Asinakane Futsi Sikhutsatane

1, 2. Yini leyasita boFakazi BaJehova labangu-230 kutsi basindze kuloluhambo lwekufa ekupheleni kweMphi Yelive Yesibili?

NJENGOBE umbuso wemaNazi wabhidlika ekupheleni kweMphi Yelive Yesibili, kwakhishwa sicondziso sekubulala tinkhulungwane tebantfu labebasele etinkambu tekuhlushwa. Letiboshwa tasenkambu yaseSachsenhausen kwakufanele tiyiswe esikhumulweni semikhumbi kute tilayishwe emikhunjini bese ticwiliswa elwandle. Lena kwakuyindlela kamuva leyatiwa ngekutsi luhambo lwekufa.

² Tiboshwa letitinkhulungwane letingemashumi lamatsatfu nakutsatfu letatisuka eSachsenhausen enkambu yekuhlushwa kwakufanele tihambe emakhilomitha langu-250 kuya eLübeck, esikhumulweni semikhumbi eJalimane. Emkhatsini waletiboshwa bekunaboFakazi BaJehova labangu-230 labebavela emaveni lasitfupha, lokwatsiwa nabo abahambe nalabantfu. Bonkhe bebabutsakatsaka ngenca yendlala netifo. Bazalwane betfu basindza njani kuloluhambo? Lomunye wabo watsi: “Sasichubeka sikhutsatana kute sichubekele phambili.” Baphindze basitwa nguNkulunkulu ‘ngemandla lamakhulu,’ lutsandvo labebanalo ngalomunye lwabasita kutsi basindze kulesimo labebabhekene naso.—2 Khor. 4:7.

3. Kungani sidzinga kukhutsatwa ngulabanye?

³ Lamuhla asikho kuloluhambo lwekufa, kodvwa siyabhekana netinsayeya letinyenti. Ngemuva kwekubekwa kweMbuso waNkulunkulu nga-1914, Sathane wacoshwa ezulwini futsi walahlelwa emhlabeni ‘anentfukutselo lenkhulu, ngobe ati kutsi sikhatsi sakhe sesifishane.’ (Semb. 12:7-9, 12) Njengobe lelive lisondzela emphini yaNkulunkulu i-Amagedoni, Sathane usebentisa tilingo nekucindzeteleka kute ente buhlobo betfu naNkulunkulu bube butsakatsaka. Ngetulu kwaloko sibhekana nekucindzeteleka onkhe malanga. (Jobe 14:1; Shu. 2:23) Ngaletinye tikhatsi bonkhe bumatima lesibhekana nabo bungasicedza emandla kangangekutsi nobe ngabe ngukuphi kuciniswa lesikutfola kuNkulunkulu angeke kukhone kusisita kutsi sibhekane nekucindzetelwa. Cabanga ngemzalwane losite bantfu labanyenti ebuhlotjeni babo naNkulunkulu iminyaka leminyenti. Njengobe achubeka akhula, yena nemfati wakhe bahlaselwa kugula, futsi wativa acindzetelekile. Njengalomzalwane, sonkhe siyawadzinga ‘emandla lamakhulu’ lavela kuJehova kanye nekukhutsatwa ngulabanye.

4. Nangabe kufanele sikhutsate labanye, ngusiphi seluleko semphostoli Pawula lokufanele sisicabangele?

⁴ Nangabe singaba ngumtfombo wesikhutsato kulabanye, singacabanga ngemavi esikhutsato umphostoli Pawula lawasho kumaKhristu langemaHebheru. Naku lakusho: “Asinakane, sisitane ngekukhutsatana elutsandvweni nasemisebentini lemihle. Singakuyekeli kuhlangana ndzawonye, njengobe labanye sebanemkhuba wekungahlangani; kodvwa asikhutsatane kakhulu, njengobe nani niyabona kutsi lilanga selisondzele.” (Heb. 10:24, 25) Singasisebentisa njani leseluleko lesicuketfwe ngulamavi?

