Batinikela Ngekutitsandzela—E-Ecuador
UMZALWANE losemusha wase-Italy abecindzetelwa. Abesandza kuphotfula esikolweni aphase nangemalengiso etifundvweni takhe. Tihlobo nabothishela bakhe bebamkhutsata kutsi aphishanekele imfundvo lephakeme. Eminyakeni lembalwa leyendlulile, Bruno abetinikele kuJehova, wetsembisa kutsi utawenta intsandvo yaNkulunkulu ite kucala ekuphileni kwakhe. Ngusiphi sincumo lasenta? Uyachaza: “Ngathandaza kuJehova ngamtjela kutsi ngifuna kuphila ngekuvumelana nekutinikela kwami, futsi yena ete kucala ekuphileni kwami. Kodvwa ngamtjela kutsi angifuni kuphila imphilo lengajabulisi, ngifuna kujabulela imisebenti leyehlukehlukene enhlanganweni yakhe.”
Ngemuva kweminyaka lembalwa, Bruno watfutsela e-Ecuador, leseNingizimu yeMelika. Utsi: “Jehova waphendvula umthandazo wami ngendlela lebengingakayilindzeli.” Bruno watsi nakefika e-Ecuador wamangala nakahlangana nalabanye labasebasha labanyenti labatfutsele kuleyo ndzawo kute bakhonte Jehova ngalokugcwele.
BANTFU LABASEBASHA ‘LABALINGA JEHOVA’
Njengalabanye bantfu labasebasha labatinkhulungwane labasemhlabeni wonkhe, Bruno wemukela simemo saJehova lesitsi: “Ase ningilinge, . . . nitewubona kutsi ngingeke yini nginivulele emafasitelo asezulwini ekutfulula, nginitfululele tibusiso letinyenti.” (Mal. 3:10) Ngesizatfu sekutsi batsandza Nkulunkulu, bakhetsa ‘kumlinga’ ngekunikela ngesikhatsi sabo, emandla nangetintfo labanato kute basekele umsebenti wakhe emaveni lanesidzingo lesikhulu sebamemeteli beMbuso.
Ngemuva kwekufika endzaweni lokufanele tishumayele kuyo, letisebenti tekutitsandzela tatibonela kutsi “kuvuna kukhulu, kodvwa tisebenti timbalwa.” (Mat. 9:37) Nasi sibonelo: Jaqueline wase-Germany wabhalela ligatja lase-Ecuador watsi: “Sekuphele iminyaka lengetulu kwalemibili ngikhonta e-Ecuador, futsi senginetifundvo teliBhayibheli letingu-13. Letine tato tiba khona njalo emihlanganweni yelibandla. Akujabulisi yini loko?” Chantal wase-Canada uyalandzisa: “Nga-2008, ngatfutsela endzaweni lesedvute nelwandle lwase-Ecuador, lebeyinelibandla linye. Nyalo kunemabandla lamatsatfu kulendzawo nemahlahlandlela langetulu kwa-30. Akukho lengingakucatsanisa nekubona bantfu labasandza kuhlanganyela batfutfuka.” Uchubeka atsi: “Ngisandza kutfutsela edolobheni lelisetiNtsabeni tase-Andes letiphakeme ngemamitha langu-2 743. Lelidolobha linebantfu labangetulu kwa-75 000, kodvwa linelibandla linye. Bantfu labahlala kulo bayatitsandza tindzaba letimnandzi. Ngiyakujabulela kushumayela kulo.”
TINSAYEYA LETIBA KHONA
Kuliciniso kutsi kukhonta kulamanye emave kunetinsayeya letinyenti. Labanye bantfu labasebasha bahlangabetana netilingo basengakatfutsi nekutfutsa. Kayla wase-United States utsi: “Imibono leliphutsa yebazalwane labahlose lokuhle basebandleni lasekhaya beyingicedza emandla. Bebangacondzi kutsi kungani ngifuna kukhonta njengelihlahlandlela kulelinye live. Ngaletinye tikhatsi, loko bekungenta ngitibute kutsi, ‘Ngenta sincumo lesihle yini?’” Nobe kunjalo, Kayla wakhetsa kutfutsa. Uyachaza: “Kuthantaza njalo kuJehova nekucoca sikhatsi lesidze nebazalwane nabodzadze labavutsiwe, kungisitile ngabona kutsi Jehova uyababusisa labo labatinikela ngekutitsandzela.”
