Uyini UMbuso WaNkulunkulu?

LOKO LOKUSHIWO LIBHAYIBHELI

“Nkulunkulu welizulu uyawumisa umbuso longasoze wabhujiswa lutfo.”—Danyela 2:44.

“Siphiwe indvodzana. Hulumende uyawubasemahlombe akhe.”—Isaya 9:6, NW umbhalo longentansi.

LOKO KUNGASHO KUTSINI KUWE?

• Kubuswa nguhulumende lonekulunga nalongakuzuzisa.—Isaya 48:17, 18.

• Emhlabeni lomusha lotako, utawujabulela imphilo lekahle futsi uhlale ujabulile.—Sembulo 21:3, 4.

SINGAKWETSEMBA MBAMBA YINI LOKO LOKUSHIWO LIBHAYIBHELI?

Yebo, lokungenani ngenca yetizatfu letimbili:

• Jesu wakhombisa loko lobekutawentiwa nguMbuso waNkulunkulu. Jesu wafundzisa balandzeli bakhe kutsi bathantazele kutsi uMbuso waNkulunkulu ute nekutsi intsandvo yaNkulunkulu yentiwe emhlabeni. (Matewu 6:9, 10) Jesu wakhombisa kutsi lomthantazo bewutawuphendvuleka njani.

  Ngesikhatsi asemhlabeni, Jesu wesutsisa labalambile, welapha labagulako waphindze wavusa nalabafile. (Matewu 15:29-38; Johane 11:38-44) Njengobe anguMbusi weMbuso waNkulunkulu wasesikhatsini lesitako, Jesu waveta tintfo letinhle lebetitawentiwa nguloyo Mbuso kulabo labatawube baphila ngephansi kwawo.​—Sembulo 11:15.

• Tintfo letenteka emhlabeni tiyasicinisekisa kutsi uMbuso waNkulunkulu utawufika masinyane. Jesu wabiketela kutsi ngaphambi kwekutsi uMbuso waNkulunkulu uletse kuthula emhlabeni, umhlaba bewutawugcwala timphi, indlala kanye nekutamatama kwemhlaba.​—Matewu 24:3, 7.

  Lamuhla siyatibona letintfo Jesu lakhuluma ngato. Ngako-ke siyaciniseka kutsi uMbuso waNkulunkulu masinyane utawucedza tonkhe tinkinga.