela tono tayo, yatsi: “Tono tami tiyangengama; angisakhoni kutetfwala, setifana nemtfwalo lowesindzako.” (Hla. 38:4) Kodvwa Jehova uyaticolela tono tebantfu labaphendvukako. (Hla. 25:18; 32:5) Ligama lesiHebheru lelihunyushwe ngekutsi “kucolela” lisho “kuphakamisa” nobe “kwetfwala.” Singamcabanga Jehova afana nendvodza lenemandla, lephakamisa umtfwalo lobangelwe sono emahlombe etfu futsi iwususe.
‘Wasitsetselela’ (Hla. 32:5)
6. Jehova utikhweshisa kangakanani tono tetfu kitsi?
6 Kunalomunye umfanekiso lokhombisa kutsi Jehova utikhweshisa kangakanani tono tetfu kitsi. Tihlabelelo 103:12 titsi: “Njengobe imphumalanga ikhashane kakhulu nenshonalanga, naye utikhweshise kangako-ke tono tetfu kitsi.” Imphumalanga ikhashane kakhulu nenshonalanga. Letindzawo letimbili atiyuze tihlangane. Ngalamanye emagama, Jehova utikhweshisa kakhulu tono tetfu. Loko kuyasicinisekisa kutsi usicolela mbamba!
“Njengobe imphumalanga ikhashane kakhulu nenshonalanga” (Hla. 103:12)
7. LiBhayibheli likuchaza njani loko Jehova lakwentako ngetono tetfu? (Mikha 7:18, 19)
7 Nanobe Jehova atikhweshisela khashane tono tetfu kitsi, kodvwa uchubeka abambelele kuto yini? Cha. Naku iNkhosi Hezekiya leyakusho ngaJehova: “Tonkhe tono tami, utijike ngemuva kwakho.” Umbhalo longentasi utsi, “Utisuse tonkhe tono tami emehlweni akho.” (Isa. 38:9, 17; umbhalo longentasi) Lomfanekiso ukhombisa kutsi Jehova utsatsa tono talabo labaphendvukile futsi atilahle tingasabonakali. Lendzaba ingaphindze ibekwe ngekutsi: “Wente [tono tami] kwaba ngatsi atikase taba khona.” LiBhayibheli liphindze lisebentise lomunye umfanekiso kuze ligcizelele leliphuzu, lotfolakala kuMikha 7:18, 19. (Fundza.) Lamavesi atsi tono tetfu utijike ekujuleni kwelwandle. Kadzeni, bekungeke kwenteke kutsi umuntfu alandze intfo lejikwe ekujuleni kwelwandle.
“Tonkhe tono tami, utijike ngemuva kwakho” (Isa. 38:17)
“Tonkhe tono tetfu utatijika ekujuleni kwelwandle” (Mik. 7:19)
8. Yini lesiyifundzile kuze kube ngunyalo?
8 Ngalemifanekiso, sesifundzile kutsi Jehova nakasicolela usetfula umtfwalo losono. Davide bekacinisile nakatsi: “Bayajabula labo labatsetselelwe tento tabo letimbi, nalabo labatsetselelwe tono tabo; uyajabula umuntfu Jehova langeke aze ambalele sono sakhe.” (Rom. 4:7, 8) Loko kucolela mbamba!
JEHOVA USULA SONO
9. Ngumiphi imifanekiso Jehova layisebentisako kuze achaze lizinga lacolela ngalo?
9 Jehova usebentisa leminye imifanekiso kuze asisite sibone kutsi usula tono talabo labaphendvukile asebentisa inhlawulo. Ngemcondvo longumfanekiso, kutsiwa Jehova ugeza tono nobe atiwashe. Loku kwenta kutsi soni sigcine sihlobile. (Hla. 51:7; Isa. 4:4; Jer. 33:8) Jehova uyasichazela kutsi yini leyentekako ekugcineni, utsi: “Nome ngabe tono tenu tibovu njengengati, titakwentiwa tibe mhlophe njengelichwa; nome ngabe tono tenu tinjengendvwangu lebovu tju, titawuba mhlophe njengeboya.” (Isa. 1:18) Kulukhuni kakhulu kususa libala lelibovu emphahleni. Nanobe kunjalo, Jehova asebentisa lomfanekiso uyasicinisekisa kutsi angatigezisisa tono tetfu tize tingasabonakali.
