‘Ungawelela Yini EMasedoniya’?
1. Yini leyabangela Pawula kanye nalabekahamba nabo kutsi baye eMasedoniya?
1 Ngemnyaka wa-49 C.E., umphostoli Pawula wesuka e-Antiyokhi yaseSiriya watsatsa luhamba lwesibili lwemsebenti wetitfunywa telivangeli. Inhloso yakhe kwakukuya e-Efesu nakulamanye emadolobha ase-Asia Minor. Kodvwa-ke ngembono, watfola simemo ‘sekwewelela eMasedoniya.’ Yena kanye nalabekahamba nabo basemukela ngenjabulo lesimemo futsi baba nelilungelo lekusungula libandla lekucala kuleso sifundza. (Imis. 16:9, 10; 17:1, 2, 4) Lamuhla, kuletinye tincenye tensimi emhlabeni kunesidzingo lesikhulu sebavuni. (Mat. 9:37, 38) Ungakhona yini kuyewusita khona?
2. Kungani labanye bangakucabangi kutfutsela kulelinye live?
2 Mhlawumbe unaso sifiso lesifanana nesaPawula sekuba sitfunywa selivangeli, kodvwa-ke usengakacabangisisi ngalendzaba yekutfutsela kulelinye live. Kusenekwenteka kutsi angeke ukwati kutfola kuceceshwa kwaseGileyadi ngobe sewukhulile ngeminyaka, ungudzadze losengakashadi, nobe unebantfwana labasebancane. Mhlawumbe awukakucabangeli kutfutsela kulelinye live ngobe ungetsembi kutsi utawukhona kufundza lolunye lulwimi. Kungenteka nekutsi awuhlali eveni lakho ngetizatfu temsebenti, lokukwenta ungabate kutfutsela kulelinye live. Ngemuva kwekuyicabangela ngemthandazo lendzaba, ungase ubone kutsi ungatilungisa njani timo takho kute ukhone kutfutsela kulelinye live lapho kunesidzingo khona.
3. Kungani kuceceshelwa kuba sitfunywa selivangeli kungesiyo intfo ledzingekako kute ushumayele ngemphumelelo kulelinye live?
3 Kudzingeka Kutsi Uceceshelwe Kuba Sitfunywa Selivangeli Yini? Yini leyasita Pawula kanye nalabekahamba nabo kutsi baphumelele? Betsembela kuJehova nasemoyeni wakhe longcwele. (2 Khor. 3:1-5) Ngako-ke, ngisho nobe timo takho tingakuvumeli kutsi utfole kuceceshwa lokukhetsekile, usengashumayela ngemphumelo kulelinye live. Khumbula kutsi utfola kuceceshwa lokuchubekako eSikolweni Semsebenti WemaKhristu kanye naseMhlanganweni Wemsebenti. Nangabe unemgomo wekuya eGileyadi nobe kulesinye sikolwa, kutfutsela kwakho kulelinye live ngenjongo yekuba sitfunywa selivangeli kutawukunika lokuhlangenwe nako lokutawukusita nangabe umenyelwa kutfola kuceceshwa lokwengetiwe.
4. Kungani lasebakhulile kungakafaneli batikhobose nabacabanga kuyewushumayela kulelinye live?
4 Lasebakhulile: EmaKhristu lavutsiwe lasakhulile futsi lanemphilo lenhle, angaba lusito lolukhulu emaveni lapho kunesidzingo khona. Sewuwutsetse yini umhlalaphansi? Labanye labatfola imali lencane yempenisheni bayakhona kuphila ngayo, ngobe tidzingo tekuphila letifaka ekhatsi temphilo letisezingeni lelisetulu tivame kungabiti kakhulu eveni lelisatfutfuka, kunaseveni labasuka kulo.
5. Landzisa lokuhlangenwe nako kwemzalwane lowatsatsa umhlalaphansi wase utfutsela kulelinye live.
5 Umzalwane waseveni lelikhuluma siNgisi losewatsatsa umhlalaphansi, longulomdzala nelihlahlandlela, watfutsela endzaweni lenetivakashi letinyenti leseNingizimu lesemphumalanga ye-Asia kute ayewusita licembu lesiNgisi lelinebamemeteli labayimfica. Lelicembu lashumayela kubantfu labangu-30 000 labavela kulamanye emave labahlala kulendzawo. Kungakapheli iminyaka lemibili, labangu-50 bebaba khona emihlanganweni. Lomzalwane wabhala: “Kutfutsela kulendzawo kungente ngatfola tibusiso letinyenti. Angeke ngikhone nekutilandzisa tonkhe ngendlela letitinyenti ngayo!”
