Funani Kucala ‘Kulunga Kwakhe’

“Kodvwa funani kucala umbuso waNkulunkulu kanye nekulunga kwakhe, khona tonkhe letintfo titakwengetelwa kini.”—MAT. 6:33.

1, 2. Kuyini kulunga kwaNkulunkulu futsi kusekelwe kuphi?

“KODVWA funani kucala umbuso.” (Mat. 6:33) Lenkhulumo leyashiwo nguJesu Khristu eNshumayelweni yakhe yaseNtsabeni, bayati kamhlophe boFakazi BaJehova. Senta konkhe lokusemandleni etfu kute kutsi kuto tonkhe tingoni tekuphila kwetfu sikhombise kutsi siyawutsandza futsi setsembekile eMbusweni waNkulunkulu. Kufanele siphindze sicabangisise ngencenye yesibili yalomusho letsi “nekulunga kwakhe.” Kuyini kulunga kwaNkulunkulu, futsi kusho kutsini kukufuna kucala?

² Ngelulwimi lwekucala, ligama lelihambisana “nekulunga” lingahunyushwa ngekutsi “kwehlulela ngebucotfo.” Ngako-ke, kulunga kwaNkulunkulu, kuba cotfo kwakhe emitsetfweni yakhe nasetimfanelweni takhe. NjengeMdali, Jehova uneligunya lekushaya imitsetfo ngetintfo letimbi kanye naletinhle, tintfo letilungile naletingakalungi. (Semb. 4:11) Kulunga kwaNkulunkulu akusiyo imitsetfo lelukhuni leluhidze. Kunaloko kusekelwe ebuntfwini bakhe kanye nemfanelo yakhe legcamile lekwahlulela ngebucotfo, lokuhambisana nelutsandvo lwakhe, kuhlakanipha kanye nemandla akhe. Kulunga kwaNkulunkulu kuhlobene nentsandvo yakhe kanye nenhloso yakhe. Kufaka ekhatsi loko lakugadze kutsi kwentiwe ngulabo labamkhontako.

3. (a) Kusho kutsini kufuna kucala kulunga kwaNkulunkulu? (b) Kungani kufanele sibambelele emitsetfweni yaJehova?

³ Kusho kutsini kufuna kucala kulunga kwaNkulunkulu? Kusho kwenta intsandvo yaNkulunkulu kute umjabulise. Kufaka ekhatsi kuwa sivuka setama kuphila ngemitsetfo yakhe, nekunaka timfanelo takhe letite emaphutsa hhayi ngekucabanga kwetfu. (Fundza Roma 12:2.) Buhlobo betfu naJehova busekelwe ekuphileni kwetfu ngalendlela. Akusho kugcina imitsetfo yaNkulunkulu ngobe sesaba kutsi utasijezisa. Kunaloko, lutsandvo lwetfu ngaNkulunkulu lusibangela kutsi sente konkhe lokusemandleni kute silalele imitsetfo yakhe, singatenteli yetfu. Kuyasikhanyela kutsi loku nguko kanye lokufanele sikwente futsi lena ngiyo indlela lesadalelwa kutsi siphile ngayo. NjengaJesu Khristu, iNkhosi yeMbuso waNkulunkulu, kufanele sikutsandze kulunga.—Heb. 1:8, 9.

4. Kungani kubaluleke kangaka kufuna kulunga kwaNkulunkulu?

⁴ Kubaluleke kangakanani kufuna kulunga kwaJehova? Ase ucabange nganaku: Luhlolo lekucala ngca lolwenteka ensimini yase-Edeni, lwalusime ekutseni bo-Adamu na-Eva bayakwemukela yini kutsi Jehova kumfanele kusishayela imitsetfo nobe cha. (Gen. 2:17; 3:5) Kwehluleka kwabo kwasiletsela kuhlupheka lokukhulu kanye nekufa lokutse citsi saka, njengobe sisitukulwane sabo. (Rom. 5:12) Ngakulolunye luhlangotsi, liVi laNkulunkulu litsi: “Umuntfu lowetama kutiphatsa ngekulunga nangekwetsembeka uyawuphila imphilo lehloniphekile.” (Taga 21:21) Kuliciniso kutsi kufuna kulunga kwaNkulunkulu kuphumela ebuhlotjeni lobuhle naJehova nalobuholela ensindzisweni yetfu.—Rom. 3:23, 24.

