Tfola Tinzuzo Ngekufundza LiBhayibheli
“Ngitfokotela umtsetfo waNkulunkulu.”—ROM. 7:22.
1-3. Ngutiphi tinzuzo letitfolakala ngekufundza liBhayibheli nangekusebentisa timfundziso talo?
“NJALO ekuseni ngibonga Jehova ngekungisita ngicondze liBhayibheli.” Lodzadze lokhulile lowasho lamavi ulifundze lonkhe liBhayibheli tikhatsi letingetulu kwa-40, futsi uyachubeka enta njalo. Lomunye dzadze losemusha wabhala kutsi kufundza liBhayibheli kumsitile wabona kutsi Jehova ukhona mbamba. Umphumela waloko ube kutsi asondzele kakhulu kuBabe wakhe wasezulwini. Watsi: “Angikaze ngijabule kangaka ekuphileni kwami!”
2 Umphostoli Phetro wasikhutsata sonkhe kutsi ‘silangatelele lubisi lwemoya loluhlantekile nalolungakabhicwa nalutfo, lolulivi.’ (1 Phet. 2:2) Labo labenetisa lesifiso ngekufundza liBhayibheli nangekusebentisa timfundziso talo, bananembeza lohlantekile futsi banenjongo ekuphileni. Baba nebuhlobo lobuhle nalabo labatsandza baphindze bakhonte Nkulunkulu weliciniso. Tonkhe leti tizatfu letinhle ‘tekutfokotela umtsetfo waNkulunkulu.’ (Rom. 7:22) Nobe kunjalo, kunaletinye tinzuzo letinyenti. Ngutiphi letinye tato?
3 Nawuchubeka ufundza ngaJehova nangeNdvodzana yakhe, lutsandvo lwakho ngabo nangalabanye bantfu lutawukhula. Kuba nelwati lolunembile ngemiBhalo kutakusita ubone kutsi ngekushesha Nkulunkulu utabasindzisa njani bantfu labalalelako kulelive leliphelako. Kunemlayeto lomuhle wetindzaba letimnandzi lokufanele uwucocele bantfu basensimini yakini. Jehova utakubusisa njengobe uchubeka ufundzisa labanye tintfo lotifundze eVini lakhe.
FUNDZA UPHINDZE UZINDLE
4. Kusho kutsini kufundza liBhayibheli ngelivi leliphansi?
4 Jehova akafuni kutsi tinceku takhe tibhudvutele natifundza liVi lakhe. Naku lakutjela Joshuwa: “Emavi alencwadzi yemtsetfo angesuki emlonyeni wakho; [uwafundze ngelivi leliphansi] busuku nemini.” (Josh. 1:8; Hla. 1:2) Lesicondziso sisho kutsi kufanele siwasho ngelivi leliphansi yini onkhe emavi lesiwafundza kuGenesisi kuya kuSembulo? Cha. Sisho kutsi kufanele ufundze ngendlela letakuvumela kutsi ukhone kuzindla. Nawufundza liBhayibheli ngelivi leliphansi, loko kutakusita kutsi unakisise tincenye letingakusita futsi tikukhutsate ngaleso sikhatsi. Nawutfola umusho, emavesi nobe kulandzisa lokunjalo, kufundze ungagijimi, mhlawumbe uze unyakatise tindzebe temlomo wakho njengobe ufundza. Loko lokufundza emiBhalweni kungase kuyitsintse kakhulu inhlitiyo yakho. Yini leyenta loko kubaluleke? Kungobe kutfola umcondvo weseluleko saNkulunkulu kukukhutsata kakhulu kutsi usisebentise.
5-7. Fanekisa kutsi kufundza liVi laNkulunkulu ngelivi leliphansi kungakusita njani kutsi (a) utigcine uhlantekile ngendlela lotiphatsa ngayo; (b) uphatse labanye ngesineke nangemusa; (c) wetsembele kuJehova ngisho nangetikhatsi letimatima.