6. Landzisa lokuhlangenwe nako kwadzadze losengakashadi lowatfutsela kulelinye live lelinesidzingo lesikhulu.
6 Bodzadze Labangakashadi: Jehova usebentise bodzadze ngendlela lemangalisa kakhulu ekusakateni tindzaba letinhle emaveni lanesidzingo lesikhulu. (Hla. 68:11) Lomunye dzadze longakashadi losemusha abenemgomo wekwandzisa umsebenti wakhe wekushumayela ngekutsi aye kulelinye live, kodvwa batali bakhe bebakhatsateke kakhulu ngekuphepha kwakhe. Ngako-ke wakhetsa kuya eveni lelinekuthula futsi lelingakaphuyi. Wabhalela lihhovisi leligatja futsi watfola lusito nemininingwane labeyidzinga. Kuleminyaka lesitfupha layihlala kulelo live, watfola tibusiso letinyenti. Watsi: “Ekhaya bengingatfola tifundvo teliBhayibheli letimbalwa. Kodvwa-ke kusebenta lapho kunesidzingo lesikhulu khona kungente ngaba netifundvo letinyenti futsi ngalitfutfukisa kakhulu likhono lami lekufundzisa.”
7. Landzisa lokuhlangenwe nako kwemndeni lowatfutsela kulelinye live.
7 Imindeni: Kuba nebantfwana kungakuvimba yini kutsi ungayi kuyewushumayela kulelinye live? Lomunye umndeni lonebantfwana lababili, labaneminyaka lesiphohlongo kanye nalelishumi wakwetama loku. Make wakulomndeni utsi: “Sijabula kakhulu ngekutsi bantfwana betfu sibakhulisele kulendzawo, ngobe bebakwati kutihlanganisa nemahlahlandlela lakhetsekile kanye netitfunywa telivangeli. Kuphila kwetfu kumnandzi kakhulu ngobe sitfutsele lapho kunesidzingo khona.”
8. Kungenteka yini kutsi ukhone kusebenta ensimini yakulelinye live ube ungalwati lulwimi lwakhona? Chaza.
8 Kukhatsateka Ngelulwimi: Kucabanga ngekutsi kufanele ufundze lolunye lulwimi kuyakuvimba yini kutsi ungatfutseli kulelinye live? Lulwimi lwakho kungenteka luyakhulunywa kulelinye live lelinesidzingo lesikhulu sebamemeteli beMbuso. Labanye labashadile labebakhuluma siNgisi batfutsela eveni lokukhulunywa kulo Sipanishi, lelinebantfu labambalwa labavela kulamanye emave labakhuluma siNgisi. Ngemuva kwekutsi lihhovisi leligatja libanikete kwatiswa lomayelana nemabandla esiNgisi lanesidzingo, bakhetsa linye lawo futsi balivakashela kabili. Babuyela emuva base banciphisa tindleko tenyanga futsi bonga imali umnyaka wonkhe. Ngalesikhatsi sebakulungele kutfutsa, bazalwane bakuleyondzawo babasita kutsi batfole indlu lekahle labangahlala kuyo.
9, 10. Yini lengacatjangelwa ngulabo labashiya emave labatalelwa kuwo, futsi kungani?
9 Labo Labashiya Emave Abo: Watfutsa eveni lakini usengakalifundzi yini liciniso? Kungenteka kutsi kunesidzingo lesikhulu setisebenti tekuvuna eveni lowatalelwa kulo. Ungacabanga yini ngekubuyela kulo kute uyewusita? Kungaba melula ngawe kutfola umsebenti kanye nendzawo yekuhlala kunemuntfu losuka kulelinye live. Kungenteka nekutsi uyalwati lulwimi lolukhulunywa kuleyondzawo. Ngetulu kwaloko, bantfu bangakulalela kancono nawushumayela kubo ngeMbuso kunalapho kufika umuntfu lovela kulelinye live.
