Yebo Kunjalo, Lona Ngumagazini Lofundvwako!
Sesiwuhlele kabusha magazini lofundvwako we-Sicongosekulindza kute ukhange uphindze ube lusito ekutadisheni liVi laJehova leliliciniso.—Hla. 1:2; 119:97.
Eminyakeni lemine leyendlulile, sacala kushicilela tinhlelo letimbili te-Sicongosekulindza, lokuluhlelo loluhanjiswako kanye nelwetfu—tsine boFakazi BaJehova kanye netifundvo tetfu teliBhayibheli letitfutfukako.
Mayelana namagazini lofundvwako, naku lokwashiwo sikhonti saJehova lesesinesikhatsi lesidze: “Ngabona kutsi muhle kakhulu lomagazini futsi ufinyelela inhlitiyo yami. Indlela emaciniso eBhayibheli lavetwa ngayo kulomagazini iyangitsintsa. Nginibonga kakhulu ngemsebenti wenu lomuhle.” Lomunye umzalwane wabhala watsi: “Ngiyakulangatelela kucitsa sikhatsi ngifundza loluhlelo lwalomagazini ngisebentisa i-‘Reference Bible.’” Siyetsemba kutsi nawe utiva ngendlela lefananako.
Njengobe ukhumbula, Sicongosekulindza besisolo sishicilelwa kusukela nga-1879, futsi loku kuphumelela ngesizatfu sekusekelwa ngumoya waJehova kanye nesibusiso sakhe. (Zak. 4:6) Kuleminyaka lengu-133 leyendlulile, kwentiwe tingucuko letinyenti esembonyweni salomagazini. Ngemnyaka wa-2012, luhlelo ngalunye lwamagazini lofundvwako lutawuba nesitfombe lesihle kakhulu lesiveta emaKhristu enta umsebenti wekushumayela, futsi loko kutasikhumbuta ngesabelo setfu lesivela kuNkulunkulu sekuniketa bufakazi lobuphelele ngeMbuso waJehova. (Imis. 28:23) Ekhasini lesibili, kutawuvela indzawo lesitfombe lesitsetfwe kuyo, kanye nenchazelo lemfisha ngaso. Njengobe umnyaka uchubeka, letitfombe titasikhumbuta kutsi bantfu baJehova bashumayela tindzaba letinhle “emhlabeni wonkhe.”—Mat. 24:14.
Ngutiphi letinye tingucuko letentiwe kulomagazini? Imibuto yekubuketa seyibekwe ekhasini lekucala lesihloko ngasinye lesifundvwako. Loko kutakuvetela emaphuzu layinhloko lokumelwe uwanakisise nawusafundza futsi utadisha lesihloko. Nanobe kunjalo, bachubi beSifundvo se-Sicongosekulindza batawuchubeka basebentisa lemibuto yekubuketa ekupheleni kwesifundvo. Lokunye lotakucaphela kutsi tikhala letiseceleni kwelikhasi ngalinye tikhulisiwe, futsi tinombolo temakhasi kanye netetigaba setigcamile.
Njengobe kuvetiwe kulomagazini walenyanga, sici lesisha lesitsi “Lokuvela Emtatjeni Wetfu,” sitakusita ubone tintfo letenteka emlandvweni walamuhla waboFakazi BaJehova. Ngetulu kwaloko, lokuhlangenwe nako kwalabanye kutawuhle kuvela ngephansi kwesihloko lesitsi “Batinikela Ngekutitsandzela.” Loko kutawuveta ngendlela lecacile injabulo kanye nekwenetiseka lokutfolwa bazalwane nabodzadze ngesizatfu sekukhonta lapho kunesidzingo lesikhulu sebamemeteli beMbuso.
Sifisa shengatsi ungakujabulela ngalokugcwele kucitsa sikhatsi sakho utadisha liVi laNkulunkulu ngelusito lwalomagazini.
Bashicileli
[Sitfombe ekhasini 3]
1879
[Sitfombe ekhasini 3]
1895
[Sitfombe ekhasini 3]
1931
[Sitfombe ekhasini 3]
1950
[Sitfombe ekhasini 3]
1974
[Sitfombe ekhasini 3]
2008