Kulabanyenti, kufundza lulwimi lolusha kuyinsayeya. Siobhan wase-Ireland uyakhumbula: “Kwakumatima kimi kuveta indlela lebengitiva ngayo. Kwadzingeka kutsi ngibe nesineke, ngifundze lolulwimi ngekutimisela futsi bengivele ngitihleke nangenta emaphutsa.” Anna wase-Estonia utsi: “Kwetayela kushisa lokukhulu, tintfuli nekuba bete kwetindzawo tekugezela letikahle, kuncono kunekufundza Spanish. Ngaletinye tikhatsi, bengivele ngifise shengatsi ngingayekela. Kwadzingeka kutsi ngitifundzise kungawanaki emaphutsa lengiwentako, kodvwa nginakisise intfutfuko yami.”
Lenye insayeya kukhumbula ekhaya. Jonathan wase-United States uyavuma: “Masinyane ngemuva kwekufika kuleyo ndzawo, ngaphelelwa yinjabulo ngobe besengehlukene nebangani bami nemndeni wakitsi. Kodvwa lemiva lenjalo ngayincoba ngekutsi ngichubeke ngiba nesifundvo seliBhayibheli lengitichubela sona futsi ngishumayela. Ngemuva kwesikhashana, lokuhlangenwe nako lokumnandzi lebengikutfola ensimini nebangani labasha lengabatfola ebandleni, kwangisita ngaphindze ngajabula.”
Lenye insayeya timo tekuphila. Kuliciniso kutsi timo tendzawo lotfutsele kuyo angeke tifane naleto lotetayele. Beau wase-Canada uyasitjela: “Nawuseveni lakini, awukhatsateki ngetintfo letifanana nagezi nobe emanti. Kodvwa lapha gezi uhle uhamba nemanti aphele kubuye ngemuva kwesikhatsi.” Buphuya, tintfo letingekho esimeni lesikahle tekwetfwala sive nekungatfoli imfundvo kutintfo letivamile emaveni lasatfutfuka. Ines wase-Austria ubeketelela timo letinjalo ngekutsi anake buntfu lobuhle lobuvetwa bantfu bakuleyo ndzawo. Utsi: “Bemukela bantfu ngelutsandvo, banesineke, bayatsandza kusita labanye futsi batfobekile. Lokuhle kakhulu kutsi bayafuna kufundza ngaNkulunkulu.”
“TIBUSISO LETINYENTI”
Njengobe bonkhe laba labasebasha labakhonta e-Ecuador badzela lokutsite, bayatibonela kutsi Jehova ubanika “lokukhulu kakhulu kunako konkhe” labakulindzele. (Ef. 3:20) Kuliciniso kutsi bayabona nekutsi batfole ‘tibusiso letinyenti baze behluleka kutfola indzawo leyenele yekutigcina.’ (Mal. 3:10) Nayi indlela labativa ngayo ngemsebenti wabo wekushumayela:
Bruno: “Ngacale ngakhonta endzaweni lenhle kakhulu lese-Ecuador. Ngemuva kwaloko, ngasita ekukhuliseni sakhiwo selihhovisi leligatja lase-Ecuador. Nyalo ngiseBethel. Ngesikhatsi ngise-Italy, ngenta sincumo sekubeka Jehova kucala ekuphileni kwami, futsi uyasifeza sifiso sami sekujabulela imisebenti leyehlukehlukene enhlanganweni yakhe.”