5 Kufundza ngelivi leliphansi kuba lusito kakhulu nawufundza tincwadzi teliBhayibheli longakatetayeli. Kute sifanekise, cabanga ngaletimo letintsatfu. Sekucala, cabanga ngemzalwane losemusha longumKhristu loneluhlelo lwekufundza liBhayibheli, nyalo sewufundza ngesiphrofetho saHoseya. Nakefika kusehluko 4, uyabindza kancane ngemuva kwekufundza ngelivi leliphansi emavesi 11 kuya ku-13. (Fundza Hoseya 4:11-13.) Ukwentelani loko? Kungobe lamavesi amtsintsa kakhulu njengobe etama kulwisana nekucindzetelwa bantfu lafundza nabo kutsi naye atiphatse kabi. Uzindla ngalamavesi bese uyacabanga: ‘Jehova uyatibona tintfo letimbi letentiwa bantfu ekusitsekeni. Angifuni kumvisa buhlungu.’ Lomzalwane ubese uphetsa ngekutsi ufuna kutigcina ahlantekile emehlweni aNkulunkulu.
6 Esimeni sesibili, dzadze longumKhristu ufundza siphrofetho saJoweli aze efike esehlukweni 2, evesini 13. (Fundza Joweli 2:13.) Njengobe afundza lelivesi ngelivi leliphansi, uzindla ngekutsi angamlingisa njani Jehova, ‘lonemusa nesihawu, lowephuta kutfukutsela, lonelutsandvo loluphuphumako.’ Uncuma kutsi utawetama kuyekela kuphukuta nobe kusho emavi lahlabako lavame kuwasebentisa nakakhuluma nendvodza yakhe nalabanye.
7 Esimeni sesitsatfu, cabanga ngababe longumKhristu lophelelwe ngumsebenti futsi lokhatsateke ngekutsi utamnakekela njani umfati wakhe nebantfwana. Ufundza umbhalo waNahume 1:7 ngelivi leliphansi lotsi Jehova “uyabanakekela labo labakhosela kuye” futsi uyabavikela abe ‘siphephelo ngetikhatsi tekuhlupheka.’ Lawo mavi avele amdvudvute. Uyalubona lutsandvo nekukhatsalela kwaJehova futsi uyayekela kukhatsateka kakhulu. Ngemuva kwaloko ubese ufundza livesi 15 ngelivi leliphansi. (Fundza Nahume 1:15.) Lomzalwane uphetsa ngekutsi kufanele ashumayele tindzaba letimnandzi ngisho nobe abukene nebumatima, kute akhombise kutsi wente Jehova waba siphephelo sakhe. Njengobe lomzalwane achubeka afuna umsebenti, uphindze wakhutsateka kutsi asekele insimi ekhatsi neliviki.
8. Kafishane sitjele ngemcebo lowutfole nawufundza liBhayibheli.
8 Lamaphuzu lalusito lesisandza kucoca ngawo atfolakala etincwadzini teliBhayibheli labanye labacabanga kutsi akusimelula kuticondza. Njengobe utawube ufundza incwadzi yaHoseya, yaJoweli neyaNahume unesifiso sekutfola tinzuzo kuto, utawufuna kufundza nalamanye emavesi lakuto ngelivi leliphansi. Ase ucabange nje kutsi kungakanani kuhlakanipha kanye nendvudvuto lotayitfola kulabo baphrofethi! Utsini-ke ngalo lonkhe liBhayibheli? LiVi laNkulunkulu lifanana nemayini yelidayimane lephumelelako. Sebenta ngekutimisela kulemayini. Fundza lonkhe liBhayibheli unemgomo wekutfola inala yeticondziso letivela kuNkulunkulu longatetsemba.
