Ibalulekile Yini Imphendvulo?

“Bengineminyaka lelishumi budzala ngesikhatsi ngicala kutikhipha nebafana. Ekucaleni besimane sibambane tandla futsi sangane. Kodvwa ngekushesha nje, besesiphotholozana etitfweni tangansense futsi sesiya ecasini. Ngesikhatsi sengineminyaka lengu-15 budzala, ngacala kusebenta futsi emadvodza lengangisebenta nawo abefuna kutsi ngiye nawo ecasini. Bengifuna kubonakala nginesibindzi futsi ngente konkhe lokwakwentiwa ngulabo lengangisebenta nabo. Bengifuna kwemukeleka kubangani bami, futsi loko kwenta kutsi ngichubeke kakhulu nekuya ecasini.”—SARAH,a WASE-AUSTRALIA.

BEKUNGAKUMANGALISA yini kwati kutsi Sarah abekhuliswe ngumndeni lotsandza inkholo? Batali bakhe betama kumsita kutsi akhule aphila ngetimiso teliBhayibheli tekutiphatsa. Kodvwa Sarah wakhetsa kuphila ngendlela leyehlukile.

Bantfu labanyenti bangavumelana naloko Sarah lakwenta. Bakholelwa kutsi umbono weliBhayibheli ngekuya ecasini sewuphelelwe sikhatsi. Labanye abayiboni inkinga ngekubonakala bayitsandza inkholo baphindze baphile imphilo yekutiphatsa kabi ngekwelicasi.

Kunendzaba yini kutsi uyakwati loko liBhayibheli lelikufundzisako ngekuya ecasini futsi uphila ngekuvumelana nako? LiBhayibheli ‘liphefumulelwe nguNkulunkulu; lilungele kufundzisa.’ (2 Thimothi 3:16) Nangabe ukholelwa kutsi nguNkulunkulu lowadala bantfu nekutsi liBhayibheli liliVi lakhe leliphefumulelwe, kubalulekile-ke kutsi ukwati loko lelikufundzisako ngalendzaba.

Kuyadzabukisa kutsi bantfu labanyenti badidekile ngaloko liBhayibheli lelikufundzisako ngekuya ecasini. Baholi benkholo labatsi bayalihlonipha liBhayibheli bafundzisa imibono lephikisanako. Ecinisweni, lendzaba yehlukanise emasontfo lamanyenti.

Kunekutsi wetsembele kuloko lokushiwo ngulabanye, kungani ungatihloleli lendzaba? Sihloko lesilandzelako sikhuluma ngemibuto lelishumi bantfu labavame kuyibuta mayelana nembono weliBhayibheli ngekuya ecasini. Kuleso sihloko, utawutfola timphendvulo leticondzile letisekelwe kuloko liBhayibheli lelikufundzisako. Sihloko sesitsatfu sitawuchaza kutsi kungani tincumo lesitentako tibaluleke kakhulu.

[Umbhalo longentansi]