Tindlela Tekwenta Umndeni Ujabule

Lwelani Kutsandza Nkulunkulu Njengebantfu Labashadile

Fredericka: “Ngesikhatsi sisandza kushada, ngangifuna kutsi mine nemfati wami sifundze liBhayibheli ndzawonye. Nganginesifiso lesikhulu sekutsi Leanne alalelisise njengobe sitadisha, kodvwa abengahlaliseki. Nangimbuta imibuto, abemane aphendvule ngayebo nobe cha. Abengaphendvuli ngendlela lebengicabanga kutsi kufanele aphendvule ngayo nasifundza liBhayibheli.”

Leanne: “Bengineminyaka lengu-18 budzala ngesikhatsi ngishada naFrederick. Sasihlale sifundza liBhayibheli ndzawonye, kodvwa Frederick abesebentisa leso sikhatsi kute akhulume ngemaphutsa ami kanye nangetintfo lekufanele ngitfutfukise kuto. Loku kwangicedza emandla futsi kwangivisa buhlungu kakhulu.”

UCABANGA kutsi yayiyini inkinga emshadweni waFrederick naLeanne? Bebanetinhloso letinhle. Bobabili bebamtsandza Nkulunkulu futsi basibona nesidzingo sekufundza liBhayibheli ndzawonye. Kodvwa loko lebekungabasita kutsi basondzelane kwabonakala kungaphumeleli. Nanobe bebafundza liBhayibheli ndzawonye, bebangalweli kutsandza Nkulunkulu ndzawonye.

Kusho kutsini kutsandza Nkulunkulu? Kungani bantfu labashadile kufanele bakulwele? Ngutiphi tinsayeya labangahlangabetana nato, futsi bangatincoba njani?

Kusho Kutsini Kutsandza Nkulunkulu?

LiBhayibheli likhuluma ngetimo tengcondvo, nobe imibono yekuphila lengafanani bantfu labangaba nayo. (Juda 18, 19) Nasi sibonelo: Pawula wagcizelela umehluko lokhona emkhatsini wemuntfu lotsandza timiso taNkulunkulu naloyo longatitsandzi. Pawula watsi labo labalawulwa tifiso tabo batinaka bona kunekutsi banake labanye. Kunekutsi betame kuphila ngetimiso taNkulunkulu, benta loko lokubonakala kukuhle emehlweni abo.—1 Khorinte 2:14; Galathiya 5:19, 20.

Ngalokwehlukile kuloko, labo labatsandza Nkulunkulu bayatitsandza timiso takhe. Batsatsa Nkulunkulu Jehova njengeMngani wabo futsi betama kulingisa buntfu bakhe. (Efesu 5:1) Ngesizatfu saloko, banelutsandvo, umusa, futsi basebentelana nalabanye ngesineke. (Eksodusi 34:6) Balalela Nkulunkulu ngisho nalapho kumatima. (Tihlabelelo 15:1, 4) Darren, lohlala eCanada futsi losaneminyaka lengu-35 ashadile utsi: “Ngekubona kwami, umuntfu lotsandza Nkulunkulu uhlale acabanga ngendlela emavi kanye netento takhe lokutawubutsintsa ngayo buhlobo bakhe naNkulunkulu.” Jane, longumfati wakhe, utsi: “Ngicabanga kutsi umfati lotsandza Nkulunkulu nguloyo lohlale alwela kuveta titselo temoya waNkulunkulu ekuphileni kwakhe.”—Galathiya 5:22, 23.

Kodvwa-ke akusho kutsi umuntfu kufanele ashade kute atsandze Nkulunkulu. Ecinisweni, liBhayibheli lifundzisa kutsi bonkhe bantfu banesibopho sekufundza ngaNkulunkulu futsi bamlingise.—Imisebenti 17:26, 27.

Kungani Kufanele Nilwele Kutsandza Nkulunkulu Ndzawonye?

