Sikhona Yini Sicondziso Longasetsemba Selikusasa Lelijabulisako?

Njengobe sibonile etihlokweni letendlulile, bantfu betamile kutfola likusasa lelihle ngekwetsembela etintfweni letinjengekudalelwa, imfundvo, umcebo kanye nekuba bantfu labalungile. Nobe kunjalo, kwetsembela kuletintfo kungafana nekuya endzaweni longayati usebentisa libalave lelineliphutsa. Loko kusho kutsi kute yini sicondziso lesingasetsemba lesimayelana nelikusasa? Cha!

SICONDZISO LESIVELA EMTFONJENI LOKAHLE KAKHULU

Ngalokuvamile, nasenta tincumo sivamise kubuta kumuntfu lomdzala futsi lohlakaniphile kunatsi. Ngendlela lefanako, singatfola sicondziso lesingasetsemba ngelikusasa letfu kuMuntfu lomdzala kakhulu futsi lohlakaniphe kakhulu kunatsi. Singafundza leticondziso encwadzini leyabhalwa eminyakeni lengu-3 500 leyendlulile. Lencwadzi ibitwa ngekutsi liBhayibheli.

Yini lengakwenta uletsembe liBhayibheli? Kutsi umBhali walo nguMuntfu lomdzala kakhulu futsi lohlakaniphe kakhulu. Uchazwa ngekutsi ‘unguLoyo Lobekaphila Kusukela Endvulo’ nangekutsi ‘akanasicalo futsi akanasiphetfo.’ (Danyela 7:9; Tihlabelelo 90:2) ‘UnguMdali wemazulu longuNkulunkulu weliciniso, Loyo lowadala umhlaba.’ (Isaya 45:18) Usitjela kutsi ligama nguJehova.—Tihlabelelo 83:18.

Ngenca yekutsi liBhayibheli livela kuMdali wabo bonkhe bantfu, alisho kutsi lisiko lelitsite lincono kunalamanye. Seluleko salo asiphelelwa sikhatsi futsi sisite bantfu labanyenti emhlabeni. Litfolakala ngetilwimi letinyenti futsi selisakatwe kakhulu kwendlula letinye tincwadzi.a Loku kusho kutsi bonkhe bantfu, ngisho nobe bahlala kuphi, bangalifundza futsi bacondziswe ngilo. Loku kuyavumelana naloko lokushiwo liBhayibheli:

“Nkulunkulu akakhetsi, kodvwa wonkhe umuntfu lomesabako nalowenta lokulungile uyemukeleka kuye ngisho nobe asive sini.”—IMISEBENTI 10:34, 35.

Njengemtali lokhatsalela bantfwana bakhe futsi abanikete sicondziso, Jehova Nkulunkulu unguBabe lonelutsandvo losiniketa lusito asebentisa liVi lakhe liBhayibheli. (2 KuThimothi 3:16) Ungaletsemba liVi lakhe ngobe nguye lowasidala futsi uyati kutsi yini lengasenta sijabule.

SICONDZISO LESINGASETSEMBA

Singakwetsemba loko lokushiwo liBhayibheli ngelikusasa ngobe lamuhla sibona kwenteka tintfo lelaphrofetha ngato eminyakeni lengu-2 000 leyendlulile.

TENTAKALO

“Sive sitawuvukela lesinye sive, nembuso uvukele lomunye umbuso. Kutawuba khona kutamatama lokukhulu kwemhlaba; kube nendlala kanye netifo letingumshayabhuce etindzaweni letehlukahlukene.”—LUKHA 21:10, 11.

