‘INdvodzana Iyafuna Kumembula UYise’
“Kute lowatiko kutsi uYise ngubani ngaphandle kweNdvodzana nalabo iNdvodzana lefuna [kumembula] kubo.”—LUK. 10:22.
UNGAPHENDVULA NJANI?
․․․․․
Kungani Jesu bekakufanelekela kwembula Babe wakhe?
․․․․․
Jesu wamembula njani Babe wakhe kulabanye?
․․․․․
Ungamlingisa ngatiphi tindlela Jesu nawembula Babe?
1, 2. Ngumuphi umbuto lodide bantfu labanyenti, futsi kungani?
‘UNGUBANI Nkulunkulu?’ Lombuto udida bantfu labanyenti. Sibonelo saloku kutsi bantfu labanyenti labatibita ngekutsi bangemaKhristu bakholelwa kutsi Nkulunkulu unguMtsatfu Amunye, labanye bayavuma kutsi lemfundziso angeke uyicondze. Lomunye umbhali longumfundisi watsi: “Imfundziso yaMtsatfu Amunye angeke uyichaze ngobe kunetintfo umuntfu langaticondzi ngayo.” Ngakulokunye, bantfu labanyenti labemukela imfundziso yekutigucukela kwemvelo, bakholelwa kutsi akekho Nkulunkulu. Batsi tintfo letidaliwe letimangalisako tativelela. Ngisho nobe kunjalo, kunekutsi aphike kutsi Nkulunkulu ukhona, Charles Darwin, watsi: “Siphetfo lesincono kumane ngitsi akusimelula ngemuntfu kucondza tonkhe tintfo letidaliwe.”
2 Bantfu labanyenti, ngisho nobe banatiphi tinkholelo, bake bacabanga ngemibuto lemayelana nekuba khona kwaNkulunkulu. Nanobe kunjalo, nabehluleka kutfola imphendvulo lebenetisako, linyenti labo liyayekela kufuna Nkulunkulu. Kuliciniso kutsi Sathane “uphumphutsekise tingcondvo tabo.” (2 Khor. 4:4) Asingabati kutsi bantfu labanyenti abanakwa futsi bashiywe badidekile mayelana nekutsi ungubani Babe, longuMdali wemhlaba wonkhe.—Isa. 45:18.
3. (a) Ngubani lowasembulela uMdali? (b) Ngumiphi imibuto lesitawucoca ngayo?
3 Nanobe kunjalo, kubalulekile kutsi bantfu bafundze liciniso ngaNkulunkulu. Kungani kufanele bente njalo? Kungobe “wonkhe umuntfu lotibika abite libito leNkhosi [Jehova],” uyawusindziswa. (Rom. 10:13) Kubita libito laNkulunkulu kufaka ekhatsi kwati Jehova njengeMuntfu. Jesu Khristu wavetela bafundzi bakhe lokwatiswa lokubalulekile. Wabembulela Babe wakhe. (Fundza Lukha 10:22.) Kungani Jesu akwati kwembula Babe wakhe kwendlula nobe ngubani? Wakwenta njani loko? Singamlingisa njani Jesu ekwembuleni Babe kulabanye? Ase sicoce ngalemibuto.
JESU KHRISTU—NGUYE LOFANELEKAKO
4, 5. Kungani Jesu abekufanelekela kahle kwembula Babe wakhe?
4 Jesu abekufanelekela ngalokukhetsekile kutsi embule Babe wakhe. Kungani? Kungobe ngembikwekutsi kudalwe konkhe lokukhona, sidalwa semoya lesagcina sesibitwa ngekutsi nguJesu, saba “yiNdvodzana yaNkulunkulu lekukuphela kwayo.” (Joh. 1:14; 3:18) Lesi bekusikhundla lesikhetsekile! Ngesikhatsi tisengakadalwa letinye tintfo, iNdvodzana yahlala eceleni kwaBabe wayo ifundza Ngaye kanye nangetimfanelo taKhe. Kungenteka kutsi Babe kanye neNdvodzana yakhe bebacoca ngetintfo letinyenti futsi baba nebuhlobo lobusedvute sikhatsi lesidze. (Joh. 5:20; 14:31) Kuyacaca-ke kutsi iNdvodzana yatfola lwati lolunyenti ngebuntfu baBabe wayo.—Fundza Kholose 1:15-17.