YILWA MATIMA KUTE UKUCONDZE LOKO LOKUFUNDZAKO
9. Singakutfutfukisa njani kucondza kwetfu intsandvo yaNkulunkulu?
9 Njengobe kubalulekile kutsi ufundze incenye letsite yeliBhayibheli malanga onkhe, kufanele ube nesifiso sekuba nekucondza nekutfola lwati. Ngako-ke, tisebentise kahle tincwadzi tenhlangano yaJehova kute wente lucwaningo ngendlela bantfu lebebaphila ngayo, ngetindzawo nangetintfo letenteka lofundza ngato. Nangabe utibuta kutsi imfundziso letsite leseBhayibhelini ingakutsintsa njani kuphila kwakho, ungase ucele lomdzala welibandla nobe lomunye umKhristu lovutsiwe kutsi akusite. Kute sifanekise kubaluleka kwekutfutfukisa kucondza kwetfu, ase sicoce ngesibonelo semKhristu wangelikhulu lekucala lowalwa matima kute ente njalo. Libito lakhe ngu-Apolosi.
10, 11. (a) Apolosi wasitwa njani kutsi atfutfuke njengemshumayeli wetindzaba letimnandzi? (b) Yini lesingayifundza kulokulandzisa kwa-Apolosi? (Fundza libhokisi lelitsi: “Loko Lokufundzisako Kusasebenta Yini?”)
10 Apolosi abengumKhristu longumJuda ‘loyati kakhulu imiBhalo’ futsi ‘agcwele inshisekelo emoyeni wakhe.’ Incwadzi yeMisebenti itsi ngaye: ‘Wafundzisa wachaza kahle emaciniso macondzana naJesu, kepha-ke yena abati ngembhabhatiso waJohane kuphela.’ Ngesizatfu sekutsi abengati, Apolosi abefundzisa ngetintfo letimayelana nelubhabhatiso lebetingasasebenti. EmaKhristu lashadene boPhrisila na-Akhwila batsi nabamuva afundzisa e-Efesu, bamchazela “kahle ngeNdlela yaNkulunkulu.” (Imis. 18:24-26) Kwamzuzisa njani loko Apolosi?
11 Ngemuva kwekushumayela e-Efesu, Apolosi waya e-Akhaya. “Watsi kube efike, waba lusito lolukhulu kulabo bese bakholiwe ngemusa waNkulunkulu; ngobe emaJuda wawehlula eshashalatini ngekuhlakanipha lokukhulu, awakhombisa ngekwemiBhalo kutsi Jesu unguKhristu.” (Imis. 18:27, 28) Ngaleso sikhatsi, Apolosi abengayichaza kahle inchazelo yelubhabhatiso lwemaKhristu. Ngesizatfu sekutsi kucondza kwakhe besekutfutfukile, “waba lusito lolukhulu” kubantfu labebasatfutfuka ekukhulekeleni kweliciniso. Yini lesingayifundza kulokulandzisa? Njenga-Apolosi, natsi silwa kamatima kute sikucondze loko lesikufundza eBhayibhelini. Nobe kunjalo, nangabe umuntfu lesikholwa naye asitjela indlela yekufundzisa lephumelelako, kufanele silwemukele ngekutitfoba nangekubonga lokukhulu lusito lwakhe. Nasenta njalo, imisebenti lesiyentela Jehova itawutfutfuka.
SEBENTISA LOKO LOKUFUNDZAKO KUTE USITE LABANYE
12, 13. Chaza kutsi kusebentisa imiBhalo ngekuhlakanipha kungamsita njani umfundzi weliBhayibheli abe nebuhlobo lobuhle naNkulunkulu.
12 Njenga-Akhwila, Phrisila na-Apolosi, natsi singaba sibusiso kulabanye. Utiva njani nangabe sikhutsato sakho sisita umuntfu lonenshisekelo asuse sitsiyo lesimvimba kutsi angabi nebuhlobo lobuhle naNkulunkulu? Njengalomdzala welibandla, utiva njani nangabe umuntfu lokholwa naye akubonga ngeseluleko semBhalo lesimsitile ngesikhatsi abukene nebumatima? Kuliciniso kutsi kusebentisa liVi laNkulunkulu kute usite labanye batfutfukise kuphila kwabo kungumtfombo wekwenetiseka nenjabulo.a Ase ubone kutsi ungawufinyelela njani lomgomo.
