Lokuhle Nalokubi: Kufanele Sikhetse
Indlela lesikhetsa kuphila ngayo italitsintsa likusasa letfu. Jehova Nkulunkulu uyakwati loko. Kungako afuna siphile ngetimiso takhe.
Jehova ufuna sibe nemphilo lenekuthula nalejabulisako.
“Mine Jehova, nginguNkulunkulu wakho, Loyo lokufundzisako kuze uzuze, Loyo lokucondzisa endleleni lokufanele uhambe ngayo. Kube mane bewungayilalela imiyalo yami! Kuthula kwakho bekutawufana nemfula nekulunga kwakho kufane nemagagasi elwandle.”—Isaya 48:17, 18.
Njengobe anguMdali wetfu, Nkulunkulu uyati kutsi nguyiphi indlela lencono kakhulu yekuphila. Ufuna silandzele sicondziso sakhe ngobe sitasizuzisa. Nasilandzela imitsetfo yaNkulunkulu, angeke sikhatsateke ngekutsi sitawenta tincumo letikabi. Sitawuhlale senta tincumo letikahle letitasenta sibe nekuthula futsi sijabule.
Jehova akasho kutsi sente lesingeke sikhone kukwenta.
“Lomtsetfo lenginitjela wona lamuhla awusilukhuni kakhulu kini, futsi awukho khashane nani.”—Dutheronomi 30:11.
Kuze siphile ngetimiso taNkulunkulu, kudzingeka sishintje indlela lesenta ngayo nalesicabanga ngayo. Nobe kunjalo, Jehova akasho kutsi sente lesingeke sikhone kukwenta. Njengobe anguMdali wetfu, ukwati kahle loko lesingakhona kukwenta. Njengobe siya ngekumati Jehova, sitawutfola kutsi “imiyalo yakhe ayisiwo umtfwalo.”—1 Johane 5:3.
Jehova wetsembisa kubasita labo labaphila ngetimiso takhe.
“Mine Jehova Nkulunkulu wakho ngibamba sandla sakho sangesekudla, Mine ngitsi kuwe: ‘Ungesabi, ngitakusita.’”—Isaya 41:13.
Singakhona kuphila ngetimiso taNkulunkulu ngobe yena utasisita. Angasisita asebentisa liVi lakhe liBhayibheli lelingasikhutsata futsi lisinikete litsemba.
Tigidzi tebantfu emhlabeni titfole kutsi kuphila ngetimiso teliBhayibheli kwente kuphila kwato kwajabulisa. Fundza ngeteluleko letiseBhayibhelini letingaba lusito. Loku ungakwenta ngekutsi ucale ufundze incwajana lesekelwe eBhayibhelini letsi Jabulela Kuphila Kuze Kube Phakadze! letfolakala mahhala ku-website letsi jw.org. Lencwajana inaletifundvo letilandzelako:
LiBhayibheli Lingakusita Njani?
LiBhayibheli Lisetsembisa Likusasa Lelihle
Ungakwetsemba Yini Loko Lokushiwo LiBhayibheli?
Njengobe ufundza liVi laNkulunkulu liBhayibheli, utawutfola kutsi alikaphelelwe sikhatsi, ‘lihlale letsembekile futsi litawuchubeka linjalo kuze kube phakadze.’ (Tihlabelelo 111:8) Kuphila ngetimiso teliBhayibheli kuyindlela lencono kakhulu yekuphila. Nobe kunjalo, Nkulunkulu angeke aze asiphocelele kutsi siphile ngato. (Dutheronomi 30:19, 20; Joshuwa 24:15) Lesi sincumo ngamunye wetfu lokufanele atentele sona.