Libhokisi Lembuto
◼ Ngubani lokufanele agcwalise tigcebhezane kanye neticelo letiku-Internet?
Tincwadzi tetfu tivame kuba netigcebhezane letingagcwaliswa bantfu bese batitfumela ehhovisini leligatja nangabe bafuna tincwadzi nobe kuvakashelwa ngulomunye waboFakazi BaJehova. Ngetulu kwaloko, likheli letfu le-Internet lelitsi www.watchtower.org nalo bantfu bangalisebentisa kute bacele kuchutjelwa tifundvo teliBhayibheli. Loku kusita bantfu labanyenti kutsi bafundze liciniso. Nanobe kunjalo, kunetinkinga letivelile lapho bamemeteli basebentise khona lamathulusi kute bente tinhlelo tekutsi tihlobo tabo kanye nalabanye batfole tincwadzi nobe bavakashelwe.
Labanye lihhovisi leligatja lelibatfumelele tincwadzi bangakaticeli bakhononile ngaloku, baba nemuva wekutsi inhlangano ayibaphatsi kahle futsi ibafake eluhlwini lwebantfu lebatfumelela tincwadzi njalo. Bamemeteli labacelwa kutsi bavakashele umuntfu longakaticeleli kuvakashelwa bahlangabetana nenkinga lapho lomuntfu abacansukela. Ngako-ke ticelo letentiwa ku-Internet nobe ngaletigcebhezane kufanele tisuke kubantfu labanenshisekelo hhayi kubamemeteli. Nangabe lihhovisi leligatja litfola kutsi sicelo lesitsite sentiwe ngummemeteli, angeke lisinake leso sicelo.
Kodvwa-ke singatisita njani tihlobo nobe labanye bantfu lesetayelene nabo? Nangabe ungatsandza kutsi umuntfu atfole tincwadzi, kungani ungamtfumeleli tona njengesipho? Nakakhombisa inshisekelo futsi anesifiso sekuvakashelwa boFakazi kodvwa wena ungati kutsi ungabatsintsa njani labadzala belibandla lendzawo lahlala kuyo, kufanele ugcwalise lifomu lelitsi “Siza Ulandelele” (S-43) bese ulinika mabhalane welibandla lenu, yena utawulihlola futsi alitfumele ehhovisini leligatja. (Libandla ngalinye kufanele lihlale linelinani lelenele lalamafomu.) Kodvwa-ke, nangabe loyo muntfu lonenshisekelo ahlala ejele, endzaweni lapho kusitwa khona bantfu labamihuca, nobe esibhedlela sahulumende, akukafaneli wena utsintse lihhovisi leligatja. Kunaloko, kufanele ukhutsate loyo muntfu kutsi achumane nebazalwane labavakashela leyo ndzawo nobe abhalele lihhovisi leligatja yena matfupha.