Ngubani Lokufanele Afundzise Bantfwana NgaNkulunkulu?
“Umfundzi akamkhulu kunemfundzisi wakhe, kodvwa wonkhe umfundzi nasafundziswe ngalokuphelele, uyawuba njengemfundzisi wakhe.”—LUKHA 6:40.
LABANYE batali batibona bangakufanelekeli kufundzisa bantfwana babo ngaNkulunkulu. Bangase bacabange kutsi bete imfundvo leyenele nobe kuncane labakwatiko ngenkholo kutsi bangaba bafundzisi labakahle. Ngesizatfu saloko, bakhetsa kutsi lomtfwalo lobalulekile wentiwe sihlobo lesitsite nobe bafundisi.
Nanobe kunjalo, ngubani losetfubeni lelihle kakhulu lekufundzisa bantfwana emaciniso ngaNkulunkulu kanye netimiso tekutiphatsa? Asewucabange ngaloko liBhayibheli lelikushoko ngalendzaba, bese ukucatsanisa naloko bacwaningi labakutfolile.
Iyini Indzima Yababe?
Lokufundziswa liBhayibheli: “Boyise ningabaphatsi kabi bantfwabenu, badzimate babe nenzondo, kodvwa bakhuliseni ngekubayala nangekubacondzisa ngemphilo yebuKhristu.”—Efesu 6:4.
Lokutfolwe bacwaningi: Bobabe bazuza njani nangabe banetinkholelo leticinile? Sihloko lesitsi “Fathers’ Religious Involvement and Early Childhood Behavior,” lesashicilelwa nga-2009, satsi: “Kutihlanganisa nenkholo kungasita emadvodza kutsi abe bobabe labakahle. Inkholo yenta umuntfu akwati kutfola lusito kulabanye futsi akhone kutilawula, aphindze atfole netimfundziso kanye neticondziso tendlela lokufanele aphile ngayo.”
LiBhayibheli liyakugcizelela kubaluleka kwendzima yababe ekukhuliseni nasekucecesheni bantfwana. (Taga 4:1; Kholose 3:21; Hebheru 12:9) Kodvwa leseluleko sisasebenta yini lamuhla? Nga-2009, iNyuvesi yaseFlorida yashicilela sihloko lesasikhuluma ngemiphumela yemfundziso yabobabe kubantfwana babo. Bacwaningi batfola kutsi bantfwana labanabobabe labenta konkhe lokusemandleni abo kute babaceceshe, bangakhula babe neluvelo futsi batetsembe kakhudlwana. Abengaba mancane ematfuba ekutsi bafana batiphatse kabi, kantsi nemantfombatana abengeke acindzeteleke engcondvweni. Kuyacaca kutsi leseluleko seliBhayibheli sisasebenta.
Ibaluleke Kangakanani Indzima Yamake?
Lokufundziswa liBhayibheli: “Ungayali imfundziso yenyoko.”—Taga 1:8.
Lokutfolwe bacwaningi: Nga-2006, i-“Handbook of Child Psychology” yatsi: “Kutsiwa bomake bacitsa sikhatsi lesisendlula ngemaphesenti langu-65 kuya kulangu-80 leso bobabe labasicitsa bacoca nebantfwana babo, futsi kubikwa emanani lafananako nakulamanye emave lamanyenti.” Njengobe make anesikhatsi lesinyenti nebantfwana bakhe, emavi, tento, kanye nekucabanga kwakhe kuyitsintsa kakhulu indlela labatawukhula ngayo.
Nangabe batali babambisana ekufundziseni bantfwana babo liciniso ngaNkulunkulu, basuke babaniketa tipho letimbili letiligugu. Kwekucala, bantfwana batfola litfuba lekwakha buhlobo naBabe wabo losezulwini, lokubuhlobo lobutawubazuzisa kuko konkhe kuphila kwabo. Kwesibili, bantfwana bafundza esibonelweni sebatali babo kutsi indvodza nemfati kufanele babambisane njani kute bafinyelele imigomo lebalulekile. (Kholose 3:18-20) Nanobe labanye bangabasita, batali ngibo labanemtfwalo wekufundzisa bantfwana babo ngaNkulunkulu kanye nangendlela lafuna kutsi kuphiliswane ngayo emndenini.
Kodvwa-ke, batali kufanele babafundzise njani bantfwana babo? Ngutiphi tindlela labangatisebentisa kute baphumelele ekubafundziseni?