“Nome ngabe tono tenu tibovu njengengati, titakwentiwa tibe mhlophe njengelichwa” (Isa. 1:18)
10. Ngumuphi lomunye umfanekiso Jehova lawusebentisako kuze achaze lizinga lacolela ngalo?
10 Njengobe kuvetiwe esihlokweni lesendlulile, tono tingaphindze tifananiswe ‘netikweleti.’ (Mat. 6:12; Luk. 11:4) Njalo nasona kuJehova kuba ngatsi singena shi esikweletini. Simkweleta kakhulu Jehova! Kodvwa nakasicolela kuba ngatsi uyasesula lesikweleti lebekutawufanele sisibhadale. Akasho kutsi sitibhadalele tono lasaticolele. Lomfanekiso uyichaza kahle injabulo lesiba nayo Jehova nakasicolela!
“Usitsetselele tono tetfu” (Mat. 6:12)
11. Lisho kutsini liBhayibheli nalitsi tono tetfu ‘tesuliwe’? (Imisebenti 3:19)
11 Jehova akagcini nje ngekucolela tono tetfu; uyatesula. (Fundza Imisebenti 3:19.) Asesitsi umuntfu lomkweleta imali ubhala dvwi ngetulu kwalemali lomkweleta yona. Kodvwa tinombolo letingephansi solo tiyabonakala. Kepha kusula intfo kungulenye indzaba. Kuze siwucondze lomfanekiso kufanele sikhumbule kutsi luhlobo lwe-ink lebelusetjentiswa kadzeni bekumelula kulusula. Umuntfu bekangasebentisa intfo lemanti kuze asule loko lokubhaliwe. Ngako nangabe sikweleti ‘sesuliwe,’ besingaphindzi sibe khona. Bantfu bebangeke bakhone kukubona loko bekubhaliwe, bekubese kuyacisha. Kusijabulisa kakhulu kwati kutsi Jehova akagcini nje ngekusicolela tono tetfu kodvwa uphindze atisule ngalokuphelele!—Hla. 51:9.
“Khona tono tenu titowesulwa” (Imis. 3:19)
12. Yini lesiyifundzako kulomfanekiso welifu lelikhulu?
12 Jehova usebentisa lomunye umfanekiso lophose ufane kuze achaze indlela lasula ngayo tono tetfu. Utsi: “Ngiyakwesula tiphambeko takho kube shengatsi ngitesula ngelifu, netono takho ngiyawutesula kube shengatsi ngitesula ngelifu lelikhulu.” (Isa. 44:22) Jehova nakacolela kuba ngatsi usebentisa lifu kuze ambhonye tono tetfu khona tingetawubonakala.
“Ngiyakwesula tiphambeko takho kube shengatsi ngitesula ngelifu” (Isa. 44:22)
13. Sitiva njani Jehova nakasicolela tono tetfu?
13 Loku kusho kutsini kitsi? Jehova nakasicolela tono tetfu, akukafaneli sichubeke sitiva sinelicala kuphila kwetfu konkhe. Tono tetfu tesulwa ngalokuphelele ngengati yaJesu Khristu. Jehova nakasicolela kuba ngatsi asikake sasenta lesono. Nguleyo-ke indlela Jehova lasicolela ngayo nasiphendvuka etonweni tetfu.
JEHOVA UPHINDZE ASEMUKELE SIBE BANGANI BAKHE
Indlela Babe wetfu wasezulwini lasicolela ngayo, yenta kutsi sibe nebuhlobo lobuhle naye (Buka sigaba 14)
14. Yini lesenta simetsembe Jehova nakatsi uyasicolela? (Buka netitfombe.)
14 Kucolela mbamba kwaJehova kusenta sibe nebuhlobo lobuhle naye. Kusisita kutsi singancotjwa kutiva sinelicala. Akudzingeki kutsi sihlale sesaba kutsi ngandlela tsite Jehova usasitfukutselele futsi ufuna litfuba lekusijezisa. Loko angeke kwenteke. Yini lengasenta simetsembe Jehova nakatsi uyasicolela? Umphrofethi Jeremiya wacaphuna emavi aJehova latsi: “Ngitabatsetselela emaphutsa abo, nesono sabo angeke ngiphindze ngisikhumbule.” (Jer. 31:34) Akhuluma ngalamavi, umphostoli Pawula wasebentisa emagama lafanako latsi: “Ngeke ngiphindze ngitikhumbule tono tabo.” (Heb. 8:12) Kodvwa loko kusho kutsini mbambambamba?