5 Babe wakhetsa iNdvodzana yakhe kutsi ibe ngumkhulumeli wakhe, yaba ‘nguLivi waNkulunkulu.’ (Semb. 19:13) Ngako-ke, Jesu abekufanelekela kahle kwembula Babe wakhe kulabanye bantfu. Umbhali weliVangeli Johane uchaza Jesu ‘longuLivi,’ ngekutsi ‘usesifubeni seYise.’ (Joh. 1:1, 18) Ngalamavi, Johane abekhuluma ngaloko lobekuvame kwentiwa esikhatsini sakhe nakudliwa. Sivakashi besihlala eceleni kwemuntfu lesimvakashele. Ngekwenta kwaso njalo, bekuba melula kutsi bacoce. Ngendlela lefananako, kuba kweNdvodzana ‘esifubeni seYise’ bekwenta kutsi ikwati kucoca naYe.
6, 7. Buhlobo baBabe kanye neNdvodzana bachubeka njani bukhula?
6 Buhlobo lobebusemkhatsini waBabe kanye neNdvodzana bachubeka bukhula. NgaleNdvodzana ‘Nkulunkulu abenentfokoto lenkhulu onkhe emalanga.’ (Fundza Taga 8:22, 23, 30, 31.) Kuvana kwabo kwacina kakhulu njengobe bebachubeka basebenta ndzawonye futsi neNdvodzana ifundza kulingisa timfanelo taBabe wayo. Ngesikhatsi kudalwa letinye tidalwa letihlakaniphile, iNdvodzana yabona indlela Jehova lasebentelana ngayo nato futsi nekujabulela kwayo buntfu baNkulunkulu kwakhula.
7 Ngisho nensayeya yaSathane lebeyimelene nekubusa kwaJehova lokulungile, yaniketa iNdvodzana litfuba lekubona indlela Jehova laluveta ngayo lutsandvo, kulunga, kuhlakanipha kanye nemandla nakahlangabetana netimo letimatima. Akungabateki kutsi loku kwasita Jesu wakwati kubeketelela bumatima lahlangabetana nabo emsebentini wakhe wekushumayela.—Joh. 5:19.
8. Kulandzisa kwemaVangeli kusisita njani kutsi sifundze kabanti ngetimfanelo taBabe?
8 Ngesizatfu sebuhlobo bayo naJehova, iNdvodzana yamchaza kahle kakhulu Babe wayo kwendlula nobe ngubani. Ayikho lenye indlela yekwati Babe ngaphandle kwekuhlola loko iNdvodzana yakhe lekukuphela kwayo leyafundzisa ngako yaphindze yakwenta. Asesifanekise: Ase ucabange kutsi kungaba matima kangakanani ngatsi kubona loko lokushiwo ligama lelitsi “lutsandvo,” nangabe simane nje sibuka inchazelo yalo kusichazamagama. Kodvwa ngekuhlola kulandzisa lokusemaVangelini lokumayelana nemsebenti waJesu kanye nendlela labaphatsa ngayo labanye bantfu, singatfola lwati lolunyenti mayelana nekutsi “Nkulunkulu ulutsandvo.” (1 Joh. 4:8, 16) Singenta lokufananako nangaletinye timfanelo taNkulunkulu Jesu latembulela bafundzi bakhe ngesikhatsi alapha emhlabeni.
