Fundza EVini LaNkulunkulu
Likhona Yini Litsemba Ngalabafile?
Lesihloko siphakamisa imibuto lokungenteka wake watibuta yona futsi siveta nekutsi ungatitfola kuphi timphendvulo eBhayibhelini lakho. BoFakazi BaJehova batawukujabulela kucoca nawe ngaletimphendvulo.
1. Liyini litsemba ngalabafile?
Ngesikhatsi Jesu efika eBhetani edvute naseJerusalema, umngani wakhe Lazaro abesanemalanga lamane afile. Jesu waya ethuneni lakhe ahamba naMata kanye naMariya, bosisi baLazaro. Ngekushesha kwagcwala sicumbi sebantfu. BoMata naMariya bajabula kakhulu ngesikhatsi Jesu avusa Lazaro.—Fundza Johane 11:20-24, 38-44.
Mata abenelitsemba lekutsi bantfu labafile batawuvuswa. Kusukela endvulo, tikhonti taJehova letetsembekile betati kutsi esikhatsini lesitako, Nkulunkulu utawubavusa bantfu labafile.—Fundza Jobe 14:14, 15.
2. Basesimeni lesinjani bantfu labafile?
Nanobe “umoya” nobe emandla ekuphila, enta bantfu kanye netilwane bachubeke baphila, loko akusho kutsi simane singumoya losemtimbeni wenyama. (Umshumayeli 3:19; Genesisi 7:21, 22) Kunaloko, sitidalwa letentiwe ngelutfuli. (Genesisi 2:7; 3:19) Nakufa ingcondvo yetfu, nemicabango yetfu iyaphela. Ngako-ke, ngemuva kwekuvuswa kwakhe, Lazaro akazange asho kutsi bekwentekani ngesikhatsi afile, ngobe bantfu labafile abati lutfo.—Fundza Tihlabelelo 146:4; Umshumayeli 9:5, 10.
Kuyacaca kutsi bantfu labafile abahlupheki. Ngako-ke lemfundziso letsi Nkulunkulu ujezisa labafile, ingemanga, futsi iyamnyundzela. Kujezisa bantfu emlilweni kusinengiso kuye.—Fundza Jeremiya 7:31.
3. Singakwati yini kukhuluma nebantfu labafile?
Bantfu labafile abakhulumi. (Tihlabelelo 115:17) Kodvwa emadimoni akhuluma nebantfu labaphilako, atente shengatsi abantfu labafile. (2 Phetro 2:4) Jehova uyakulahla kwetama kukhuluma nebantfu labafile.—Fundza Dutheronomi 18:10, 11.
4. Bobani labatawuvuswa?
Emhlabeni lomusha, tigidzi tebantfu letisemathuneni titawuphindze tiphile. Ngisho nalabo labebenta tintfo letimbi ngesizatfu sekutsi bebangamati Jehova, batawuvuswa.—Fundza Lukha 23:43; Imisebenti 24:15.
Labo labatawuvuswa batawufundza emaciniso ngaNkulunkulu futsi bavete kukholwa kwabo kuJesu ngekumlalela. (Sembulo 20:11-13) Labo labavusiwe futsi labenta lokuhle batawujabulela kuphila phakadze emhlabeni. Nanobe kunjalo, labanye batawuchubeka benta tintfo letimbi. Ngako-ke, “batawuvukela ekulahlweni.”—Fundza Johane 5:28, 29.
5. Luvuko lusitjelani ngaJehova?
Luvuko lutawukwenteka ngobe Nkulunkulu watfuma iNdvodzana yakhe kutsi itewusifela. Ngako-ke, lesento siveta lutsandvo kanye nemusa lomkhulu waJehova.—Fundza Johane 3:16; Roma 6:23.
Kute utfole kwatiswa lokubanti, fundza tehluko 6 na-7 talencwadzi, Lifundzisani Mbambambamba LiBhayibheli?, leshicilelwa boFakazi BaJehova.
[Sitfombe ekhasini 22]
Adamu wentiwa ngelutfuli