Libhokisi Lembuto
◼ Kufanele yini bamemeteli basebentise i-Internet kuze bafakaze kubantfu labangabati labahlala kulamanye emave nobe babachubele tifundvo teliBhayibheli?
Labanye bamemeteli basebentisa i-Internet kuze batfole tifundvo teliBhayibheli etindzaweni lapho umsebenti wetfu wekushumayela uvinjelwe khona nalapho kunelinani lelincane khona lebamemeteli. Kuletinye timo, kube nemiphumela lemihle. Nanobe kunjalo, kuba khona tingoti letitsite nangabe bamemeteli batfumelelana imilayeto nebantfu labangabati nge-e-mail nobe basebentise tindlela tekucocisana letiku-Internet. (Fundza Umsebenti Wetfu WeMbuso waJuly 2007 likh. 3, lotfolakala ngesiZulu.) Nanobe injongo ikutsi sifinyelele bantfu labanetinhlitiyo leticotfo ngemlayeto weMbuso, kucocisana lokunjalo kungaphumela ekutseni umzalwane nobe dzadze atitfole sekatihlanganisa nebantfu lababi, ngisho netihlubuki. (1 Khor. 1:19-25; Khol. 2:8) Ngetulu kwaloko, etindzaweni lapho umsebenti weMbuso uvinjelwe khona, ungatfola kutsi tiphatsimandla takuleyo ndzawo tiyakulandzelela kutfunyelwa kwemilayeto. Kutfumela imilayeto lenjalo kungabafaka engotini bazalwane nabodzadze bakuleyo ndzawo. Ngako-ke, bamemeteli akukafaneli bangene ku-Internet kuze bayofuna bantfu labakulelinye live labangacoca nabo ngetindzaba letimnandzi.
Nangabe sifakaza singakahleli kumuntfu lovakashile lobuya kulelinye live, akukafaneli setame kuchubeka simfundzisa ngaNkulunkulu nasekabuyele eveni lakhe, ngaphandle nangabe sicondziswe lihhovisi leligatja kutsi sente njalo. Esikhundleni saloko, singamkhombisa kutsi angayisebentisa njani i-jw.org kute atfole lwati lolwengetiwe nobe kutsi angatsintsana njani nelihhovisi leligatja lelisendzaweni yakubo. Singaphindze simkhutsate kutsi avakashele liHholwa LeMbuso lelisendzaweni yakubo. Kuliciniso kutsi kulamanye emave kute emaHholwa EMbuso. Nangabe afisa kutsi BoFakazi BaJehova labasendzaweni yakubo bamvakashele, singamkhombisa kutsi ligcwaliswa njani lelifomu lelitsi Cela Sifundvo SeliBhayibheli Samahhala lelitfolaka ku-jw.org. Lihhovisi leligatja lelibuke umsebenti wekushumayela kulelive lahlala kulo liyatati timo takuleyo ndzawo futsi lingakhona kumsita loyo muntfu kutsi afundze ngaNkulunkulu.—Fundza Umsebenti Wetfu WeMbuso wangaJune 2014, likh. 7 kanye newangaNovember 2011, likh. 2.
Nangabe umuntfu lesifundza naye liBhayibheli atfutsela kulelinye live nobe nangabe sifundza nemuntfu wakulelinye live lesimatela ku-Internet, kufanele silandzele sicondziso lesishiwo ngenhla. Nanobe kunjalo, singase sichubeke sikhulisa sifiso sakhe sekwati Nkulunkulu kuze kube ngulapho bammemeteli labahlala kuleyo ndzawo bafika kuye. Kodvwa-ke, nangabe ahlala endzaweni lapho umsebenti wekushumayela uvinjelwe khona, kufanele sicaphelisise kakhulu nasicoca naye ngeliBhayibheli sisebentisa incwadzi, lucingo nobe tintfo tebucwephesha.—Mat. 10:16.