“NAKANANI”

5. Kusho kutsini ‘kunakana,’ futsi ngumiphi imetamo ledzingekako?

⁵ ‘Kunakana’ kusho “kucabanga ngetidzingo talabanye kanye nabo.” Singakwati yini kunakana nangabe singacoci nalabanye simane sibavusele sishesha eHholweni leMbuso nobe kucoca nabo ngetintfo letingakabaluleki? Angeke sikwati. Siyacondza kutsi kufanele ‘sinake tetfu tindzaba’ futsi ‘singangeni kulokungesiko kwetfu.’ (1 Thes. 4:11; 1 Thim. 5:13) Nobe kunjalo, nasifuna kukhutsata bazalwane betfu kufanele sibati kahle—timo tekuphila kwabo, buntfu babo, buhlobo babo naNkulunkulu, emandla abo kanye nebutsakatsaka babo. Kufanele basibone sibangani babo baciniseke ngelutsandvo lesinalo ngabo. Loku kufaka ekhatsi kutsi sicitse sikhatsi nabo, hhayi nje nababhekene netinkinga kuphela nobe bakhatsatekile, kodvwa nangaletinye tikhatsi.—Rom. 12:13.

6. Yini letawusita labadzala kutsi ‘banake’ labaphatsiswe bona?

⁶ Emadvodza lamadzala ebandleni akhutsatwa kutsi ‘eluse umhlambi waNkulunkulu laphatsiswe wona,’ akwenta loko ngekutitsandzela nangenkhutsalo. (1 Phet. 5:1-3) Bangawenta njani ngemphumelelo lomsebenti wekwelusa babe bangatati kahle timvu labatelusako? (Fundza Taga 27:23.) Nangabe labadzala babanakekela labakholwa nabo futsi bakujabulela kuba nabo, kutawuba melula ngetimvu kucela lusito kubo natiludzinga. Labazalwane nabodzadze kutawuba melula ngabo kuveta imiva yabo naloko lokubakhatsatako, loko kutawenta kutsi labadzala ‘banake’ labo lababanakekelako futsi babanikete lusito loludzingekako.

7. Singayitsatsa njani imibono ‘leshubile’ yalabo labadvumatekile?

⁷ Nakakhuluma nelibandla laseThesalonika, Pawula watsi: “Ninakekele lababutsakatsaka.” (Fundza 1 Thesalonika 5:14.) “Labaphelelwa ngemandla emoyeni” babutsakatsaka futsi basuke badvumatekile. Taga 24:10 titsi: “Nawukhubatela ngesikhatsi lesibucayi, usuke unemandla lamancane.” Emavi emuntfu lodvumatekile angase “ashube.” (Jobe 6:2, 3) Nasikhuluma nebantfu labanjalo kufanele sikhumbule kutsi labakukhulumako kungase kungaveti loko labangiko enhlitiyweni. Rachelle, make wakhe wacindzeteleka futsi ukwati kahle loku lesikhuluma ngako. Watsi: “Tikhatsi letinyenti Make bekasho tintfo letibuhlungu. Ngangivame kutikhumbuta ngeluhlobo lwemuntfu Make langilo mbamba—abenelutsandvo, umusa futsi ephana. Ngafundza kutsi bantfu labacindzetelekile basho tintfo letinyenti labangakafisi kutisho. Intfo lembi lengase yentiwe ngulomunye kusho emavi lahlabako.” Taga 19:11 titsi: “Umuntfu lonekucondza uyakubamba kutfukutsela kwakhe; nangabe umuntfu amkhuba, kuba ludvumo kuye kumtsetselela.”

8. Bobani ngalokukhetsekile lofanele ‘sibakhombise’ lutsandvo, futsi ngani?

⁸ ‘Singamnaka’ njani umuntfu lodvumatekile ngenca yelihlazo futsi lonemuva welicala ngenca yaloko lakwenta esikhatsini lesendlulile nanobe asasitsetse sinyatselo sekulungisa? Ngalokumayelana nesoni lebesiphendvukile eKhorinte Pawula wabhala: “Nimcolele nibuye nimkhutsate, ningamyekeleli etinhlungwini adzimate aphele. Ngako ngiyanincenga kutsi nimkhombise kutsi nimtsandza ngempela.” (2 Khor. 2:7, 8) Ngekusho kwalesinye sichazamagama, ligama lelitsi ‘khombisa’ lisho “kwenta ngetento.” Angeke simane sitsi loyo muntfu uyalucondza lutsandvo lwetfu nekutsi sinendzaba naye. Kufanele alubone lolo tsandvo ngesimo setfu sengcondvo nangetento tetfu.

“SISITANE NGEKUKHUTSATANA ELUTSANDVWENI NASEMISEBENTINI LEMIHLE”

9. Kusho kutsini ‘kusitana ngekukhutsatana elutsandvweni nasemisebentini lemihle’?

⁹ Naku Pawula lakubhala: “Asinakane, sisitane ngekukhutsatana elutsandvweni nasemisebentini lemihle.” Kufanele sikhutsate lesikholwa nabo kutsi babonise lutsandvo futsi bente nemisebenti lemihle. Nangabe umlilo sewucisha, kungase kudzingeke siwukhwetele futsi sivutsele. (2 Thim. 1:6) Ngendlela lefanako, ngelutsandvo singakwati kukhutsata bazalwane betfu kutsi babonise lutsandvo lwabo ngaNkulunkulu nangabomakhelwane. Kuncoma lokungiko kubalulekile kute labanye batewukhutsateka emisebentini lemihle.

