Gcina Timiso TaJehova Tekutiphatsa

Jehova Nkulunkulu ubekele bantfu timiso tekutiphatsa. Ngekwesibonelo, uyasitjela kutsi indvodza nemfati akukafanele behlukane. (Mat 19:4-6, 9) Akakwemukeli kutiphatsa lokubi. (1Ko 6:9, 10) Usiniketa netimiso letimayelana nekugcoka kanye nekutilungisa kuze sehluke eveni.​—Dut 22:5; 1Tm 2:9, 10.

Kulelive lesiphila kulo, bantfu labanyenti abatilaleli timiso taJehova. (Rom 1:18-32) Bavumela umoya walelive ulawule indlela labagcoka ngayo, labatilungisa ngayo kanye nalabatiphatsa ngayo. Labanyenti benta shengatsi kwenta bubi kuyintfo lenhle futsi bakhuluma kabi ngalabatiphatsa kahle.​—1Ph 4:3, 4.

NjengaBoFakazi BaJehova, kufanele sitimisele kuphila ngetimiso taNkulunkulu. (Rom 12:9) Kanjani? Ngekuhlakanipha, kufanele sente bantfu bati kutsi yini Jehova layemukelako. Kodvwa kufanele silwele kuphila ngetimiso takhe ngaso sonkhe sikhatsi. Ngekwesibonelo, nangabe sikhetsa lesitakugcoka kanye nendlela yekutilungisa kufanele sitibute: ‘Indlela lengigcoka ngayo ikhombisa kutsi ngiphila ngetimiso taJehova yini nome ngilawulwa ngulelive? Iyakhombisa yini kutsi ngesaba Jehova?’ Nobe nawukhetsa luhlelo lwe-TV nobe i-movie lotayibukela kufanele utibute: ‘Jehova utiva njani nangibukela loluhlelo? Lukhutsata kutiphatsa lokunjani? Loko lengikhetsa kutijabulisa ngako kungalehlisa yini lizinga lami lekutiphatsa? (Hla 101:3) Kungawakhuba yini emalunga emndeni wami kanye nalabanye?’​—1Ko 10:31-33.

Kubaluleke ngani kuphila ngetimiso taJehova? Ngekushesha, Jesu Khristu utawubhubhisa bonkhe bantfu lababi futsi acedze nebubi. (Hez 9:4-7) Bonkhe labenta intsandvo yaNkulunkulu batawusindza. (1Jh 2:15-17) Ngako-ke asitiphatse ngendlela lejabulisa Jehova kuze bantfu nababona indlela lesitiphatsa ngayo badvumise Nkulunkulu.​—1Ph 2:11, 12.

BUKELANI I-VIDEO LETSI BANI NGUMNGANI WAJEHOVA​—MUNYE BABE, MUNYE MAKE, BESE NIPHENDVULA LEMIBUTO LELANDZELAKO:

• Kungani kukuhlakanipha kuphila ngetimiso taJehova?

• Kungani batali kufanele bafundzise bantfwana babo timiso taJehova basebancane?

• Labancane nalabadzala bangabasita njani bantfu kuze batfole umusa waNkulunkulu?