Bantfu BaJehova Bayakutsandza Kulunga

1. Ngusiphi silingo Josefa labhekana naso, futsi wenta njani?

JOSEFA, lobekayindvodzana yaJakobe, wabhekana nesilingo lesimatima. Lomunye umfati watsi kuye: “Lala nami.” Bekangumfati waPhotifari, lobekangumphatsi wakhe. Josefa wala kulala naye. Lomunye lamuhla angahle atsi: ‘Josefa wale lani kulala nalomfati?’ Photifari bekangekho. Ngetulu kwaloko, Josefa bekasigcili kulelikhaya futsi lomfati bekangenta kuphila kwakhe kube matima nakala. Nobe kunjalo, Josefa wachubeka nekwala ngisho nobe lomfati bekaphikelela. Yini leyamenta wala? Watsi: “Ngingayenta njani intfo lembi kangaka, ngone kuNkulunkulu?”​—Gen. 39:7-12.

2. Yini leyenta Josefa wati kutsi kuNkulunkulu bekusono kuphinga?

² Josefa wati njani kutsi kuphinga bekuyintfo lembi kakhulu kuNkulunkulu? Ema-Israyeli atfola uMtsetfo waMosi ngemuva kweminyaka langaba ngu-200 kwentekile loku, futsi lomunye umtsetfo lebewukuwo bewutsi “ungaphingi.” (Eks. 20:14) Nobe kunjalo, Josefa bekamati kahle Jehova, futsi bekati kutsi utawutiva njani ngekutiphatsa kabi. Sibonelo nje, Josefa bekati kutsi Jehova wenta umshado kutsi ube semkhatsini wendvodza yinye nemfati munye. Kungenteka futsi weva kutsi Jehova wamvikela njani khokho wakhe Sara tikhatsi letimbili ngesikhatsi asengotini. Nkulunkulu wamvikela naRebheka lebekangumfati wa-Isaka. (Gen. 2:24; 12:14-20; 20:2-7; 26:6-11) Njengobe Josefa bekacabanga ngaloku, wabona kutsi yini lebeyilungile nalebeyingakalungi kuNkulunkulu. Ngenca yekutsi Josefa bekamtsandza Nkulunkulu wakhe futsi atitsandza netimiso takhe talokulungile, watimisela kwenta lokuhle.

3. Sitawucoca ngani kulesihloko?

³ Uyakutsandza yini kulunga? Siyaciniseka kutsi uyakutsandza. Kodvwa sonkhe sinesono, futsi nasingakanaki umbono walelive ngekulunga ungahle usitsintse. (Isa. 5:20; Rom. 12:2) Ngako sitawucoca ngekutsi kuyini kulunga nekutsi kusisita njani kutsandza kulunga. Sitawubese sicoca ngetintfo letintsatfu lesingatenta kuze sititsandze kakhulu timiso taJehova.

KUYINI KULUNGA?

4. Ngumuphi umbono longasiwo bantfu labanyenti labanawo ngekulunga?

⁴ Nabacabanga ngemuntfu lolungile, bantfu labanyenti bacabanga ngemuntfu lotigcabhako, lowehlulela labanye nobe lotibona alunge kakhulu kunalabanye. Kodvwa Nkulunkulu akabatsandzi bantfu labanjalo. Ngesikhatsi Jesu alamhlabeni, wabasola kakhulu baholi benkholo lebebabeka timiso tabo talokulungile. (Shu. 7:16; Luk. 16:15) Umuntfu lowenta loko Jehova latsi kulungile akatiboni alunge kakhulu kunalabanye.

5. Ngekusho kweliBhayibheli, kuyini kulunga? Niketa tibonelo.

⁵ Kulunga kubuntfu lobuhle. Kusho kwenta loko Jehova Nkulunkulu latsi kulungile. EBhayibhelini, ligama lelitsi “kulunga” lisho kuphila ngetimiso letiphakeme, lokutimiso taJehova. Sibonelo nje, Jehova watsi batsengisi kufanele basebentise kwekukala sisindvo ‘lokukala lokungiko.’ (Dut. 25:15) Ligama lesiHebheru lelihunyushwe ngekutsi “lokungiko” lingaphindze lihunyushwe ngekutsi “kulunga.” Ngako umKhristu lofuna kuba ngulolungile kuNkulunkulu kufanele etsembeke kuko konkhe lakwentako ebhizinisini yakhe. Umuntfu lotsandza kulunga uyakwenyanya kubona lomunye umuntfu aphatfwa kabi. Ngetulu kwaloko, umuntfu lolunge mbamba ucabanga ngekutsi Jehova utawutiva njani ngetincumo latentako kuze ‘atomjabulisa ngalokuphelele.’​—Khol. 1:10.