INDLELA JESU LAMEMBULA NGAYO BABE WAKHE
9. (a) Ngutiphi tindlela letimbili Jesu lamembula ngato Babe wakhe? (b) Shano sibonelo lesiveta indlela Jesu lamembula ngayo Babe wakhe ngetimfundziso takhe.
9 Jesu wamembula njani Babe kubafundzi bakhe kanye nakulabo labebatawuba balandzeli bakhe? Loko wakwenta ngetindlela letimbili: ngetimfundziso takhe kanye nangendlela labekatiphatsa ngayo. Ase sicale sicoce ngetimfundziso taJesu. Loko Jesu lakufundzisa balandzeli bakhe kwaveta kutsi abeyati imicabango, imiva kanye netindlela taBabe wakhe. Nasi sibonelo: Jesu wafananisa Babe wakhe nemnikati wemhlambi lohamba ayofuna imvu ledukile. Jesu watsi lapho lomnikati atfola lemvu lelahlekile, ‘utfokota kakhulu ngayo kunaleti letingu-99 lebetingakalahleki.’ Wawusho kutsini lomfanekiso? Jesu wawuchaza: “Kanjalo-ke akusiyo intsandvo yeYihlo losezulwini kutsi kubhubhe nome ngabe munye kulaba labancane.” (Mat. 18:12-14) Yini longayifundza ngaJehova kulomfanekiso? Ngisho nobe ngaletinye tikhatsi utiva ungakabaluleki futsi unganakwa, Babe wakho wasezulwini unendzaba nawe futsi uyakukhatsalela. Emehlweni akhe ungulomunye walaba “labancane.”
10. Jesu wamembula njani Babe wakhe ngendlela labetiphatsa ngayo?
10 Indlela yesibili Jesu lamembula ngayo Babe kubafundzi bakhe, yindlela labetiphatsa ngayo. Ngesikhatsi umphostoli Filiphu atsi kuJesu: “Sibonise uYihlo,” Jesu watsi kuye: “Lowo losabone mine, umbonile naBabe.” (Joh. 14:8, 9) Ase ucabange ngaletinye tibonelo Jesu lativeta ngayo timfanelo taBabe wakhe. Ngesikhatsi indvodza leyayinebulephelo incenga Jesu kutsi ayelaphe, Jesu watsintsa lendvodza “leyayinebulephelo” watsi kuyo: “Ngiyatsandza; hlambuluka.” Ngemuva kwekwelashwa, lendvodza yawabona emandla aJehova kuloko Jesu lakwenta. (Luk. 5:12, 13) Nangesikhatsi Lazaro afile, kungenteka kutsi bafundzi basibona sihawu saJehova ngesikhatsi Jesu ‘abibitseka, adzabuka kakhulu’ futsi ‘akhala.’ Nanobe Jesu bekati kutsi utamvusa Lazaro, wabuva buhlungu lobebuviwa ngemalunga emndeni waLazaro nebangani bakhe. (Joh. 11:32-35, 40-43) Akungabateki kutsi nawe kukhona kulandzisa lokutsandzako lokuseBhayibhelini lokukusita ubone Babe lonemusa endleleni Jesu labephila ngayo.
11. (a) Ngalesikhatsi Jesu ahlanta lithempeli, yini layembula ngaBabe wakhe? (b) Kungani kulandzisa kwaJesu lokumayelana nekuhlanta lithempeli kusicinisa?