Kungani-ke bantfu labashadile kufanele balwele kutsandza Nkulunkulu ndzawonye? Cabanga ngalomfanekiso: Balimi lababili banengadze labafuna kuhlanyela kuyo tibhidvo. Lomunye ukhetsa kuhlanyela ngesikhatsi lesitsite semnyaka, kantsi lona lomunye ucabanga kutsi kufanele bahlanyele ngalesinye sikhatsi. Lomunye wabo ufuna kusebentisa luhlobo lolutsite lwamanyolo, kantsi lona lomunye akavumelani naloko futsi ubona shengatsi letibhidvo atiwudzingi manyolo. Lomunye ufuna kusebenta engadzeni lilanga lonkhe kantsi lona lomunye ukubona kwenele kutsi ahlale alindzele titselo. Esimeni lesinjengalesi, tikhona tibhidvo letingahluma, kodvwa umphumela angeke ube muhle njengalapho bobabili balimi bavumelana ngaloko labatawukwenta futsi basebenta bobabili kute bakuphumelelise.

Indvodza nemfati wayo bafanana nalabalimi. Nangabe munye wabo alwela kutsandza Nkulunkulu, kungenteka umshado wabo utfutfuke. (1 Phetro 3:1, 2) Kodvwa bangajabula kakhulu nangabe bobabili bavumelana ngekuphila ngetimiso taNkulunkulu futsi basebenta kamatima kute basekelane njengobe bakhonta Nkulunkulu. Solomoni, inkhosi lehlakaniphile wabhala: “Babili bancono kunamunye.” Kungani asho njalo? Kungobe “batfola umvuzo lomuhle ngemsebenti wabo: Nakuwa lomunye wabo, lomngani wakhe uyamsita amsukumise, kodvwa maye kulowo muntfu loyedvwa, lotsi nakawa angabi naye lotamsita amsukumise.”—Umshumayeli 4:9, 10.

Kungenteka kutsi nawe uyafisa kutsandza Nkulunkulu ukanye nalowo loshade naye. Kodvwa njengasekulimeni, sifiso sisodvwa asiyiletsi imiphumela. Cabanga ngetinsayeya letimbili longahlangabetana nato kanye nendlela longatincoba ngayo.

INSAYEYA YEKUCALA: Asisitfoli sikhatsi. Sue, losandza kushada, utsi: “Indvodza yami ingilandza emsebentini nga-7:00 ntsambama. Nasifika ekhaya, imisebenti yasendlini isuke isimele. Engcondvweni yetfu sisuke sati kutsi kufanele sicitse sikhatsi ndzawonye sifundza ngaNkulunkulu, kodvwa sisuke sidziniwe futsi sifuna kuphumula.”

Sisombululo: Vumelanani netimo futsi nibambisane. Sue utsi: “Mine nendvodza yami sakhetsa kusheshe sivuke bese sifundza liBhayibheli ndzawonye ngembikwekutsi siye emsebentini. Indvodza yami iyangisita ngaleminye imisebenti yasekhaya kute ngikwati kucitsa sikhatsi nayo.” Umetamo lonjena uzuzisa ngani? Ed, loyindvodza yaSue utsi: “Ngitfole kutsi lapho sicoca ngeliBhayibheli ndzawonye, siyakhona kulungisa tinkinga tetfu futsi sinciphise netintfo letisikhatsatako.”

Ngephandle nje kwekucoca ndzawonye, kubalulekile kutsi nithandaze ndzawonye malanga onkhe. Loko kunganisita njani? Ryan, losaneminyaka lengu-16 ashadile utsi: “Esikhatsini lesengcile, mine nemkami sahlangabetana nesimo lesimatima emshadweni wetfu. Kodvwa satiniketa sikhatsi sekuthandaza ndzawonye njalo ebusuku, sitjela Nkulunkulu ngaloko lobekusikhatsata. Ngibona shengatsi kuthandaza ndzawonye kwasisita kutsi silungise tinkinga tetfu futsi sichubeke sijabula emshadweni.”

YETAMA LOKU: Bekani sikhatsi lesitsite ekupheleni kwelilanga ngalinye kute nicoce ngetintfo letinhle letenteke kini nobabili, leningabonga Nkulunkulu ngato. Cocani nangetinkinga lenihlangabetana nato, lenidzinga kutsi Nkulunkulu anisite kuto. Caphela: Ungasisebentisi lesikhatsi kute ubale emaphutsa emuntfu loshade naye. Kunaloko, nanithandaza, khulumani ngetintfo lokufanele nisebentele kuto nobabili. Ngelilanga lelilandzelako, yentani ngekuvumelana naloko lenikucelile emthandazweni.