6. Yini leyenta sitetsembe timiso taJehova talokulungile nalokungakalungi? (Isaya 55:8, 9)

⁶ LiBhayibheli litsi kulunga kuvela kuJehova. Kungako litsi ‘ungumtfombo wekulunga.’ (Jer. 50:7) Njengobe anguMdali, nguJehova kuphela longasibekela timiso talokulungile nalokungakalungi. Ngenca yekutsi sinesono, asikwati lokulungile nalokungakalungi, kodvwa njengobe Jehova ete sono, ukwati kahle loko lokulungile nalokungakalungi. (Taga 14:12; fundza Isaya 55:8, 9.) Nobe kunjalo, njengobe sidalwe ngemfanekiso waNkulunkulu, siyakhona kuphila ngetimiso takhe talokulungile. (Gen. 1:27) Siyakutsandza kwenta njalo. Ngenca yekutsi siyamtsandza Babe wetfu, loko kwenta kutsi sifune kwenta konkhe lesingakwenta kuze simlingise.​—Ef. 5:1.

7. Yini leyenta sidzinge timiso letetsenjwako? Fanekisa.

⁷ Kuyasisita kuphila ngetimiso taJehova talokulungile nalokungakalungi. Uyabona yini kutsi kusisita ngani? Cabanga nje kutsi kungentekani nakungatsiwa emabhange awasikali ngendlela lelinganako sisindvo semali, nobe nakungatsiwa nguleyo naleyo nkapane yekwakha ikala tintfo ngendlela letsandza ngayo. Loko bekungadala tinkinga letinyenti. Cabanga futsi kutsi kungentekani nakungatsiwa bodokotela nabonesi abayilandzeli imitsetfo yekwelapha bantfu, letinye tigulane tingafa. Ngako kusebaleni kutsi bantfu bayavikeleka nakubekwe timiso letetsenjwako. Ngendlela lefanako, timiso taNkulunkulu talokulungile nalokungakalungi tiyasivikela.

8. Ngutiphi tibusiso letitawutfolwa ngulabo labatsandza kwenta tintfo letilungile?

⁸ Jehova uyababusisa labo labetama kuphila ngetimiso takhe. Nasi setsembiso labanika sona: “Labalungile batawudla lifa lemhlaba, futsi bahlale kuwo kuze kube phakadze.” (Hla. 37:29) Cabanga nje kutsi bantfu batawujabula kangakanani futsi babe nekuthula nebunye ngesikhatsi bonkhe bantfu balalela timiso taJehova. Nguleyo imphilo Jehova lakufunela yona. Sonkhe sinetizatfu letinhle tekutsandza kulunga! Yini lesingayenta kuze sikutsandze kakhulu kulunga? Ase sicoce ngetintfo letintsatfu lesingatenta.

TITSANDZE KAKHULU TIMISO TAJEHOVA

9. Yini letasisita kutsi sikutsandze kulunga?

⁹ Kwekucala: Tsandza Loyo lobeke letimiso. Kuze sikutsandze kulunga, kufanele ikhule indlela lesimtsandza ngayo Loyo lobeke letimiso talokulungile nalokungakalungi. Nangabe simtsandza kakhulu Jehova, sitawutimisela kakhulu kuchubeka siphila ngetimiso takhe letilungile. Cabanga nganaku: Kube bo-Adamu na-Eva bebamtsandza Jehova, bebatawulalela umtsetfo wakhe.​—Gen. 3:1-6, 16-19.