11 Nanobe kunjalo, yini loyifundzako ngekuhlanta kwaJesu lithempeli? Sibone ngemehlo engcondvo lesimo: Jesu weluka siswebhu ngetintsambo, futsi ucosha bonkhe labatsengisa tinkhomo netimvu. Ucitsa imali yebantjintji futsi ugenula nematafula abo. (Joh. 2:13-17) Loko lakwenta kwakhumbuta bafundzi bakhe emavi lasiphrofetho lashiwo yiNkhosi Davide nayitsi: “Ngidliwa kushisekela indlu yakho.” (Hla. 69:9) Ngekutsatsa sinyatselo lesicinile, Jesu waveta sifiso sakhe lesikhulu sekumelela kukhonta kweliciniso. Uyabubona yini buntfu baBabe wakhe kulokulandzisa? Loku kusikhumbuta kutsi Nkulunkulu akagcini nje ngekuba nemandla ekucedza bubi emhlabeni, kodvwa unesifiso lesijulile sekubucedza. Kubona indlela Jesu lenta ngayo nakabona bubi, kusembulela indlela naBabe lativa ngayo njengobe abuka bubi lobandzako kulomhlaba. Loku kuyasicinisa natsi nangabe sibeketelela kungalungi.
12, 13. Yini longayifundza ngaJehova endleleni Jesu labaphatsa ngayo bafundzi bakhe?
12 Ase sihlole lesinye sibonelo—indlela Jesu labaphatsa ngayo bafundzi bakhe. Bachubeka baphikisana ngekutsi ngubani lomkhulu emkhatsini wabo. (Mak. 9:33-35; 10:43; Luk. 9:46) Lokuhlangenwe nako Jesu lakutfola ngesikhatsi anaBabe wakhe, kwamsita wayati indlela Jehova lativa ngayo ngalomkhuba wekutikhukhumeta. (2 Sam. 22:28; Hla. 138:6) Ngetulu kwaloko, Jesu bekake wawubona umkhuba lonjalo uvetwa nguSathane Develi. Lesidalwa lesitikhukhumetako besinaka kakhulu kuba neludvumo kanye nesikhundla. Ngaleso sizatfu, Jesu weva buhlungu nakabona lomoya wekuncintisana uchubeka kubafundzi bakhe labekabaceceshe kahle. Loyo moya wawukhona ngisho nakulabo labekabakhetse kutsi babe baphostoli. Bachubeka bawubonisa wadzimate wafa Jesu. (Luk. 22:24-27) Nanobe kunjalo, Jesu wachubeka abayala ngemusa futsi angaphelelwa litsemba lekutsi batawushintja balingise yena babe nesimo sengcondvo sekutfobeka.—Fil. 2:5-8.
13 Uyasibona yini sandla saBabe sisebenta endleleni Jesu lawulungisa ngayo ngekubeketela umkhuba longakalungi kubafundzi bakhe? Uyambona yini Babe endleleni Jesu labetiphatsa aphindze akhuluma ngayo, longabashiyi bantfu bakhe ngisho nobe benta emaphutsa tikhatsi letinyenti? Kukhumbula timfanelo taNkulunkulu akusikhutsati yini kutsi sisondzele kuye sivume emaphutsa etfu?
INDVODZANA YEMBULA BABE WAYO NGEKUTITSANDZELA
14. Jesu waveta njani kutsi abefuna kwembula Babe wakhe?
14 Babusi labanyenti labacindzetelako betama kulawula bantfu futsi babafihlele imininingwane letsite. Ngalokwehlukile, Jesu abefuna kucocela labanye ngaBabe wakhe futsi amembule kubo. (Fundza Matewu 11:27.) Ngetulu kwaloko, Jesu waniketa bafundzi bakhe ‘kucondzisisa kahle, khona batewumati Nkulunkulu [Jehova] longuye sibili.’ (1 Joh. 5:20) Kusho kutsini loko? Jesu wavula tingcondvo tebalandzeli bakhe kute bakwati kucondza timfundziso takhe letimayelana naBabe wakhe. Akazange amfihle Babe wakhe ngekufundzisa ngekutsi unguMtsatfu Amunye.