Beau: “Sengisondzelene kakhulu naJehova, ngesizatfu sekutsi lapha e-Ecuador ngiyakhona kusebentisa sikhatsi sami sonkhe ngenta imisebenti yaJehova. Ngesikhatsi lesifananako, ngiphindze ngijabulele kuvakashela tindzawo letinhle kakhulu—lokuyintfo lebengifisa kuyenta.”
Anna: “Bengingacabangi kutsi njengadzadze longakashadi, ngingakhona kujabulela imphilo lefanana neyetitfunywa telivangeli. Kodvwa nyalo sengiyabona kutsi loko kungenteka. Ngiyabonga ngesibusiso saJehova, ngobe ngijabulela kwenta bantfu babe bafundzi, ngakhe emaHholwa eMbuso futsi senginebangani labasha.”
Elke: “Ngesikhatsi ngiseveni lakitsi e-Austria, bengivame kuthantaza kuJehova ngicele kutsi angiphe lokungenani sinye sifundvo seliBhayibheli. Lapha senginetifundvo teliBhayibheli letingu-15. Kungijabulisa kakhulu kubona bantfu lengibafundzela liBhayibheli batfutfuka.”
Joel: “Kujabulisa kakhulu kuya endzaweni longayati kute ukhonte Jehova. Ufundza kwetsembela kuye kakhulu futsi kuyajabulisa nekumbona abusisa imetamo yakho. Ngemnyaka wami wekucala ngilapha, ngisuka e-United States, licembu lebengikulo belinebamemeteli labasitfupha, kodvwa nyalo sekunebamemeteli labangu-21. ESikhumbutweni bekunebantfu labangu-110.”
KUTSIWANI NGAWE?
Nine bazalwane nabodzadze labasha, timo tenu tiyanivumela yini kutsi niyokhonta endzaweni lenesidzingo lesikhulu sebamemeteli beMbuso? Kuliciniso kutsi kwenta sincumo lesikhulu kangaka, kudzinga uhlelisise kahle. Ngetulu kwaloko, kubalulekile kutsi ube nelutsandvo ngaJehova nangabomakhelwane kute ukwati kwenta lesincumo. Nangabe unalo lolotsandvo futsi ufaneleka, thantaza kuJehova ngebucotfo mayelana nekumkhonta kulamanye emave. Khuluma nebatali bakho labangemaKhristu kanye nalabadzala belibandla ngalesifiso sakho. Loko kungakusita uphetse ngekutsi nawe ungakwati kuhlanganyela kulomsebenti longcwele, lojabulisako nalowenetisako.
[Emavi lacashuniwe lasekhasini 3]
“Kuthantaza njalo kuJehova kanye nekucoca sikhatsi lesidze nebazalwane nabodzadze labavutsiwe, kungisitile ngabona kutsi Jehova uyababusisa labo labatinikela ngekutitsandzela.”—Kayla wase-United States
[Libhokisi/Sitfombe ekhasini 6]
Tindlela tekulungiselela kuyokhonta kulelinye live
• Bani nesifundvo lotichubela sona njalo
• Buketa Umsebenti Wetfu WeMbuso wa-August 2011, emakhasini 4-6
• Khuluma nalabo labake bakhonta kulamanye emave
• Yenta lucwaningo ngemasiko nangemlandvo waleyo ndzawo lofuna kutfutsela kuyo
• Fundza lulwimi lwaleyo ndzawo
[Libhokisi/Sitfombe ekhasini 6]
Labanye labakhonta kulamanye emave bayatisekela ngetimali ngekutsi . . .
• basebente tinyanga letimbalwa umnyaka ngamunye eveni labo
• bacashise indlu yabo nobe libhizinisi
• bente imisebenti yabo nge-Internet
[Titfombe emakhasini 4, 5]
1 Jaqueline wase-Germany
2 Bruno wase-Italy
3 Beau wase-Canada
4 Siobhan wase-Ireland
5 Joel wase-United States
6 Jonathan wase-United States
7 Anna wase-Estonia
8 Elke wase-Austria
9 Chantal wase-Canada
10 Ines wase-Austria