Lokuhle Nalokubi: Singasetsemba Sicondziso SeliBhayibheli
Angeke siciniseke kutsi tincumo lesitentako titawuba nemiphumela lenjani nangabe sitawutenta sicabanga ngendlela lesitiva ngayo nobe labanye labativa ngayo. LiBhayibheli liyaveta kutsi yini lengabangela loko, liphindze lisisite sati kutsi senteni. Lisitjela kutsi yini lelungile nalengakalungi, futsi lisisite sati kutsi yini lengasenta sijabule futsi senetiseke ekuphileni.
SICONDZISO LESISIDZINGAKO
EBhayibhelini, Nkulunkulu Jehovaa uveta kutsi bekahlose kutsi bantfu bacondziswe nguye, bangaticondzisi bona. (Jeremiya 10:23) Kungako alungiselele bantfu ticondziso letimayelana nekutiphatsa kahle letitfolakala eBhayibhelini. Uyabatsandza bantfu futsi akafuni bente tincumo letimbi letitabalimata futsi tente kuphila kwabo kube matima. (Dutheronomi 5:29; 1 Johane 4:8) Ngetulu kwaloko, uhlakaniphile futsi wati konkhe, ngako uyafaneleka kusitjela kutsi yini lelungile nalengakalungi. (Tihlabelelo 100:3; 104:24) Nobe kunjalo, Nkulunkulu akaphoceleli muntfu kutsi aphile ngetimiso takhe.
Jehova waniketa bantfu bekucala, bo-Adamu na-Eva, konkhe lebebakudzinga kuze bajabule. (Genesisi 1:28, 29; 2:8, 15) Wabaniketa neticondziso letimelula lebekufanele batilalele. Nobe kunjalo, wabavumela kutsi batikhetsele kutsi batatilalela yini leticondziso nobe cha. (Genesisi 2:9, 16, 17) Lokubuhlungu kutsi bo-Adamu na-Eva bakhetsa kungatilaleli ticondziso taNkulunkulu. (Genesisi 3:6) Ube yini umphumela? Kubenta bajabule yini bantfu kutikhetsela emkhatsini walokuhle nalokubi? Cha. Tintfo letentekile tikhombisa ngalokucacile kutsi kungatilaleli ticondziso taNkulunkulu akubenti bantfu bajabule futsi babe nekuthula.—Umshumayeli 8:9.
LiBhayibheli liyasisita kuze sente tincumo letikahle ngisho nobe sihlala kuphi, nobe sikhule njani. (2 KuThimothi 3:16, 17; buka libhokisi lelitsi “Incwadzi Yabo Bonkhe Bantfu.”) Tfola kutsi liBhayibheli likwenta njani loku.
Fundza kutsi yini leyenta liBhayibheli lifaneleke kubitwa ngekutsi ‘liliVi laNkulunkulu.’—1 KubaseThesalonika 2:13. Bukela i-video letsi Ngubani Lowabhala Libhayibheli? ku-website letsi jw.org.
INDLELA LIBHAYIBHELI LELIVETA NGAYO SICONDZISO SANKULUNKULU
LiBhayibheli lisitjela ngebuhlobo Nkulunkulu lebekavele anabo nebantfu kusukela ekucaleni. Likhuluma ngalokungasisita sicondze umbono waNkulunkulu ngalokuhle nalokubi, lokungasizuzisa nalokungasilimata. (Tihlabelelo 19:7, 11) Singatfola timiso letingaphelelwa sikhatsi letingasisita sente tincumo letihlakaniphile ekuphileni kwetfu.
Sibonelo nje, cabanga ngeseluleko lesitfolakala kuTaga 13:20: “Loyo lohamba nalabahlakaniphile naye utawuhlakanipha, kodvwa tintfo titamhambela kabi loyo lotihlanganisa netilima.” Lesimiso sisasebenta nalamuhla njengobe besisebenta nakadzeni. LiBhayibheli ligcwele timiso letilusito naletibalulekile.—Buka libhokisi lelitsi “Lokushiwo LiBhayibheli Kusasebenta.”
Kungenteka uyatibuta, ‘Yini lengangenta ngiciniseke kutsi loko liBhayibheli lelikushoko ngalokuhle nalokubi kusasebenta nalamuhla?’ Sihloko lesilandzelako sitawucoca ngekutsi libasite njani labanye.
a Jehova ligama laNkulunkulu.—Tihlabelelo 83:18.