INDLELA YEKUTIPHATSA

“Emalangeni ekugcina kutawuba netikhatsi letibucayi lokumatima kubhekana nato. Ngobe bantfu batawutitsandza bona, batsandze imali, batigabatise, batigcabhe, bahlambalate, bangalaleli batali, bangabongi, bangetsembeki, babe bete lutsandvo, bangavumi kwenta tivumelwane, banyundzele, bangatibambi, babe nelulaka, bangakutsandzi lokuhle, batsengise ngalabanye, babe nenkhani, bagcwale umgcabho, batsandze injabulo kunekutsandza Nkulunkulu.”—2 KUTHIMOTHI 3:1-4.

LiBhayibheli likhone njani kuphrofetha ngaletintfo ngendlela lenembe kangaka? Kungenteka uvumelana naLeung waseHong Kong, lotsi: “Tiphrofetho teliBhayibheli tabhalwa kadzeni. Angeke kuze kwenteke ngemuntfu lovamile kutsi aphrofethe ngaletintfo ngendlela leshaya emhlolweni kangaka. Kufanele kube liBhayibheli laphefumulelwa ngumuntfu lohlakaniphe kakhulu kunatsi.”

LiBhayibheli linetiphrofetho letinyenti lesetigcwalisekile.b Letiphrofetho tifakazela kutsi vele liBhayibheli liliVi laNkulunkulu. Jehova utsi: “Mine nginguNkulunkulu futsi kute lofana nami. Kusukela ekucaleni ngisho loko lokutawuba siphetfo.” (Isaya 46:9, 10) Ngako-ke, sinesizatfu lesivakalako sekukwetsemba loko lokushiwo liBhayibheli ngelikusasa.

SICONDZISO LESITAKUSITA NYALO NAPHAKADZE

Nawulandzela sicondziso lesitfolakala emiBhalweni Lengcwele, utawusitakala. Cabanga nganati tibonelo.

SELULEKO LESIKAHLE NGEMALI NEMSEBENTI

“Kuncono kuphumula kancane kunekusebenta kamatima futsi ucoshe umoya.”—UMSHUMAYELI 4:6.

INDLELA YEKUBA NEMNDENI LOJABULAKO

“Nguloyo naloyo kini akatsandze umkakhe njengobe atitsandza yena; nemfati kufanele abe nenhlonipho lenkhulu ngendvodza yakhe.”—KUBASE-EFESU 5:33.

INDLELA YEKUSEBENTELANA NALABANYE BANTFU

“Yekela kutfukutsela, uyekele nekuba nelulaka; ungacansuki, futsi ungakwenti lokubi.”—TIHLABELELO 37:8.

Nawusebentisa loko lokushiwo liBhayibheli, utawuba nemphilo lejabulisako nyalo kanye nelikusasa lelihle. EBhayibhelini, sitfola tetsembiso taNkulunkulu telikusasa lelihle letifaka ekhatsi

KUTHULA NEKULONDZEKA

“Batawujabulela kuthula lokukhulu.”—TIHLABELELO 37:11.

INDZAWO YEKUHLALA NEKUDLA LOKWENELE

“Bayawukwakha tindlu bahlale kuto, bayawuhlanyela emasimu emagilebisi, badle titselo tawo.”—ISAYA 65:21.

KUTE LOTAWUGULA NOBE AFE

“Kufa ngeke kusaba khona, futsi kulila, nekukhala kanye nebuhlungu ngeke kusaba khona.”—SEMBULO 21:4.

Yini lokudzingeka uyente kuze ube nelikusasa lelifana naleli? Buka sihloko lesilandzelako.

a Kuze utfole lokunyenti ngekuhunyushwa nangekusakatwa kweliBhayibheli, ngena ku-website letsi www.jw.org ngephansi kwencenye letsi BIBLE TEACHINGS > HISTORY & THE BIBLE.

b Kuze utfole lokunyenti fundza sehluko 9 sencwadzi letsi The Bible—God’s Word or Man’s? letfolakala ngesiNgisi, leshicilelwa BoFakazi BaJehova. Iyatfolakala ku-website letsi www.jw.org. Buka ngephansi kwencenye letsi LIBRARY > BOOKS & BROCHURES.