‘Sono sabo angeke ngiphindze ngisikhumbule’ (Jer. 31:34)
15. Kusho kutsini kutsi Jehova akasatikhumbuli tono tetfu?
15 EBhayibhelini ligama lelitsi kukhumbula alihlali lisho umuntfu lokhumbula lokutsite nobe lohlala acabanga intfo letsite. Kunaloko lingafaka ekhatsi kwenta lokutsite. Sigebengu lesabetselwa naJesu sacela satsi: “Jesu, ungikhumbule nawufika eMbusweni wakho.” (Luk. 23:42, 43) Akusiko nje kutsi besicela Jesu acabange ngaso ngaleso sikhatsi. Imphendvulo yaJesu ikhombisa kutsi bekatawenta lokutsite, bekatasivusa lesigebengu. Ngako Jehova nakatsi akasatikhumbuli tono tetfu, usho kutsi kute latawukwenta ngenca yato. Angeke aze asijezise esikhatsini lesitako ngenca yetono lasaticolele.
16. LiBhayibheli lisifananisa nani?
16 Jehova nakasicolela sitiva sikhululekile. LiBhayibheli liphindze lisebentise lomunye umfanekiso kuze sikucondze loku. Ngenca yekutsi sinesono, sifananiswa ‘netigcili tesono.’ Kodvwa ngenca yekutsi Jehova uyasicolela sesifana netigcili ‘letikhululiwe esonweni.’ (Rom. 6:17, 18; Semb. 1:5) Kucolela kwaJehova kusenta sijabule kakhulu njengobe sikhululiwe ekubeni tigcila.
“Nakhululwa esonweni” (Rom. 6:18)
17. Kucolelwa kusenta njani siphiliswe? (Isaya 53:5)
17 Fundza Isaya 53:5. Umfanekiso wekugcina usifananisa nebantfu labanesifo lesibulalako. Ngenca yekutsi Jehova ulungise inhlawulo yeNdvodzana yakhe, sesiphilisiwe ngendlela lengumfanekiso. (1 Phet. 2:24) Nasona, silimata buhlobo betfu naJehova. Kodvwa ngenca yenhlawulo angasicolela futsi sibe nebuhlobo lobuhle naye. Njengobe umuntfu lowelashwe ekuguleni lokumatima ajabula, natsi siyajabula ngobe Jehova sewubulungisile buhlobo betfu naye futsi uyasemukela.
“Saphiliswa ngenca yemanceba akhe” (Isa. 53:5)
KUCOLELA KWAJEHOVA KUSHO KUTSINI KITSI?
18. Yini lesiyifundzile kulemifanekiso mayelana nekucolela kwaJehova? (Buka nelibhokisi lelitsi “Indlela Jehova Lasicolela Ngayo.”)
18 Yini lesiyifundzile mayelana nekucolela kwaJehova kulemifanekiso leseBhayibhelini? Jehova usicolela ngalokuphelele futsi akaphindzi akukhumbule. Loko kwenta kutsi sibe nebuhlobo lobuhle naBabe wetfu wasezulwini. Nanobe kunjalo, siyati kutsi kucolela kwaJehova kusipho lasinika sona ngobe asitsandza futsi anemusa lomkhulu, hhayi kutsi siyakufanela.—Rom. 3:24.
19. (a) Yini lokufanele sibonge ngayo? (KubaseRoma 4:8) (b) Sitawucoca ngani esihlokweni lesilandzelako?
19 Fundza KubaseRoma 4:8. Ngamunye wetfu kufanele abonge kakhulu ngekutsi Jehova unguNkulunkulu ‘lotsetselelana mbamba’! (Hla. 130:4) Nanobe kunjalo, kunalokutsite lokubalulekile lokufanele sikwente. Jesu wakuchaza nakatsi: “Nangabe ningabatsetseleli labanye tono tabo, naBabe wenu losezulwini ngeke anitsetselele tono tenu.” (Mat. 6:14, 15) Ngako kusebaleni kutsi kubalulekile kutsi silingise Jehova futsi sitsetselele labanye. Singakwenta njani loko? Sihloko lesilandzelako sitasikhombisa kutsi singakwenta njani loko.
INGOMA 46 Siyabonga Jehova
a Umbhalo wesiHebheru usebentisa ligama lelitsi “kutsetselela,” leliveta kutsi loku kutsetselela mbamba nanobe tikhona naletinye tindlela tekutsetselela. Emahumusho lamanyenti eliBhayibheli akawuveti lomehluko lobalulekile, kodvwa Lihumusho Lemhlaba Lomusha LemiBhalo Lengcwele liyawuveta, lokwenta kutsi lihumushe Tihlabelelo 130:4 ngendlela leyehlukile.