10, 11. (a) Bobani emkhatsini wetfu labadzinga kunconywa? (b) Fanekisa kutsi kunconywa kungamsita njani umuntfu ‘losawele esonweni.’

¹⁰ Sonkhe siyadzinga kunconywa, ngisho nobe sidvumatekile nome cha. Lomunye umzalwane lomdzala welibandla wabhala: “Babe wami akazange ngisho nakanye atsi ngente lokutsite lokuhle. Ngakhula ngingatetsembi. . . . Nanobe ngineminyaka lengu-50 budzala, ngiyajabula lapho bangani bani bangicinisekisa kutsi ngenta umsebenti lomuhle njengemzalwane lomdzala. . . . Simo lengabhekana naso singifundzise kutsi kubaluleke ngani kuniketa labanye sikhutsato futsi ngiyabakhutsata.” Kunconywa kungaba nemtselela lomuhle kubo bonkhe bantfu—lokufaka ekhatsi emahlahlandlela, labadzala belibandla ngisho nalabo labadvumatekile.—Rom. 12:10.

¹¹ Nangabe ‘bazalwane labadzala betama kwephula umuntfu losawele esonweni,’ seluleko selutsandvo nekumncoma lokufanele kungase kubangele lesoni kutsi sibuyele ekwenteni imisebenti lemihle. (Gal. 6:1) Loko kwenteka kudzadze libito lakhe lokunguMiriam. Wabhala watsi: “Ngabhekana nesikhatsi lesimatima kakhulu ekuphileni kwami ngesikhatsi labanye bangani bami bashiya inhlangano futsi ngaso leso sikhatsi babe wami wahlaselwa sifo sekopha engcondvweni. Ngacindzeteleka kakhulu. Ngesizatfu sekutsi ngangetama kwelapha lokucindzeteleka, ngacala kutsandzana nemfana welive.” Loku kwamenta watibona angasatsandvwa nguJehova, futsi bekafuna kulishiya phansi liciniso. Ngesikhatsi lomdzala welibandla amkhumbuta ngemsebenti wakhe wekwetsembeka labekawenta esikhatsini lesendlulile, wacala kusanguluka engcondvweni. Wabavumela labadzala kutsi bakhulume naye bamcinisekisa kutsi Jehova uyamtsandza. Uphumela waloko waba kutsi lutsandvo lwakhe ngaNkulunkulu luvuseteleke. Wabucedza budlelwane bakhe nalomfana longakholwa wachubeka akhonta Jehova.

12. Yini lesingayisho ngekusebentisa inkhulumo leyenta lotsite ative anemahloni, inkhulumo lehlabako nobe kwenta lomunye abe nemuva welicala?

¹² Kwenta lomunye ative anemahloni ngekucatsanisa loko lakwentako nalokwentiwa ngulabanye, sikhulume emavi lahlabako ngesizatfu sekutsi akakulandzeli loko lokusesimisweni nobe simente ative anelicala ngekutsi akenti lokunyenti, kwenta njalo kungase kumkhutsate sikhashana lesincane. Ngakulolunye luhlangotsi, kuncoma loyo lesikholwa naye futsi sikhulume ngelutsandvo lanalo ngaNkulunkulu kungaba nemiphumela lemihle kakhulu.—Fundza Filiphi 2:1-4.

‘KHUTSATANANI’

13. Kufaka ekhatsi ini kukhutsata labanye? (Buka sitfombe lesisekucaleni.)

¹³ Sidzinga ‘kukhutsatana kakhulu njengobe lilanga laNkulunkulu lisondzela.’ Kukhutsata labanye kufaka ekhatsi kubasita kutsi bachubekele phambili nemsebenti waNkulunkulu. Njengobe kukhutsatana elutsandvweni nasemisebentini lemihle kungafaniswa nekuvutsela umlilo lobesewucima, kukhutsata labanye kungafaniswa nekwengeta tinkhuni kute uvutse kakhulu nobe ushise kakhulu. Kukhutsata labanye kufaka ekhatsi kucinisa nekudvudvuta labadvumatekile. Nangabe sitfole litfuba lekukhutsata umuntfu lonjalo, kufanele sikhulume nabo kahle ngelutsandvo. (Taga 12:18) Ngetulu kwaloko, ‘asisheshe kuva sephute kukhuluma.’ (Jak. 1:19) Nangabe silalelisisa ngeluvelo, singase sikwati kutfola loko lokumcedza emandla umKhristu lesikanye naye futsi sisho lokutamsita kutsi alungise letimo labhekene nato.