10 Lenye indvodza yesuka e-Albania yayawuhlala eTaliyane njengemkhoseli, yatfola umsebenti lomuhle futsi yakwati kutfumelela bakubo imali e-Albania. Ngemuva kwekwemukela liciniso, yafundzisa lamanye emahlahlandlela lakhetsekile aseTaliyane si-Albania, labetawutfutsela lapho kute ashumayele endzaweni lenesidzingo lesikhulu. Lomzalwane wabhala: “Bebaya ensimini lengayishiya. Ngisho nobe bebangalwati lolulwimi bebakujabulela kuhamba. Mine bengikhuluma si-Albania futsi ngikhulele khona. Manje-ke bengifunani eTaliyane?” Lomzalwane wakhetsa kubuyela e-Albania kute ayewushumayela tindzaba letinhle. Utsi: “Ngike ngitisole yini ngekushiya umsebenti kanye nemali eTaliyane? Cha! Ngitfole umsebenti lozuzisako e-Albania. Ngekubona kwami, umsebenti lobaluleke kakhulu naloletsa injabulo lengapheli, kukhonta Jehova ngako konkhe lonako!”
11, 12. Labo labacabangela kutfutsela kulelinye live, kufanele benteni?
11 Indlela Yekukwenta: Ngembikwekutsi baye eMasedoniya, boPawula kanye nalabo labehamba nabo bebafuna kuya ngasenshonalanga, kodvwa ‘umoya longcwele wabalela,’ ngako baya ngasenyakatfo. (Imis. 16:6) Ngesikhatsi sebasedvute neBhithiniya, Jesu akabavumelanga kutsi bachubeke. (Imis. 16:7) Asebentisa Jesu, Jehova usachubeka nekucondzisa umsebenti wekushumayela. (Mat. 28:20) Ngako-ke, nangabe ucabanga ngekutfutsela kulelinye live, cela sicondziso saJehova ngemthandazo.—Luk. 14:28-30; Jak. 1:5; fundza libhokisi lelitsi “Ungati Njani Kutsi Live Lofuna Kuya Kulo Linesidzingo?”
12 Cela labadzala nobe lamanye emaKhristu lavutsiwe kutsi asho loko lakucabangako ngesifiso sakho sekuyawukhonta kulelinye live. (Taga 11:14; 15:22) Fundza tihloko letisetincwadzini tetfu letimayelana nekukhonta kulelinye live futsi wente lucwaningo nganobe ngumaphi emave locabanga kuya kuwo. Ungakwati yini kusebentisa sikhashana lesitsite uvakashele lelive locabanga kutfutsela kulo? Nangabe utimisele kutfutsela kulelinye live, ungabhalela lihhovisi leligatja lakulelo live kute utfole kwatiswa lokubanti, usebentisa likheli lelitfolakala encwadzini yemnyaka yakamuva. Nanobe kunjalo, kunekutsi uvele utfumele incwadzi yakho ngalokucondzile ehhovisini leligatja, kungaba kuhle kutsi uyinikete labadzala belibandla kute nabo babhale loko labakucabangako, bese bayayitfumela.—Fundza incwadzi letsi “Ukuhlelelwa Ukwenza Intando KaJehova,” emakhasini 111-112, ngesiZulu.
13. Lihhovisi leligatja lingakusita njani, kodvwa yini wena lokufanele utentele yona?
13 Lihhovisi leligatja litawukutfumelela kwatiswa lokulusito mayelana nalelive kute ukwati kwenta tincumo letifanele. Kodvwa angeke likwati kukulungisela tincwadzi temvume yekuhlala kulelo live, kanye naletinye timphepha letidzingekako nobe likufunele indzawo yekuhlala. Leti tintfo lokutawudzingeka kutsi utihlolisise ngembikwekutsi utfutse. Ngetulu kwaloko, nguwe lotawuba nemtfwalo wekutsintsana nemahhovisi emancusa kute utfole kwatiswa lokumayelana nemvume yekuhlala kulelo live neyekutfola umsebenti. Labo labatfutsako kufanele bakwati kutinakekela kanye nekutentela tintfo letifunwa ngumtsetfo.—Gal. 6:5.