10. Yini Abrahama layenta kuze ayicondze kancono indlela Jehova lacabanga ngayo?

¹⁰ Asifuni kwenta liphutsa lelifanako nalelo lelentiwa ngu-Adamu na-Eva. Singakugwema loko ngekutsi sichubeke sifundza ngaJehova, sibutsandze buntfu bakhe futsi setame kucondza indlela lacabanga ngayo. Nasenta njalo, itawukhula indlela lesimtsandza ngayo Jehova. Cabanga nga-Abrahama. Bekamtsandza kakhulu Jehova. Nanobe ngalesinye sikhatsi bekangacondzi kutsi yini lebangele Jehova kutsi ente sincumo lesitsite, Abrahama akazange avukele. Kunaloko, wetama kumati kancono Jehova. Sibonelo nje, ngesikhatsi Jehova amtjela ngesincumo sakhe sekubhubhisa iSodoma neGomora, Abrahama wacale wesaba kutsi ‘uMehluleli wemhlaba wonkhe’ utawubhubhisa labalungile nalababi kanye kanye. Ku-Abrahama, loko bekubonakala kuyintfo lembi, ngako ngekutfobeka wabuta Jehova imibuto leminyenti. Jehova wamphendvula ngesineke. Ekugcineni, Abrahama wabona kutsi Jehova uhlola tinhlitiyo tabo bonkhe bantfu nekutsi akwenteki ajezise lolungile nakajezisa lonelicala.​—Gen. 18:20-32.

11. Abrahama wakhombisa njani kutsi bekamtsandza Jehova futsi ametsemba?

¹¹ Abrahama watsintseka kakhulu ngaloko lakukhuluma naJehova mayelana neSodoma neGomora. Siyaciniseka kutsi wamtsandza kakhulu Babe wakhe futsi wamhlonipha kakhulu kunakucala. Ngekuhamba kwesikhatsi, kwetsembeka kwakhe kwavivinywa kamatima. Jehova wamcela kutsi anikele nga-Isaka indvodzana yakhe lebekayitsandza. Kodvwa nyalo Abrahama besekamati kahle Nkulunkulu, ngako kute lambuta kona. Kunaloko, walungela kwenta loko Jehova lebekatsite akakwente. Cabanga nje kutsi bekeva buhlungu lobunganani ngesikhatsi alungiselela kwenta lomsebenti! Kungenteka wacabangisisa ngaloko bekakufundzile ngaJehova. Bekati kutsi Jehova akayuze ente intfo lengakalungi nobe lete lutsandvo. Ngekusho kwemphostoli Pawula, Abrahama wacabanga kutsi Jehova utawukhona kuyivusa lendvodzana yakhe layitsandzako lengu-Isaka. (Heb. 11:17-19) Ngetulu kwaloko, Jehova beketsembise kutsi Isaka utawuba ngubabe wesive, futsi ngaleso sikhatsi Isaka bekete bantfwana. Abrahama bekamtsandza Jehova, ngako bekaciniseka kutsi utawenta lokulungile. Ngenca yekukholwa, walalela nanobe bekumatima.​—Gen. 22:1-12.

12. Singamlingisa njani Abrahama? (Tihlabelelo 73:28)

¹² Singamlingisa njani Abrahama? Natsi kufanele sichubeke sifundza ngaJehova. Nasenta njalo, sitawusondzelana kakhulu naye futsi simtsandze kakhulu. (Fundza Tihlabelelo 73:28.) Bonembeza betfu batawucecesheka kuze bacondziswe yindlela Nkulunkulu lacabanga ngayo. (Heb. 5:14) Ngako nangabe lotsite asilinga kutsi sente lokubi, angeke sivume. Angeke sikucabange ngisho nekukucabanga kwenta intfo letamvisa buhlungu Babe wetfu futsi ilimate buhlobo betfu naye. Kodvwa nguyiphi lenye indlela lesingakhombisa ngayo kutsi siyakutsandza kulunga?

