IMIBUTO YELIBHAYIBHELI IYAPHENDVULWA

Nkulunkulu uyilalela yonkhe yini imithantazo?

Nkulunkulu ulalela bantfu bonkhe labachamuka kuto tonkhe tive. (Tihlabelelo 145:18, 19) LiVi lakhe liBhayibheli lisikhutsata kutsi sikhulume naye nganoma ngabe yini lesikhatsatako. (Filiphi 4:6, 7) Noma kunjalo, leminye imithantazo ayimjabulisi Nkulunkulu. Sibonelo saloko kutsi imithantazo leshiwo sasilandzelo ayimjabulisi.—Fundza Matewu 6:7.

Ngetulu kwaloko, Jehova akajabuli ngemithantazo yebantfu labangayihloniphi imitsetfo yakhe. (Taga 28:9) Sibonelo saloko kutsi ngesikhatsi kubhalwa liBhayibheli, Nkulunkulu akawalalelanga ema-Israyeli lebekanesono sekubulala. Kuyacaca kutsi kufanele sihloniphe imitsetfo yaNkulunkulu kuze asilalele.—Fundza Isaya 1:15.

Yini lokufanele siyente kuze Nkulunkulu asive?

Sidzinga kukholwa kuNkulunkulu nasithantaza. (Jakobe 1:5, 6) Kufanele siciniseke kutsi Nkulunkulu ukhona futsi unendzaba natsi. Singakucinisa kukholwa kwetfu ngekutadisha liBhayibheli ngoba kukholwa lokungiko kusekelwe ebufakazini nasetetsembisweni letitfolakala eVini laNkulunkulu.—Fundza Hebheru 11:1, 6.

Kufanele sithantaze ngebucotfo nangekutfobeka. Ngisho neNdvodzana yaNkulululu, Jesu bekatfobeka nakathantaza. (Lukha 22:41, 42) Kunekutsi sisho kuNkulunkulu loko lokufanele asentele kona, kufanele setame kucondza loko lakulindzele kitsi ngekufundza liBhayibheli. Ngeleyondlela, singathantaza ngekuvumelana nentsandvo yakhe.—Fundza 1 Johane 5:14.