Kuvuswa KwaJesu Kusho Kuphila
KUVUSWA kwaJesu akusiyo nje intfo leyejwayelekile leyenteka kadzeni lengasho lutfo kitsi lamuhla. Umphostoli Pawula washo lokutsite lokukhombisa kubaluleka kwako, watsi: “Khristu wavuswa kulabafile, waba ngumvuli wendlela kulabo labatawuvuka kulabafile. Njengobe kufa kweta ngemuntfu munye, nekuvuka kulabafile nako kute ngemuntfu munye. Njengobe ku-Adamu bonkhe bayafa, kanjalo futsi nakuKhristu bonkhe bayawuvuswa ekufeni.”—1 Khorinte 15:20-22.
Jesu wavuswa nga-Nisan 16, ngemnyaka wa-33 C.E., lokulilanga emaJuda lebekamikisa ngalo kuNkulunkulu Jehova titselo tekucala tesivuno salokutinhlavu endzaweni lengcwele ethempelini eJerusalema. Ngekubita Jesu ngekutsi wekucala, Pawula bekasho kutsi bakhona nalabanye labatawuvuswa ekufeni.
Lamavi aPawula lalandzelako achaza loko lokutawutfolakala ngekuvuswa kwaJesu. Watsi: “Njengobe kufa kweta ngemuntfu munye, nekuvuka kulabafile nako kute ngemuntfu munye.” Ngenca yesono lesasitfola ku-Adamu, sonkhe siyafa. Nobe kunjalo, ngekunikela ngekuphila kwakhe lokute sono njengenhlawulo, Jesu wavulela bantfu indlela yekukhululwa esonweni nasekufeni. Nakafinyeta lendzaba kuRoma 6:23 Pawula watsi: “Inkhokhelo yesono kufa; kodvwa sipho semusa saNkulunkulu sikuphila lokuphakadze ngaKhristu Jesu iNkhosi yetfu.”
Jesu wachaza kutsi kufa nekuvuka kwakhe kutasisita ngani tsine. Abhekisele kuye, watsi: “NeNdvodzana yeMuntfu ifanele kuphakanyiswa. Kuze kutsi wonkhe umuntfu lokholwa ngiyo abe nekuphila lokuphakadze. Nkulunkulu walitsandza live kakhulu kangangekutsi wadzimate wanikela ngeNdvodzana yakhe lekukuphela kwayo, kuze kutsi nome ngubani lokholwa ngiyo angabhubhi, kodvwa abe nekuphila lokuphakadze.”—Johane 3:14-16.
Asewucabange nje sewuphila phakadze ungeva buhlungu, ungasahlupheki futsi ungasenalusizi! (Sembulo 21:3, 4) Leli litsemba lelijabulisa sibili. Lesinye sati sayibeka kanjena lendzaba, satsi: “Njengobe emathuna angase asikhumbute ngendlela kuphila lokukufishane ngayo, nekuvuswa kwalabafile kusicinisekisa ngekutsi sekusedvute kutsi kufa kuphele.” Nembala, kuvuswa kwaJesu kusho kuphila.