14. Umzalwane lobekadvumatekile wasitakala njani?

¹⁴ Cabanga ngendlela lomunye lomdzala welibandla loneluvelo lasita ngayo lomunye umzalwane lobekasaphole iminyaka leminyenti. Njengobe lona lomdzala abechubeka alalela lomzalwane, kwacaca kutsi usenalo lutsandvo lolujulile ngaJehova. Bekabafundza ngenkhutsalo bomagazini be-Sicongosekulindza enta nemetamo yekuba khona njalo emihlanganweni. Nobe kunjalo, indlela labanye labebamemukela ngayo ebandleni beyimente wativa advumatekile futsi abuhlungu. Lomzalwane lomdzala wamlalela ngeluvelo ngaphandle kwekumehlulela futsi wakhombisa lutsandvo ngalomzalwane nemndeni wakhe. Kancane kancane, lomzalwane wabona kutsi bekavumela tintfo latenta eminyakeni leyendlulile kutsi timvimbele ekukhonteni Nkulunkulu lamtsandzako. Lona lomdzala wamema lomzalwane kutsi ahambe naye emsebentini wekushumayela. Ngelusito lwalomzalwane lomdzala, lomzalwane wachubeka nemsebenti wakhe wekushumayela ngekuhamba kwesikhatsi waphindze wabekwa kutsi abe ngulomdzala welibandla.

15. Yini lesingayifundza kuJehova ngekukhutsata labo labadvumatekile?

¹⁵ Umuntfu lodvumatekile kungenteka angativa ancono nobe alwemukele ngekushesha lusito lesimniketa lona. Kungadzingeka kutsi sichubeke simsekela. Pawula watsi: “Chubekani nikhutsata labo lababutsakatsatsaka, nibabeketelele bonkhe.” (1 Thes. 5:14, ngekusho kwe-American Translation) Kunekutsi ngekushesha siphele emandla ngemuntfu lobutsakatsaka, ‘asichubeke sibakhutsata,’ futsi sibasekela. Ngaletinye tikhatsi endvulo Jehova wasebentelana netinceku takhe letidvumatekile ngekubeketela. Sibonelo saloku kutsi Nkulunkulu waba nemusa ku-Elija, acabangela imiva yakhe. Jehova waniketa lomphrofethi loko labekakudzinga kute ente umsebenti wakhe. (1 Khos. 19:1-18) Ngesizatfu sekutsi Davide bekaphendvuke ngekweliciniso, Jehova wamtsetselela ngemusa. (Hla. 51:7, 17) Nkulunkulu waphindze wasita nembhali weTihlabelelo 73, lowacishe wakushiya kumkhonta. (Hla. 73:13, 16, 17) Jehova unemusa kitsi, ikakhulukati lapho sidvumatekile futsi siphelelwa ngemandla. (Eks. 34:6) Umusa wakhe ‘musha onkhe emalanga’ futsi ‘angeke uphele.’ (Sil. 3:22, 23) Jehova ulindzele kutsi silandzele sibonelo sakhe futsi sibaphatse kahle labacindzetelekile.

KHUTSATANANI KUTE NITOWUHLALE NISENDLELENI YEKUPHILA

16, 17. Njengobe kuphela kwalelive lelibuswa nguSathane kusondzela, yini lokufanele sitimisele kuyenta, futsi ngani?

¹⁶ Kuletibonshwa letingu-33 000 letasuka enkambu yekuhlushwa eSachsenhausen, kwafa tinkhulungwane. Nobe kunjalo, bonkhe boFakazi BaJehova labangu-230 labashiya lenkambu basindza. Sikhutsato nekusekelana labakutfola kwaba nemtselela lomkhulu kakhulu ekushintjeni loluhambo lwabo lwekufa lube luhambo lwekusindza.

¹⁷ Lamuhla ‘sisendleleni leyisa ekuphileni.’ (Mat. 7:14) Ngekushesha tonkhe tinceku taJehova titawuba munye njengobe tingena emhlabeni lomusha wekulunga. (2 Phet. 3:13) Shengatsi singatimisela kusitana njengobe sisendleleni leya ekuphileni lokuphakadze.