15. Kungani Jesu angabatjelanga bafundzi bakhe leminye imininingwane ngaBabe wakhe?
15 Jesu wakwembula konkhe yini labekwati ngaBabe wakhe? Cha, ngekuhlakanipha akazange abatjele konkhe labekwati bafundzi bakhe. (Fundza Johane 16:12.) Kungani enta njalo? Kungobe ngaleso sikhatsi ‘bebangeke bakwati kulutfwala’ lololwati. Njengobe Jesu achaza, lwati lolunyenti beliyowembulwa nakufika “umeluleki,” umoya longcwele lobewutabacondzisa “kulo lonkhe liciniso.” (Joh. 16:7, 13) Njengobe nebatali labahlakaniphile bangeke babatjele leminye imininingwane bantfwana babo kute kube ngulapho sebakhule ngalokwanele kutsi bayicondze, naJesu walindza bafundzi bakhe badzimate bafika esigabeni sekuvutfwa futsi sebakulungele kucondza emaciniso latsite ngaBabe wakhe. Bekakwati kulinganiselwa kwetingcondvo tabo.
LINGISA JESU NGEKUSITA LABANYE KUTSI BATI JEHOVA
16, 17. Kungani ungakhona kwembula Babe kulabanye?
16 Nangabe sewati umuntfu lotsite kakhulu futsi ubujabulela nebuntfu bakhe, loko akukwenti yini kutsi utjele labanye ngaye? Ngesikhatsi alapha emhlabeni, Jesu wakhuluma ngaBabe wakhe. (Joh. 17:25, 26) Singakwati yini natsi kumlingisa nasembula Jehova kulabanye?
17 Njengobe sesibonile, Jesu abenelwati lolujulile ngaBabe wakhe kwendlula nobe ngubani. Nanobe kunjalo, abefuna kucocela labanye loko labekwati, waze wanika nebalandzeli bakhe sikhatsi sekutsi bacondze tici letijulile tebuntfu baNkulunkulu. Ngelusito lwaJesu, singakwati kubonga Babe wetfu ngendlela labanye bantfu labangambongi ngayo lamuhla. Siyajabula ngekutsi Jesu usembulele Babe wakhe ngekutitsandzela ngetimfundziso takhe kanye nendlela latiphatsa ngayo. Ecinisweni, siyatigcabha ngekwati Babe. (Jer. 9:24; 1 Khor. 1:31) Njengobe silwe kamatima kute sisondzele kuJehova, naye sewuvele usondzele kitsi. (Jak. 4:8) Ngako-ke, nyalo sesingakwati kucocela labanye ngaBabe wetfu. Singakwenta njani loko?
18, 19. Ungamembula ngatiphi tindlela Babe kulabanye? Chaza.
18 Kufanele silingise Jesu ngekwembula Babe ngemavi etfu nangetento. Khumbula kutsi bantfu labanyenti lesihlangana nabo ensimini abati kutsi Nkulunkulu ungubani. Kungenteka kutsi umbono wabo ngaNkulunkulu uphatanyiswe timfundziso temanga. Ngako-ke, singabacocela loko lesikwatiko ngelibito laNkulunkulu, injongo yakhe ngebantfu kanye nangebuntfu bakhe njengobe bembulwe eBhayibhelini. Ngetulu kwaloko, singacoca nemakholwa lesikanye nawo ngekulandzisa lokuseBhayibhelini lokwembula buntfu baNkulunkulu ngendlela lebesingayati. Ngaleyo ndlela, nawo angazuza.
19 Ungamembula njani Babe ngekutiphatsa kwakho njengobe wetama kulingisa Jesu? Bantfu nababona kutsi indlela lesitiphatsa ngayo iveta lutsandvo lwaKhristu, batawusondzela kuBabe kanye nakuJesu. (Ef. 5:1, 2) Umphostoli Pawula usikhutsata kutsi ‘sihambe etinyatselweni takhe, njengobe naye ahamba etinyatselweni taKhristu.’ (1 Khor. 11:1) Kulilungelo lelikhulu kusita bantfu kutsi babone Jehova endleleni tsine lesitiphatsa ngayo. Ngako-ke, shengatsi singachubeka silingisa Jesu ngekwembula Babe kulabanye.