Kungani Kufanele Uphile Ngetimiso TeliBhayibheli?
UMBONO weliBhayibheli mayelana nekuya ecasini sewuphelelwe sikhatsi yini futsi uvimbela bantfu ngephandle kwesidzingo? Cha. Ngalokwehlukile kuloko, umbono weliBhayibheli ngekuya ecasini ungasisita kutsi sibalekele:
▪ Tifo tasecasini
▪ Kukhulelwa ngaphandle kwemshado
▪ Buhlungu lobubangelwa kubhidlika kwemishado
▪ Kuba nanembeza lonelicala
▪ Kulahlekelwa sitfunti ngesizatfu sekucashatwa ngulabanye
Nkulunkulu Jehova,a longuMdali wetfu, ufuna kutsi sikujabulele kusebentisa tipho letivela kuye futsi sizuze kuto. Nkulunkulu nguye ‘losifundzisa kutsi ngukuphi lokuncono kunako konkhe kitsi.’ (Isaya 48:17) Umuntfu lophila ngeticondziso teliBhayibheli letimayelana nekuya ecasini:
▪ Wemukelwa nguNkulunkulu
▪ Uba nekuthula kwengcondvo
▪ Uba nemndeni lonebuhlobo lobucinile
▪ Watiwa kahle
▪ Uyatihlonipha
Kodvwa-ke kutsiwani nangabe nyalo ungaphili ngetimiso teliBhayibheli tekutiphatsa? Ungakhona yini kushintja indlela lophila ngayo? Nkulunkulu utawukutfukutselela yini ngendlela lobewuphila ngayo?
Cabanga ngaloku: Lamanye emaKhristu angesikhatsi sebaphostoli bekake enta bundlundlulu, aphinga, futsi enta bunkonkoni. Akhetsa kushintja kuphila kwawo futsi atfola tinzuzo letinyenti. (1 Khorinte 6:9-11) Lamuhla, bantfu labanyenti emhlabeni wonkhe bente intfo lefananako. Bakuyekelile kuphila imphilo yekutiphatsa kabi ngekwelicasi futsi batfola tinzuzo tekutiphatsa ngendlela levumelana netimiso teliBhayibheli. Asewucabange ngaloko lokwenteka kuSarah, lesikhulume ngaye esihlokweni sekucala.
“Ngavele Ngativa Ngikhululekile”
Sarah wabona kutsi kutiphatsa kwakhe lokubi akuzange kumletsele inkhululeko kanye nekwenetiseka labekufisa. Utsi: “Ngeva shengatsi nembeza wami ushile. Ngativa nginemahloni futsi ngakhatsateka ngekutsi kungenteka ngikhulelwe nobe ngitfole sifo. Ngangisakholelwa kutsi Nkulunkulu ukhona, futsi bengati kutsi indlela yami yekuphila yayimphetse kabi. Ngativa ngingcolile, futsi loku bekungilimata.”
Ekugcineni, Sarah wawatfola emandla ekushintja imphilo yakhe. Wafuna lusito lwebatali bakhe lababoFakazi BaJehova. Waphindze wacela nelusito kulabadzala labangemaKhristu belibandla lakubo. Sarah utsi: “Wangimangalisa kakhulu umusa kanye nelutsandvo batali bami nalabadzala belibandla labangivetela wona. Ngavele ngativa ngikhululekile.”
Nyalo, Sarah unebantfwana lababili. Utsi: “Bantfwana bami ngibachazela ngekukhululeka ngetincumo lengatenta. Ngifuna bacondze kutsi kungatilaleli timiso taNkulunkulu kwangitsintsa njani. Ngitimisele kubasita kutsi baticondze tinzuzo letiletfwa kuphila ngetimiso taNkulunkulu letimayelana nekuya ecasini. Ngiyaciniseka kutsi Nkulunkulu usiniketa timiso tekutiphatsa ngobe akafuni kutsi silimale.”
Nawe ungatijabulela tinzuzo tekulalela sicondziso saNkulunkulu selutsandvo. LiBhayibheli liyetsembisa: “Imitsetfo yaSimakadze icondzile, ingumtfombo wekujabula kwenhlitiyo. Umyalo waSimakadze umsulwa, uvula emehlo engcondvo. . . . Lowo [loyigcinako] unemvuzo lomkhulu.”—Tihlabelelo 19:8, 11.b
[Imibhalo lengentansi]
a Jehova libito laNkulunkulu lelivela eBhayibhelini.
b Kute ufundze kabanti ngeseluleko seliBhayibheli lesilusito, tive ukhululekile kucoca naboFakazi BaJehova labasendzaweni yakini. Ungabhalela ekhelini lelifanele kulawa lasekhasini 4 nobe uvakashele likheli letfu le-Internet lelitsi www.watchtower.org.
[Emavi lahambisana nesitfombe ekhasini 8]
Labo labangatinaki timiso teliBhayibheli bavame kutibangela kucindzeteleka
[Emavi lahambisana nesitfombe ekhasini 9]
Labo labaphila ngetimiso teliBhayibheli baba nanembeza lomsulwa kanye nemindeni lenebuhlobo lobucinile