Ingoti Yekutibona Uncono Kunalabanye

5. Nguyiphi ingoti lokufanele siyibalekele?

⁵ Encwadzini layibhalela emaKhristu aseRoma, umphostoli Pawula wagcamisa ingoti lokufanele siyibalekele nangabe sifuna kuphumelela ekufuneni kucala kulunga kwaNkulunkulu. Akhuluma ngemaJuda akubo, Pawula watsi kuwo: “Ngiyabafakazela kutsi banenshisekelo lenkhulu kuNkulunkulu; kodvwa ayikho ekulatini liciniso. Ngobe ngekungakwati kahle kulunga lokuvela kuNkulunkulu, bafuna kutimisela lokungekwabo kulunga, abazange batinikele ngekutfobeka ekulungeni kwaNkulunkulu.” (Rom. 10:2, 3) Inchazelo yaPawula kulendzaba ibonisa kutsi letikhonti bekungatikhanyeli kahle kulunga kwaNkulunkulu. Bebetama kutisungulela kulunga ngendlela labebacabanga ngayo.a

6. Ngusiphi simo sengcondvo lokufanele sisigweme, futsi kungani kufanele sente njalo?

⁶ Lolunye lugibe lesingawela kulo kucabanga kutsi umsebenti lesiwentako wekukhonta Nkulunkulu ngumncintiswano, futsi sifune kuticatsanisa nalabanye. Loko kungasibangela kutsi sitishaye sifuba siphindze sitibone sincono ngesizatfu semakhono lesinawo. Nangabe besingenta njalo, loko bekuyokhombisa kutsi sesikukhohliwe kulunga kwaJehova. (Gal. 6:3, 4) Sisusa lesihle sekwenta lokulungile, sikutsi siyamtsandza Jehova. Nobe ngabe ngimiphi imetamo yekutenta labancono kunalabanye iphambene nekutsi siyamtsandza yena.—Fundza Lukha 16:15.

7. Wayilungisa njani Jesu inkinga yekutibona uncono kunalabanye?

⁷ Jesu bekakhatsatekile ngalabo “labetsemba kulunga kwabo bese bababukela phansi labanye bantfu.” Walungisa lenkinga yekutibona sincono kunalabanye ngekutsi alandzise nangu umfanekiso: “Emadvodza lamabili enyukela ethempelini kuyawuthandaza, lomunye abengumFarisi, lomunye angumtselisi. UmFarisi wakhwesha wema yedvwa wathandaza watsi: ‘Ngiyakubonga, Nkulunkulu, kutsi mine angifanani nalabanye bantfu labatigebengu, nalabangakalungi, netiphingi, nanjengalomtselisi. Ngizila kudla emalanga lamabili ngeliviki ngikunika kwelishumi kwako konkhe lengikwemukelako.’ “Kodvwa umtselisi eme khashane akazange abhekise ngisho nebuso bakhe ezulwini, kepha ngekutisola wathandaza watsi: ‘Nkulunkulu, ngihawukele mine soni!’” Jesu waphetsa lomfanekiso ngekutsi atsi: “Nginitjela kutsi lendvodza lengumtselisi yabuyela ekhaya seyemukelwe nguNkulunkulu kutsi ilungile kunalona lomunye, ngobe phela wonkhe umuntfu lotiphakamisako, uyawutfotjiswa, wonkhe lotitfobako, uyawuphakanyiswa.”—Luk. 18:9-14.

Lenye Ingoti Yekuba ‘Ngumuntfu Lolunge Kakhulu’

8, 9. Kusho kutsini ‘kulunga kakhulu,’ futsi kungasiholela kutsi senteni?