13. Yini lesingayenta kuze sente lokulungile? (Taga 15:9)

¹³ Kwesibili: Yetama kutsandza kulunga lilanga nelilanga. Nangabe sifuna limasela letfu licine, kufanele sisebente kamatima sijima onkhe malanga. Ngendlela lefanako, kufanele sisebente kamatima kuze sititsandze kakhulu timiso taJehova talokulungile. Loko ungakhona kukwenta onkhe malanga. Jehova uyacabangela, futsi akayuze alindzele kutsi sente lokungetulu kwaloko lesingakhona kukwenta. (Hla. 103:14) Usicinisekisa ngekutsi “uyamtsandza umuntfu lowetama kwenta lokulungile.” (Fundza Taga 15:9.) Nangabe sifuna kufinyelela umgomo lotsite emsebentini waJehova, sichubeka sifaka emandla kuze siwufinyelele. Loku kuyafana nalapho sifuna kwenta lokulungile. Ngesineke, Jehova utasisita kutsi sichubeke sitfutfuka kancane kancane.​—Hla. 84:5, 7.

14. Siyini “sivikelo sesifuba lesikulunga,” futsi yini leyenta sisidzinge?

¹⁴ Jehova usikhumbuta ngelutsandvo kutsi kwenta tintfo letilungile akusiwo umtfwalo. (1 Joh. 5:3) Kunaloko kuyasivikela, futsi lesivikelo sisidzinga onkhe malanga. Khumbula tembatfo temphi lakhuluma ngato umphostoli Pawula. (Ef. 6:14-18) Ngusiphi sembatfo lebesivikela inhlitiyo yelisotja? “Sivikelo sesifuba lesikulunga,” lesimelela timiso taJehova letilungile. Njengobe sivikelo sesifuba lesikulunga sivikela inhlitiyo mbamba, netimiso taJehova tivikela inhlitiyo, lokungumuntfu lesinguye ngekhatsi. Ngako kubalulekile kutsi emkhatsini wetembatfo takho temphi, sibe khona nesivikelo sesifuba lesikulunga!​—Taga 4:23.

15. Ungasigcoka njani sivikelo sesifuba lesikulunga?

¹⁵ Ungasigcoka njani sivikelo sesifuba lesikulunga? Ngekutsi ucabange ngetimiso taNkulunkulu nawenta tincumo onkhe malanga. Nawucabanga ngekutsi ukhulume ngani nobe nawukhetsa umculo lotawulalela, lotakubukela nobe nawukhetsa incwadzi lotayifundza, cale utibute: ‘Yini lengitawube ngiyifaka enhlitiyweni yami? Jehova uyakwemukela yini loku? Nobe kukhutsata kutiphatsa kabi yini, budlova, bugovu nekuticabangela mine, lokutintfo Jehova latsi atikalungi?’ (Fil. 4:8) Nangabe tincumo lotentako tihambisana nentsandvo yaJehova, utawube uvumela timiso takhe letilungile kutsi tivikele inhlitiyo yakho.

16-17. Umbhalo wa-Isaya 48:18 usicinisekisa njani kutsi singakhona kuphila ngetimiso taJehova kuze kube phakadze?

¹⁶ Kuyenteka yini utibute kutsi utawukhona yini kuchubeka uphila ngetimiso taJehova letilungile lilanga nelilanga, umnyaka nemnyaka? Cabanga nganangu umfanekiso Jehova lawusebentisa, loku-Isaya 48:18. (Fundza.) Jehova wasetsembisa kutsi kulunga kwetfu kutawufana “nemagagasi elwandle.” Ase uticabange ume elusentseni lwelwandle ubuka emagagasi njengobe ahamba, lelinye ngemuva kwalelinye. Njengobe usemile futsi ubuka, kungenteka yini ukhatsateke ngekutsi ngalelinye lilanga angeke abe khona lamagagasi? Cha! Uyati kutsi sekuphele tinkhulungwane teminyaka lamagagasi solo akhona kulolwandle, futsi uyaciniseka kutsi akuyuze kwenteke kutsi angabi khona.

¹⁷ Kulunga kwakho kungafana nemagagasi elwandle! Kanjani? Nakufanele wente sincumo, cale utibute kutsi yini Jehova lafuna kutsi uyente. Bese uyakwenta. Ngisho nobe kumatima kangakanani kwenta lesincumo, Babe wakho wasezulwini lokutsandzako utawuhlale akulungele kukunika emandla futsi akusite kutsi uchubeke wenta lokulungile onkhe malanga.​—Isa. 40:29-31.