INSAYEYA YESIBILI: Asifanani. Tony utsi: “Angisuye umuntfu lotsandza kufundza.” Natalie, longumfati wakhe utsi: “Ngiyakutsandza kufundza kanye nekucoca ngaloko lengikufundzile. Ngaletinye tikhatsi ngibona shengatsi Tony akajabuli lapho sicoca ngeliBhayibheli.”

Sisombululo: Sekelanani, ningancintisani nobe nehlulelane. Ncoma loyo loshade naye futsi umkhutsate kulokuhle lakwentako. Tony utsi: “Umdlandla umfati wami lanawo wekucoca ngeliBhayibheli uhle ungetfusa futsi esikhatsini lesengcile bengingatsandzi kucoca naye ngeliBhayibheli. Nanobe kunjalo, Natalie uyangisekela kakhulu. Nyalo sesicoca njalo ngeliBhayibheli, futsi sengiyabona kutsi kute sidzingo sekukhatsateka. Ngiyakujabulela kucoca naye ngetintfo letinjalo futsi loko kusisite kutsi sikhululeke nasindzawonye futsi sibe nekuthula.”

Bantfu labanyenti labashadile batfole kutsi umshado wabo uyatfutfuka lapho babekela eceleni sikhatsi maviki onkhe sekufundza kanye nekutadisha liBhayibheli ndzawonye. Kodvwa-ke caphela: Nanicoca ngeseluleko lesitsite, shano kutsi ungasisebentisa njani wena, hhayi lowo loshade naye. (Galathiya 6:4) Khetsani lesinye sikhatsi kute nicoce ngetinkinga leninato emshadweni wenu. Kungani kufanele nente njalo?

Cabanga ngaloku: Nanidla ndzawonye njengemndeni, bewungasisebentisa yini leso sikhatsi kute ugeze silondza lesincincako futsi usibhandishe? Cha, bewungeke. Loko bekungenta labanye bangasafuni kudla. Jesu watsi kufundza ngaNkulunkulu kanye nekwenta intsandvo yakhe kufanana nekudla. (Matewu 4:4; Johane 4:34) Nangabe ngaso sonkhe sikhatsi nanifundza liBhayibheli ucoca ngetintfo letikuphetse kabi, ungenta loyo loshade naye angasakutsandzi kuchubeka nekufundza. Kuliciniso kutsi niyakudzinga kucoca ngetinkinga tenu, kodvwa loko kufanele nikwente ngesikhatsi lesibekelwe leyo njongo.—Taga 10:19; 15:23.

YETAMA LOKU: Bhala timfanelo letimbili nobe letintsatfu lotitsandza kakhulu kumuntfu loshade naye. Naniphindze nicoca ngetimfanelo letinjalo esifundvweni senu, mtjele kutsi uyijabulela kakhulu indlela lativeta ngayo.

Uyawuvuna Loko Lokuhlanyelako

Nangabe nilwela kutsandza Nkulunkulu njengebantfu labashadile, nitawuba nemshado lonekuthula kanye nenjabulo. Ecinisweni, liVi laNkulunkulu litsi “umuntfu uyawuvuna loko lakuhlanyelako.”—Galathiya 6:7.

Frederick kanye naLeanne, labacashunwe ekucaleni kwalesihloko, babona kutsi lesimiso lesiseBhayibhelini siliciniso. Sebaneminyaka lengu-45 bashadile futsi babonile kutsi kungapheli kwabo emandla kubazuzisile. Frederick utsi: “Bengivame kumsola umfati wami ngekungakwati kukhulumisana nami. Kodvwa ngekuhamba kwesikhatsi, ngabona kutsi nami bekufanele ngetame kushintja.” Leanne utsi: “Intfo leyasisita kutsi sichubeke sibeketelela tikhatsi letimatima bekulutsandvo sobabili lesasinalo ngaNkulunkulu Jehova. Kuyo yonkhe leminyaka, besihlale sifundza futsi sithandaza ndzawonye. Njengobe ngibona kutsi Frederick wetama kutfutfukisa indlela laveta ngayo timfanelo tebuKhristu, loko kwenta kutsi kube melula ngami kumtsandza.”

[Umbhalo longentansi]

TIBUTE . . .

▪ Ngagcina nini kuthandaza nemuntfu lengishade naye?

▪ Yini lengingayenta kute ngikhutsate loyo lengishade naye kutsi akhululeke nasicoca ndzawonye ngeliBhayibheli?