⁸ Lenye ingoti lokufanele siyibalekele ichazwe kuMshumayeli 7:16: “Ungatenti umuntfu lolunge kakhulu, futsi ungabi ngulohlakaniphe kunabo bonkhe; empeleni utibulalelani nje?” Lombhali weliBhayibheli lophefumulelwe uyachubeka asichazela njengobe kuvetiwe evesini 20 kutsi kungani kufanele singabi nembono lonjalo: “Kute nome munye umuntfu lolungile emhlabeni lowenta lokuhle kuphela, kubete lakonako.” Umuntfu “lolunge kakhulu” utibekela imitsetfo yakhe yekulunga futsi ehlulele labanye ngayo. Kodvwa akaboni kutsi ngekwenta njalo, kwenta aphakamise imitsetfo yakhe ayente ibe ngetulu kuneyaNkulunkulu, futsi ngekwenta njalo abe atikhombisa kutsi akakalungi emehlweni aNkulunkulu.

⁹ ‘Kulunga kakhulu’ kungasenta singabate indlela Jehova latilungisa ngayo tinkinga. Kufanele sikhumbule kutsi nasingabata tincumo taJehova letilungile, ecinisweni sisuke sibona kutsi imitsetfo yetfu ilunge kakhulu kwengca yaJehova. Kuba shengatsi siyamlinga Jehova futsi simehlulela ngemitsetfo yetfu kutsi ulungile nobe akalungi. Kodvwa nguJehova kuphela loneligunya lekubeka imitsetfo yekulunga hhayi tsine.—Rom. 14:10.

10. Njengasesimeni saJobe, yini lengasenta kutsi sehlulele Nkulunkulu?

¹⁰ Kute umuntfu lofuna kwehlulela Nkulunkulu ngemabomu, kodvwa njengebantfu labanesono siyakwenta loko. Loko kungenteka melula nje nangabe sibona lokutsite lesicabanga kutsi akukalungi nobe nangabe sibhekene netinkinga. Ngisho nendvodza letsembekile, Jobe, yalenta lelo phutsa. Jobe bekatiwa njengendvodza ‘lemsulwa, lelungile, futsi leyesaba Nkulunkulu, nalebalekela konkhe lokubi.’ (Jobe 1:1) Kodvwa wabhekana netinkinga letinyenti labekatibuka njengaletingakalungi. Loku kwamenta watsi ‘umsulwa, kwangete kwasho Nkulunkulu.’ (Jobe 32:1, 2) Kwadzingeka kutsi ayishintje indlela lacabanga ngayo. Natsi kufanele singamangali nangabe sititfola sisesimeni lesifanana naleso. Nangabe loko kwenteka, yini lengasisita kute silungise indlela lesicabanga ngayo?

Angeke Ngaso Sonkhe Sikhatsi Siwati Onkhe Emaciniso Endzaba

11, 12. (a) Nasibona shengatsi lokutsite akukalungi, yini lokufanele siyikhumbule? (b) Kungani lotsite angacabanga kutsi umfanekiso waJesu wetisebenti letisebenta esivinini unekungalungi?

¹¹ Intfo yekucala lokufanele siyikhumbule kutsi angeke ngaso sonkhe sikhatsi siwati onkhe emaciniso endzaba. Loku kwenteka nakuJobe. Abengati lutfo ngemhlangano lobewusezulwini wetingilosi taNkulunkulu ngalesikhatsi Sathane akhuluma emanga ngaye. (Jobe 1:7-12; 2:1-6) Jobe abengati kutsi tinkinga takhe betibangelwe nguSathane. Ecinisweni angeke siciniseke nekutsi Jobe bekati kutsi Sathane ungubani. Wasola Nkulunkulu ngetinkinga labekabhekene nato. Ngako-ke, kumelula kufika esiphetfweni lesingakalungi nangabe singawati onkhe emaciniso endzaba.