18. Ngusiphi sizatfu lesenta kutsi singabehluleli labanye ngetimiso tetfu?

¹⁸ Kwesitsatfu: Vumela Jehova kube nguye lowehlulelako. Njengobe setama kamatima kuphila ngetimiso taJehova letilungile, kufanele sikugweme kwehlulela labanye nekutibona silunge kakhulu. Kunekutsi sibabukele phansi labanye, kube ngatsi sinelilungelo lekubehlulela ngetimiso tetfu, kufanele sikhumbule kutsi nguJehova ‘uMehluleli wemhlaba wonkhe.’ (Gen. 18:25) Jehova akawuniketi tsine umsebenti wekwehlulela. Ecinisweni, Jesu watsi: “Yekelani kwehlulela labanye, kuze nani ningatowehlulelwa.”​—Mat. 7:1.b

19. Josefa wakhombisa njani kutsi uyayetsemba indlela Jehova lehlulela ngayo?

¹⁹ Ase siphindze sicoce ngesibonelo saJosefa, lebekayindvodza leyetsembekile. Wakugwema kwehlulela labanye, ngisho nalabo bebamphetse kabi. Bobhuti wakhe bamphatsa kabi, bamtsengisa kutsi abe sigcili futsi batjela babe wakhe kutsi ufile. Ngemuva kweminyaka, Josefa waphindze wahlangana nemndeni wakubo. Ngaleso sikhatsi, besekangumbusi lonemandla, ngako bekangabehlulela kamatima bobhuti wakhe futsi atiphindziselele. Nguloko kanye bobhuti wakhe lebebacabanga kutsi utawukwenta nanobe bebatisola mbamba ngaloko bebakwentile. Kodvwa Josefa wabacinisekisa watsi: “Ningesabi. Mine angeke ngitibeke endzaweni yaNkulunkulu.” (Gen. 37:18-20, 27, 28, 31-35; 50:15-21) Josefa watitfoba futsi wabona kutsi nguJehova kuphela lonelilungelo lekwehlulela bomnakabo.

20-21. Singakugwema njani kutibona silunge kakhulu kunalabanye?

²⁰ NjengaJosefa, sishiyela kuJehova kutsi kube nguye lowehlulela labanye. Sibonelo nje, asenti ngatsi siyati kutsi yini lebangele bazalwane betfu nabodzadze benta lokutsite. Asikhoni kufundza tinhlitiyo; ‘nguJehova kuphela lohlolisisa tisusa temuntfu.’ (Taga 16:2) Utitsandza tonkhe tinhlobo tebantfu, nalabakhule ngetindlela letingafani futsi labanemasiko langafani. Ngetulu kwaloko, Jehova usikhutsata kutsi ‘sivule tinhlitiyo tetfu.’ (2 Khor. 6:13) Setama kubatsandza bonkhe bazalwane betfu nabodzadze, hhayi kubehlulela.

²¹ Loko kusho kutsi akukafaneli sibehlulele nalabo labangasibo boFakazi. (1 Thim. 2:3, 4) Ungasehlulela yini sihlobo sakho ngekutsi utsi: “Lona akayuze alemukele liciniso”? Cha, nawenta njalo utawube wenta umsebenti lokungakafaneli uwente, utawube utibona ulunge kakhulu kunalabanye. Jehova usanike “bantfu kuto tonkhe tindzawo” litfuba lekutsi baphendvuke. (Imis. 17:30) Hlale ukhumbula kutsi kuJehova labo labatibona balunge kakhulu kunalabanye, abakalungi.

22. Yini leyenta utimisele kutsandza kulunga?

²² Shengatsi indlela lesititsandza ngayo timiso taJehova talokulungile kungasenta sijabule, kukhutsate labanye futsi kubasite basondzelane natsi naNkulunkulu wetfu. Shengatsi singachubeka ‘silambele kulunga futsi sikomele.’ (Mat. 5:6) Ciniseka kutsi Jehova uyajabula ngawe njengobe wetama kamatima kwenta lokulungile. Njengobe bantfu bakulelive benta lokubi kakhulu, ungapheli emandla! Hlale ukhumbula kutsi “Jehova uyabatsandza bantfu labalungile.”​—Hla. 146:8.