Yini Lebangele Kutsi Kushicilelwe Sicongosekulindza Lesentiwe Saba Melula?
SEKWENDLULE emashumi eminyaka emadvodza nebafati emhlabeni wonkhe bajabulela futsi bazuza elwatini lolusekelwe eBhayibhelini lolutfolakala ku-Sicongosekulindza. NgaJuly 2011, magazini wekucala lofundvwako we-Sicongosekulindza lesentiwe saba melula, washicilelwa ngelulwimi lwesiNgisi. Lomagazini wachaza: “Le-Sicongosekulindza sitawuba khona umnyaka munye kute sibone kutsi siyasebentiseka yini. Nangabe sisebentiseka, sitawuchubeka sishicilelwa.”
Nyalo siyajabula kunatisa kutsi sincume kuchubeka siwushicilela. Ngetulu kwaloko, ngekuhamba kwesikhatsi Sicongosekulindza lesentiwe saba melula sitawutfolakala ngesiFulentji, siPutukezi nangeSpanish.
LOKWENTA BANTFU BASITSANDZE
Ngemuva kwekutfola lomagazini lowentiwe waba melula, bantfu labanyenti eSouth Pacific babika kutsi: “Nyalo bazalwane sebakuvisisa konkhe lokushiwo Sicongosekulindza.” Lenye incwadzi yatsi: “Sikhatsi lebesisicitsa sibuka emagama lalukhuni, sichaza nemisho letsite, nyalo sisicitsa sitfola kucondza kuloko lokushiwo ngimibhalo lekhonjiwe nekutsi ihlobana njani nendzaba.”
Lomunye losandza kuphotfula ekolishi yaseMelika utsi: “Kwangitsatsa iminyaka lengu-18 ngikhuluma ngiphindze ngibhala lulwimi lolusezingeni lolusetulu. Ngangenwa ngumkhuba wekucabanga nekukhuluma ngendlela lelukhuni kube kute sidzingo sekwenta njalo. Ngabona kutsi kufanele ngente lushintjo lolukhulu endleleni lengicabanga ngiphindze ngikhulume ngayo.” Nyalo njengobe asangumshumayeli lokhutsele, naku lakubhala: “Sicongosekulindza lesentiwe saba melula sibe lusito kakhulu kimi. Indlela lesibhalwe ngayo ingente ngakwati kukhuluma ngendlela lemelula.”
Lomunye dzadze waseNgilandi lowabhajatiswa nga-1972, naku lakubhala akhuluma ngalomagazini: “Ngalesikhatsi ngifundza lomagazini wekucala lowashicilelwa, kwaba shengatsi Jehova uhleti eceleni kwami ungigacile futsi ngiwufundza naye lomagazini. Kwaba shengatsi ngubabe afundzela umntfwana wakhe indzaba letsite ngembikwekutsi alale.”
Lomunye dzadze eBethel yaseMelika losekwendlule iminyaka lengu-40 abhajatiswa utsi lomagazini lowentiwe waba melula ngalesinye sikhatsi umente waba nekucondza lokusha. Nasi sibonelo: Libhokisi lelitsi “Tinchazelo Temagama Latsite” lelikumagazini waSeptember 15, 2011 laniketa inchazelo ‘yesicumbi lesikhulu sabofakazi’ lokukhulunywa ngaso ku-Hebheru 12:1 ngalamavi latsi: “Bebabanyenti ngendlela yekutsi bekumatima kubabala.” Wachubeka watsi: “Loku kwangenta ngalicondza kahle lelivesi.” Mayelana nemihlangano yamaviki onkhe, lodzadze watsi: “Ngisho nobe umntfwana lomncane atifundza njengobe tinjalo timphendvulo takhe kulomagazini lowentiwe waba melula, atifanani naleto letikumagazini we-Sicongosekulindza lesivamile labanyenti labasuke bawuphetse. Timphendvulo talabantfwana tiba tinsha etilalelini.”
Lomunye dzadze loseBethel wabhala: “Ngikubuke ngalabovu kuva timphendvulo talabasebancane ebandleni. Magazini we-Sicongosekulindza lesentiwe saba melula ubasitile kute bakhulume ngekutetsemba. Indlela labaphendvula ngayo ingikhutsata kakhulu.”
Dzadze lowabhajatiswa nga-1984, naku lakushoko ngenjabulo lanayo ngalomagazini: “Ngiva shengatsi ubhalelwe mine. Ukwenta kube melula kukucondza loko lengikufundzako. Nyalo nginesibindzi sekuphendvula emhlanganweni weSifundvo se-Sicongosekulindza.”
BATALI BAWUJABULELA KAKHULU
Make wemfana loneminyaka lesikhombisa, watsi: “Kumchazela imisho leminyenti nasilungiselela Sifundvo se-Sicongosekulindza, bekusitsatsa sikhatsi kuphindze kusente sidzinwe.” Lomagazini lowentiwe waba melula ubasite njani? Uchubeka atsi: “Kungijabulisa kakhulu kutsi nyalo sewuyakhona kutifundzela tigaba futsi akuvisise loko lakufundzako. Njengobe emagama lasetjentisiwe amelula nemisho imifishane, akesabi. Sewucale nekutilungiselela yedvwana timphendvulo latatisho emihlanganweni, futsi nakuchubeka sifundvo se-Sicongosekulindza uhlale alalele sidzimate siphele.”
Make wentfombatanyana leneminyaka leyimfica budzala wabhala: “Ekucaleni bekudzingeka simsite ngetimphendvulo latatisho esifundvweni. Nyalo sewuyatitadishela. Akusenteki ngaso sonkhe sikhatsi sicitse sikhatsi lesinyenti simchazela loko lakufundzako. Ngesizatfu sekutsi lomagazini sewentiwe waba melula, nyalo uba nencenye esifundvweni se-Sicongosekulindza.”
BATIVA NJANI BANTFWANA NGALOMAGAZINI?
Bantfwana labanyenti beva shengatsi Sicongosekulindza lesentiwe saba melula sibhalelwe bona. Rebecca loneminyaka lelishumi nakubili watsi: “Ngicela lomagazini uchubeke ushicilelwa. Ngitsandza lencenye lekuwo letsi ‘Tinchazelo Temagama Latsite.’ Umelula kakhulu kubantfwana.”
Nicolette loneminyaka lesikhombisa budzala yena utsi: “Bekumatima ngami kucondza loko lokushiwo Sicongosekulindza. Nyalo sengiyakwati kuphendvula kanyenti esifundvweni.” Emma loneminyaka leyimfica wabhala: “Lomagazini ube lusito lolukhulu kimi nakumnaketfu loneminyaka lesitfupha. Nyalo sesikuva kahle loko lokufundziswako! Siyabonga!”
Kuyacaca kutsi labanyenti bayazuza kulomagazini we-Sicongosekulindza losebentisa emagama lavakala ncono nemisho lemelula. Wenetisa tidzingo talabanyenti futsi utawuchubeka ushicilelwa kanye nalona lovamile lobewushicilelwa kusukela nga-1879.