¹² Ase ucabange ngesibonelo semfanekiso waJesu lokhuluma ngetisebenti letisebenta esivinini. (Fundza Matewu 20:8-16.) Kulomfanekiso, Jesu ukhuluma ngemnikati wesivini loholela tonkhe tisebenti takhe imali lefananako, nanobe letinye tisebente lilanga lonkhe kodvwa letinye tisebente li-awa linye nje-vo. Utiva njani wena ngaleyo ndzaba? Loku kubonakala kulungile yini? Mhlawumbe utivela buhlungu leto letisebente lilanga lonkhe kushisa. Nakanjani tona kufanele tiholelwe imali lenyenti. Ucabanga ngaloku lokwentekile, lomnikati wesivini umbuka njengemuntfu lote lutsandvo futsi longakalungi. Ngisho nendlela latiphendvula ngayo letisebenti letikhononako, ingabonakala shengatsi ulisebentisa kabi ligunya lakhe. Kodvwa siyawati yini onkhe emaciniso alendzaba?

13. Ngumuphi lomunye umbono lesingawucabangela mayelana nemfanekiso waJesu wetisebenti letisebenta esivinini?

¹³ Ase sichaze lomfanekiso ngalenye indlela. Asingabati kutsi lomnikati wesivini bekati kutsi letisebenti kufanele tondle imindeni yato. Ngesikhatsi saJesu, tisebenti tasemasimini betiholelwa imali yemsebenti letiwente ngalelo langa. Imindeni yato beyetsembele kulomholo welilanga ngalinye. Unaloko engcondvweni, cabanga ngesimo saletisebenti letacashwa selihambile lilanga futsi tasebenta li-awa linye nje-vo. Kungenteka betingeke tikwati kondla imindeni yato ngemholo weli-awa linye, kodvwa betitimisele kusebenta futsi besetilindze lilanga lonkhe tifuna kucashwa. (Mat. 20:1-7) Bekungasilo liphutsa lato kutsi tingasebenti lilanga lonkhe. Akukho lokusibonisa kutsi betingafuni kusebenta. Ase uticabange kunguwe lolindze lilanga lonkhe, wati kutsi kunebantfu labetsembele kulemali lotawuyitfola ngalelo langa. Bewutawujabula kakhulu nawutfola umsebenti futsi utfole nemholo lowenele lotawukwati kondla ngawo umndeni wakho.

14. Kulomfanekiso wemnikati wesivini, ngusiphi sifundvo lesibalulekile lesisifundzako?

¹⁴ Ase siphindze sicabange ngaloko lokwentiwa ngulomnikati walesivini. Kute sisebenti lasiholela imali lencane. Esikhundleni saloko, tonkhe letisebenti watiphatsa ngendlela lekahle wakhombisa kutsi kufanele titfole imali kute tondle imindeni yato. Nanobe bekanetisebenti letinyenti, lomnikati walesivini akazange asitakale ngato ngekutsi atiholele imali lencane. Tonkhe letisebenti tabuyela ekhaya tinemali leyenele yekondla imindeni yato. Kucabangisisa kahle ngalemininingwane lesesikhulume ngayo, kungayishintja indlela lebesimcabanga ngayo lomnikati walesivini. Sincumo lasitsatsa, sasiselutsandvo hhayi kusebentisa kabi ligunya ngekungacabangeli. Sifundzani kulendzaba? Sifundza kutsi kufane nje sinake leminye imininingwane lehambisana nendzaba letsite, kungasenta sigcine siyiphetse kabi leyo ndzaba. Ecinisweni, lomfanekiso ugcamisa bukhulu bekulunga kwaNkulunkulu, lobungakanamatseli ekucondzisweni ngumtsetfo nasetintfweni letifunwa bantfu.

Umbono Wetfu Ungaba Ngulophambene Nobe Ungenabi

15. Yini lengabangela umbono wetfu ngekulunga ube ngulophambene nobe ungenabi?

¹⁵ Kwesibili lokufanele sikukhumbule nasibhekane nesimo lesibonakala site kulunga, kutsi kungenteka umbono wetfu ungulophambene nobe awukenabi. Lokungawubangele kutsi ube ngulophambene kutsi sinesono, sinelubandlululo futsi simihibahiba. Umbono wetfu uphindze ungenatjiswa kungakwati kwetfu kubona tisusa nekwati loko lokusetinhlitiyweni tebantfu. Ngalokwehlukile, Jehova kanye naJesu banembono lowenabile.—Taga 24:12; Mat. 9:4; Luk. 5:22.