14. Ngutiphi tintfo lokufanele uticaphele nangabe uvakashela nobe utfutsela eveni lapho umsebenti wetfu uvinjelwe khona?
14 Emaveni Lapho Umsebenti Wekushumayela Uvinjelwe Khona: Kulamanye emave, bazalwane kufanele babe nekuhlakanipha lokukhulu ekukhonteni Nkulunkulu. (Mat. 10:16) Bamemeteli labavakashako nobe labatfutsela kulawo mave bangenta umsebenti wekushumayela unakeke babe bangakahlosi futsi babeke bazalwane baleyondzawo engotini. Nangabe ucabanga kutfutsela endzaweni lenjalo, sicela ucale ubhale incwadzi, sigungu salabadzala sitawubese siyitfumela ehhovisini leligatja.
15. Labo timo tabo letingabavumeli kutsi batfutse, bangawandzisa njani umsebenti wabo endzaweni yakubo?
15 Nangabe Ungeke Ukhone Kutfutsa: Nangabe ungeke ukhone kutfutsela kulelinye live, ungapheli emandla. Kungenteka kutsi kukhona lelinye “litfuba lekusebenta” lelikuvulekele. (1 Khor. 16:8, 9) Mhlawumbe umbonisi wenu wesifundza wati tindzawo letinesidzingo letisedvutane nalapho uhlala khona. Ungakwati yini kufundza lolunye lulwimi bese usita libandla nobe licembu lelikhuluma lolo lwimi? Mhlawumbe ungasita libandla nobe licembu lelisebentisa lulwimi lwetandla, nobe lulwimi lwakulelinye live, njengesiShayina, siFulentji, nobe siPutukezi. Ungakwati nekwandzisa umsebenti lowentako ebandleni lakini. Ngisho nobe ukutiphi timo, intfo lebalulekile kutsi ukhonte Jehova ngenhlitiyo yakho yonkhe.—Khol. 3:23.
16. Yini lokufanele siyente kulabo labafuna kutfutsela kulelinye live?
16 Ukhona yini umKhristu lovutsiwe lomatiko lonemgomo wekukhonta kulelinye live? Nangabe kunjalo, msekele futsi umkhutsate! Ngesikhatsi Pawula ahamba e-Antiyokhi yaseSiriya, beyilidolobha lesitsatfu lelikhulu eMbusweni waseRoma (beyilandzela iRoma ne-Alekzandriya). Njengobe libandla lase-Antiyokhi belinensimi lenkhulu, labazalwane bebaludzinga lusito lwaPawula futsi bebatawumkhumbula nasahambile. Nanobe kunjalo, liBhayibheli alisho kutsi bamncenga Pawula kutsi angahambi. Kunekutsi baticabangele bona kuphela, bakhumbula kutsi “insimi ngulomhlaba.”—Mat. 13:38.
17. Ngutiphi tizatfu lesinato tekucabangela ‘kwewelela eMasedoniya’?
17 Pawula kanye nalabo labehamba nabo babusiswa kakhulu ngekulalela simemo sekwewelela eMasedoniya. Ngesikhatsi basedolobheni laseMasedoniya lokutsiwa yiFiliphi, batfola Lidiya, futsi “iNkhosi yavula inhlitiyo yakhe kuze eve emukele loko lokwakukhulunywa nguPawula.” (Imis. 16:14) Cabanga ngendlela Pawula kanye nalabo labehamba nabo labajabula ngayo ngesikhatsi Lidiya kanye nawo wonkhe umndeni wakhe babhajatiswa! Emaveni lamanyenti, bakhona bantfu labanetinhlitiyo letinhle njengaLidiya labasengakatitfoli tindzaba letinhle teMbuso. Nangabe ‘wewelela eMasedoniya’ ungaba nenjabulo yekubatfola futsi ubasite.
[Box on page 5]
Ungati Njani Kutsi Live Lofuna Kuya Kulo Linesidzingo?
• Fundza incwadzi yemnyaka yakamuva. Nakisisa silinganiso semmemeteli ngamunye kulelo live.
• Sebentisa i-Index kute ucwaninge ngetihloko letikhuluma ngalelo live kanye nalokuhlangenwe nako lokuvela kulo.
• Khuluma nebamemeteli labake balivakashela lelive nobe bahlala kulo.
• Nangabe ucabanga kuya eveni lapho ungakhona kushumayela ngelulwimi lwakho, fundza imitfombo lekhona, njenge-Internet, kute ubone kutsi bangakhi bantfu labakhuluma lulwimi lwakho lapho.
• EBotswana kanye naseNamibia kunesidzingo lesikhulu semindeni levutsiwe kanye nemahlahlandlela lavamile.