Ngumuphi Umbono Lonawo NgeliBhayibheli?
Ungasho yini kutsi . . .
liyincwadzi lenekuhlakanipha kwemuntfu?
liyincwadzi yetinganekwane nome yetindzaba temlandvo lokungenteka kutsi tiliciniso?
liliVi laNkulunkulu?
LOKO LOKUSHIWO LIBHAYIBHELI
“Yonkhe imiBhalo iphefumulelwe nguNkulunkulu.”—2 Thimothi 3:16, Lihumusho Lemhlaba Lomusha.
KUNGAKUSITA NJANI KUKUKHOLELWA LOKO?
Ungatfola timphendvulo letenetisako temibuto lehlupha bantfu labanyenti.—Taga 2:1-5.
Ungatfola sicondziso lesetsembekile sendlela lokufanele uphile ngayo.—Tihlabelelo 119:105.
Ungaba nelitsemba lelingulonalona lelikusasa.—Roma 15:4.
SINGAKWETSEMBA MBAMBA YINI LOKUSHIWO LIBHAYIBHELI?
Yebo singakwetsemba, nganati tizatfu letintsatfu:
Kuvumelana kwalo lokumangalisako. Kubhalwa kweliBhayibheli kwatsatsa iminyaka lengu-1 600 futsi labhalwa bantfu labehlukehlukene labangaba ngu-40. Labanyenti babo abazange sebabonane ngisho nangeliso. Nome kunjalo, lencwadzi iyonkhe iyavumelana, ize inesihloko sinye.
Umlandvo lesingawetsemba. Tati mlandvo temave tijakela ekufihleni emaphutsa ebantfu betive takubo. Kodvwa babhali beliBhayibheli bawabhala ngekwetsembeka emaphutsa abo ngisho newetive takubo.—2 Tikhronike 36:15, 16; Tihlabelelo 51:1-4.
Tiphrofetho lesingatetsemba. LiBhayibheli laphrofetha ngekubhujiswa kwelidolobha lasendvulo, iBhabhulona, kusesele iminyaka lengu-200 kutsi loko kwenteke. (Isaya 13:17-22) Aligcinanga nje ngekuveta indlela liBhabhulona lebelitawuwa ngayo kodvwa laphindze lamgagula ngelibito loyo lobekatalincoba.—Isaya 45:1-3.
Naletinye tiphrofetho letinyenti teliBhayibheli tagcwaliseka, lokufaka ekhatsi ngisho nemininingwane lemincane yato. Kodvwa akusiko yini vele loko lebesingakulindzela eVini laNkulunkulu?—2 Phetro 1:21.
LONGACABANGA NGAKO
LiVi laNkulunkulu lingakutfutfukisa njani kuphila kwakho?
LiBhayibheli liyawuphendvula lombuto ku-ISAYA 48:17, 18 naku-2 THIMOTHI 3:16, 17.