16, 17. Ngalesikhatsi Davide enta sono naBhatisheba, kungani Jehova angazange ahlohlobetele umtsetfo wakhe lomayelana nekuphinga?

¹⁶ Ase sikhulume ngendzaba yaDavide naBhatisheba. (2 Sam. 11:2-5) Ngekusho kweMtsetfo waMosi, bekufanele bobabili babulawe. (Lev. 20:10; Dut. 22:22) Nanobe Jehova abajezisa, akazange uwuhlohlobetele umtsetfo wakhe kubo. Loko kusho kutsi Jehova wenta lokungakalungi yini? Wakhombisa kumvuna yini Davide, wadzimate wanganaki ngisho nemtsetfo wakhe wekulunga? Labanye bafundzi beliBhayibheli bacabanga njalo.

¹⁷ Nobe kunjalo, Jehova lomtsetfo lomayelana nekuphinga wawunika behluleli labanesono, labangakhoni kufundza loko lokusenhlitiyweni. Nobe bebenta emaphutsa, lomtsetfo bewubasita kute banamatsele etehlulelweni tabo. Ngakulolunye luhlangotsi, Jehova uyakwati kufundza loko lokusenhlitiyweni. (Gen. 18:25; 1 Khr. 29:17) Ngako-ke, akukafaneli sicabange kutsi Jehova angabekelwa imincele ngumtsetfo lowentelwe behluleli labanesono. Kube bekunjalo, loko bekungeke yini kufane nekuhlohlobetela umuntfu lobona kahle emehlweni kutsi afake tibuko letentelwe kusita labo labangaboni kahle? Jehova wakhona kufundza loko lokusenhlitiyweni yaDavide naBhatisheba futsi wabona kutsi baphendvuke ngebucotfo. Ngaleso sizatfu, wabehlulela ngendlela lefanele lenemusa nelutsandvo.

Chubeka Ufuna Kulunga KwaJehova

18, 19. Yini letawusisita kutsi singacali sehlulele Jehova ngemitsetfo yetfu yekulunga?

¹⁸ Ngako-ke, nangabe sibona shengatsi kunekungalungi kuJehova—nobe loko sikufundze etindzabeni letitsite eBhayibhelini nobe ekuphileni kwetfu—akukafaneli sehlulele Nkulunkulu ngemitsetfo yetfu yekulunga. Kufanele sikhumbule kutsi asibi nayo ngaso sonkhe sikhatsi yonkhe imininingwane lemayelana naleyo ndzaba futsi sikhumbule nekutsi umbono wetfu ungaba ngulophambene nobe ungenabi. Kufanele singakhohlwa kutsi “lulaka lwemuntfu alukwenti kulunga lokungukona kwemukeleka kuNkulunkulu.” (Jak. 1:19, 20) Nangabe senta njalo tinhlitiyo tetfu angeke ‘timsole Jehova.’—Taga 19:3.

¹⁹ NjengaJesu, shengatsi sonkhe singachubeka sivuma kutsi Jehova nguye yedvwa loneligunya lekubeka imitsetfo yalokulungile nalokuhle. (Mak. 10:17, 18) Lwela ‘kulati kahle liciniso’ nemitsetfo yakhe. (Rom. 10:2; 2 Thim. 3:7) Ngekwemukela loku futsi kuphila kwetfu kunamatsele entsandvweni yaJehova, sitawube sikhombisa kutsi sifuna kucala ‘kulunga kwakhe.’—Mat. 6:33.

[Umbhalo longentansi]

Usakhumbula Yini?

• Kungani kubalulekile kufuna kulunga kwaJehova?

• Ngutiphi tingoti letimbili lokufanele sitigweme?

• Singakufuna njani kucala kulunga kwaNkulunkulu?

[Sitfombe ekhasini 17]

Sifundzani emfanekisweni waJesu wemadvodza lamabili lathandaza ethempelini?

[Sitfombe ekhasini 18]

Bekuyintfo lelungile yini kuholela tisebenti letasebenta li-awa linye imali lelinganako naleyo leyaholelwa lebetisebente lilanga lonkhe?