13 Ema-Israyeli angesikhatsi sa-Elija abengati kutsi kufanele akhetse inkholo yeliciniso yini nobe yemanga. Seluleko sa-Elija lebesiya kulabantfu kungenteka simsite umfundzi weliBhayibheli lote buhlobo lobuhle naNkulunkulu. (Fundza 1 Emakhosi 18:21.) Cabanga ngaloku: Nangabe umuntfu lonenshisekelo esaba kutsi batawutsini bangani bakhe nobe umndeni wakhe, ungase umsite kutsi akhetse kukhonta Jehova ngekufundza naye umbhalo wa-Isaya 51:12, 13.—Fundza.
14. Yini lengakusita kutsi ukhumbule emavi laseBhayibhelini nawuwadzinga kute usite labanye?
14 Kuyacaca kutsi liBhayibheli linemavi lamanyenti langakhutsata, acondzise nobe acinise bafundzi bawo. Kodvwa ungase utibute: ‘Ngingawutfola njani umbhalo lotsite nangabe ngiwudzinga?’ Fundza liBhayibheli uzindle nangemavi aNkulunkulu onkhe malanga. Ngaleyo ndlela, utatakhela umtfombo longagcina kuwo emavi lavela kuNkulunkulu, futsi longawakhumbula ngelusito lwemoya wakhe.—Mak. 13:11; fundza Johane 14:26.b
15. Yini lengakusita kutsi ucondze liVi laNkulunkulu kakhudlwana?
15 NjengeNkhosi Solomoni, thantaza kuJehova ucele kuhlakanipha kwekwenta imisebenti yakhe. (2 Khr. 1:7-10) Njengobe kwenta baphrofethi bakadzeni, ‘phenyisisa’ eVini laNkulunkulu kute utfole lwati ngaye nangentsandvo yakhe. (1 Phet. 1:10-12) Umphostoli Pawula wakhutsata Thimothi kutsi atondle “ngemavi ekukholwa nangemfundziso yeliciniso.” (1 Thim. 4:6) Ngekwenta njalo, utawukhona kusita labanye bati Nkulunkulu. Ngesikhatsi lesifananako, utawucinisa nekukholwa kwakho.
SIVIKELO MBAMBA SISEVINI LANKULUNKULU
16. (a) BaseBheriya bazuza njani ‘ngekuphenyisisa imiBhalo onkhe emalanga’? (b) Yini leyenta kufundza liBhayibheli onkhe malanga kubaluleke kitsi lamuhla?
16 EmaJuda aseBheriya edolobheni laseMasedoniya abenemkhuba ‘wekuphenyisisa imiBhalo onkhe malanga.’ Ngesikhatsi Pawula ashumayela tindzaba letimnandzi kulamaJuda, wona abecatsanisa emavi akhe nelwati lwawo ngemiBhalo. Waba yini umphumela waloko? Bantfu labanyenti baciniseka kutsi abefundzisa liciniso, futsi baba ‘ngemakholwa.’ (Imis. 17:10-12) Loku kukhombisa kutsi kufundza njalo liBhayibheli kwenta umuntfu abe nekukholwa lokucinile kuJehova. Kukholwa lokunjalo, “kukuciniseka ngetintfo lesetsembele kuto,” futsi kufanele sibe nako nangabe sifuna kungena eveni lelisha laNkulunkulu.—Heb. 11:1.
17, 18. (a) Kukholwa lokucinile nelutsandvo kutayivikela njani inhlitiyo yemKhristu lengumfanekiso? (b) Kukholwa kusivikela njani engotini?
