Fundzisa Bantfwana Bakho
Lapho Kufanele Sihlale Siphapheme Khona
MHLAWUMBE uyavuma kutsi kuhlala uphapheme nawusesikolweni kubalulekile. Labanye bayalala nabaseklasini, kodvwa kute ufundze kufanele uhlale uphapheme. Kungenteka kutsi uyaya nasemihlanganweni lapho ufundziswa khona ngeliBhayibheli.
Yini locabanga kutsi ungayenta kute ukwati kuhlala uphapheme?—a Lokunye lokungakusita kutsi usheshe ulale. Kungaphindze kukusite nekulala kancane entsambama. Asesibone kutsi singafundzani kuloko lokwenteka kulomunye lowalala ngesikhatsi umphostoli Pawula etfula inkhulumo yakhe. Fundza umBhalo weMisebenti sehluko 20, emavesi 7 kuya ku-12, kute ubone loko lokwenteka.
Pawula abevakashele libandla lelaliseThrowasi, lokwakulidolobha lelilitheku. LiBhayibheli litsi Pawula “abetawuhamba ngakusasa” ngemkhumbi. Ngesizatfu saloko, “wakhuluma kubantfu kwaze kwabasekhatsi nebusuku.” LomBhalo uphindze utsi: “Libhungu lebekutsiwa ngu-Oyithikhusi lalihleti efasitelweni. Kwatsi ngekuchubeka kwetinkhulumo taPawula Oyithikhusi wefikelwa butfongo walala.” Yini leyenteka ngemuva kwaloko?—
Oyithikhusi wawa efasitelweni “esuka esitezi sesitsatfu.” Pawula kanye nalabanye bantfu behla masinyane bayewumbona. Oyithikhusi bamkhandza asafile! Ucabanga kutsi beva buhlungu kangakanani?— LiBhayibheli litsi Pawula watsatsa Oyithikhusi wamgaca ngemikhono. Ngemuva kwaloko, wamemeta ngenjabulo: “Ningakhatsateki, akafi.” Nkulunkulu abesamvusile Oyithikhusi!
Yini lesingayifundza ngaNkulunkulu kuloko lokwenteka ku-Oyithikhusi?— Sifundza kutsi Jehova, longuBabe wetfu wasezulwini, angabavusa bantfu labafile kuhlanganise nebantfwana labancane. Jehova ukwati kahle futsi ukutsandza ngisho kwendlula nendlela batali bakho labakutsandza ngayo. Ngesikhatsi Jesu asemhlabeni, waveta kutsi Babe wakhe unjani ngekutsi agone bantfwana futsi ababusise. Waphindze wavusa ngisho nebantfwana labebafile, lokufaka ekhatsi intfombatana leyayineminyaka lengu-12 budzala.
Kwati kutsi Babe wakho wasezulwini uyakutsandza kukwenta utive njani?— Kusenta simtsandze futsi sifune kumlalela. Uyati yini kutsi singentani kute sivete kutsi siyamtsandza?— Lenye indlela kusho kutsi siyamtsandza. Jesu watsi: “Babe ngiyamtsandza.” Kodvwa akazange agcine ngekusho nje kutsi uyamtsandza Nkulunkulu. Loko wakuveta ngetento takhe.
Jesu abemlalela Nkulunkulu. Watsi: “Sonkhe sikhatsi ngenta lokutsandzekako kuye.” Nasenta lokufananako kute sijabulise Jehova kanye neNdvodzana yakhe lenguJesu, sitawetama kuhlala siphapheme lapho kufanele khona.
Fundza eBhayibhelini lakho
[Umbhalo longentansi]
a Nangabe ufundza nemntfwana, lodvwi usho kutsi kufanele umnikete litfuba lekusho loko lakucabangako.