17 Pawula abenesizatfu lesihle sekubhala atsi: “Kodvwa tsine lesibemini asizitse, sembatse sivikelo sesifuba lesikukholwa nelutsandvo, sifake nempantitje lelitsemba letfu lensindziso.” (1 Thes. 5:8) Inhlitiyo yelisotja kudzingeka ivikelwe etitseni. Ngendlela lefananako, inhlitiyo yemKhristu lengumfanekiso idzinga lihawu kute ilivikele emandleni esono. Kwentekani nangabe inceku yaJehova inekukholwa lokucinile etetsembisweni taNkulunkulu futsi imtsandza Yena nalabanye bantfu? Inceku lenjalo, ifake sivikelo sesifuba lesisezingeni lelisetulu lesivela kuNkulunkulu. Angeke ivumele nobe yini iyente ingemukeleki kuNkulunkulu.
18 Pawula waphindze wakhuluma ngesigcoko, ‘lesilitsemba letfu lensindziso.’ Ngetikhatsi tekubhalwa kweliBhayibheli, nangabe lisotja lingakayivikeli inhloko yalo belingasheshe libulawe emphini. Kodvwa nangabe ligcoke sigcoko lesicinile, belingasindza nangabe lihlaselwa enhloko futsi belingeke lilimale. Kufundza liVi lakhe kutasisita sibe nelitsemba lekutsi Jehova utasisindzisa. Litsemba lelicinile litasisita kutsi simelane netihlubuki ‘netinkhulumo tato letilite’ futsi letiyingoti. (2 Thim. 2:16-19) Kukholwa kwetfu kutawusinika emandla ekwala nangabe bantfu bafuna sitiphatse ngendlela lengamjabulisi Jehova.
INDLELA YEKUSINDZA
19, 20. Yini lesenta sibonge kakhulu ngekuba neliVi laNkulunkulu, futsi sikukhombisa njani kubonga kwetfu? (Fundza libhokisi lelitsi: “Jehova Unginika Loko Lengikudzingako.”)
19 Njengobe lelive lichubeka liya ngasekupheleni kwalo, natsi kudzingeka setsembele kakhulu eVini laJehova. Seluleko lesisitfola kulo sitasisita kutsi silungise indlela lesitiphatsa ngayo nemikhuba yetfu leyingoti. Ngesikhutsato nangendvudvuto yalo, sitawuphumelela kunobe ngutiphi tilingo Sathane nalelive lakhe labasihlasela ngato. Ngesicondziso saJehova lesiseVini lakhe, sitawuchubeka sisendleleni yekuphila.
20 Khumbula kutsi intsandvo yaNkulunkulu ikutsi “bonkhe bantfu basindziswe.” Tinceku taJehova nato tisemkhatsini wabo ‘bonkhe labantfu.’ Babaliwe nalabo lesingase sibasite emsebentini wetfu wekushumayela nekufundzisa. Kodvwa bonkhe labafuna kusindziswa kufanele “bafinyelele ekulatini liciniso.” (1 Thim. 2:4) Ngako-ke, kute sisindze kulamalanga ekugcina kufanele sifundze liBhayibheli siphindze sisebentise ticondziso talo letiphefumulelwe. Kuliciniso kutsi kufundza kwetfu liBhayibheli onkhe malanga kuveta kutsi sibonga kakhulu ngeliVi laJehova leliligugu futsi leliliciniso.—Joh. 17:17.
a Kuliciniso kutsi asisebentisi seluleko seliBhayibheli kute sicindzetele nobe sisole labanye. Kufanele sibe nesineke nemusa kubafundzi beliBhayibheli njengobe naJehova enta njalo nakitsi.—Hla. 103:8.
b Kutsiwani nangabe ukhumbula emavi layinhloko kodvwa ungayikhumbuli incwadzi, sehluko nelivesi? Nawubuka lawo mavi ku-index lengemuva kweliBhayibheli, ku-Watchtower Library nobe ku-concordance ye-New World Translation, nakanjani utawutfola lombhalo.