Nkulunkulu Ukuvumele Leni Kuhlupheka?

KUMPHATSA NJANI NKULUNKULU KUHLUPHEKA KWETFU?

Calisile: Sawubona Takhona. Ngiyajabula kuphindze ngikutfole ekhaya.

Takhona: Nami ngiyajabula kutsi uphindze wabuya.

Calisile: Nasigcina kubonana sacoca ngekutsi kumphatsa njani Nkulunkulu kuhlupheka kwetfu.a Watsi bewusolo utibuta ngalendzaba ikakhulukati ngemuva kwekulimala kwamake wakho engotini yemoto. Awusho, sewunjani vele?

Takhona: Kushiyana emalanga, kodvwa lamuhla uncono.

Calisile: Ngiyajabula nakunjalo sisi. Kufanele kutsi kumatima kuwe kuhlale unelitsemba kulesimo lokuso.

Takhona: Kona akulula. Ngalesinye sikhatsi ngiyatibuta nje kutsi kuyoze kube kunini make akulesimo.

Calisile: Nguleyo vele indlela lesivama kutiva ngayo. Mhlawumbe uyakhumbula kutsi nangikuvakashele kucala ngakushiya nembuto lotsi Nkulunkulu ukuvumele leni kuhlupheka kutsi kuchubeke kukhona nangabe anemandla ekukucedza.

Takhona: Yebo, ngisakhumbula.

Calisile: Singakahloli imphendvulo yalombuto eBhayibhelini, ngicela sike sikhumbutane emaphuzu lambalwa lesacoca ngawo.

Takhona: Kulungile sisi.

Calisile: Lokunye lesacoca ngako kutsi ngisho nendvodza lebeyetsembekile leyaphila ngesikhatsi sekubhalwa kweliBhayibheli yake yatibuta kutsi Nkulunkulu ukuvumelelani kuhlupheka. Kodvwa Nkulunkulu akayitsetsisanga futsi akazange amane ayitjele kutsi kudzingeka ikholwe kakhulu.

Takhona: Ngangicala kukuva loko.

Calisile: Saphindze safundza kutsi Nkulunkulu Jehova akatsandzi kusibona sihlupheka. Sibonelo saloko kutsi liBhayibheli litsi ngalesikhatsi bantfu bakhe bakhatsatekile “naye abekhatsatekile.”b Akusidvudvuti yini kwati kutsi Nkulunkulu uyasivela nasihlupheka?

Takhona: Kuyasidvudvuta.

Calisile: Ekugcineni savumelana ngekutsi uMdali wetfu unemandla lamakhulu kakhulu. Ngenca yaloko asingabati-ke kutsi noma nini angakhona kucedza kuhlupheka.

Takhona: Nguloko-ke lelengingakuva kahle wena sisi. Nkulunkulu utivumelelani tonkhe letintfo letimbi kutsi tenteke kantsi unawo emandla ekuticedza?

NGUBANI LOBEKACINISILE?

Calisile: Imphendvulo yembuto wakho singayitfola ngekufundza incwadzi yekucala eBhayibhelini, lokunguGenesisi. Uyetayele yini indzaba ya-Adamu na-Eva kanye nesitselo lobekutsiwe bangasidli?

Takhona: Yebo sisi, ngayifundza leyo ndzaba kuSontfo sikolwa. Nkulunkulu watsi bangasidli sitselo lesitsite, kodvwa bona basidla.

Calisile: Ushaye khona. Kwanyalo, asesicoce kabanti ngalokwenta bo-Adamu na-Eva bona. Loko kunemtselela lomkhulu embangeleni yekuhlupheka kwetfu. Ngicela ufundze Genesisi sehluko 3, livesi 1 kuya ku-5.

Takhona: Asengiyifundze. “Inyoka yayinebucili kwendlula tonkhe tilwane tesiganga labetentile Nkulunkulu Simakadze. Yatsi kumfati: ‘Kodvwa ngempela Nkulunkulu ushito yini kutsi: ‘Ningadli nome ngusinye nje sitselo setihlahla letisensimini’? Umfati waphendvula inyoka watsi: ‘Singatidla titselo tetihlahla letisensimini, ngaphandle kwesitselo sesihlahla lesisekhatsi nensimi; Nkulunkulu utsite: ‘Ningasidli sitselo sesihlahla lesisekhatsi nensimi, ningasitsintsi nekusitsintsa, kuze ningafi.’” Inyoka yatsi kumfati: ‘Ningeke nife. Kepha Nkulunkulu uyati kutsi mhlazana nisidla, emehlo enu ayawuvuleka, bese nifanana naNkulunkulu nikwati lokuhle nalokubi.’”

Calisile: Ufundze kahle sisi. Asesiwahlatiye kancane lamavesi. Kwekucala, ngicela uphawule kutsi inyoka yakhuluma nemfati, longu-Eva. Lenye incenye yeliBhayibheli isitjela kutsi kahle kahle bekunguSathane Develi lowakhuluma naye asebentisa inyoka.c Sathane wabuta Eva mayelana nemyalo waNkulunkulu ngalokucondzene nesitselo lesitsite. Unakile yini kutsi Nkulunkulu watsi kutawentekani kubo-Adamu na-Eva nabasidla?

Takhona: Watsi batawukufa.

Calisile: Ucinisile. Emavini akhe lalandzela, Sathane wambeka licala lelibovu Nkulunkulu. Asewunake kutsi watsi: “Ningeke nife.” Sathane wabita Nkulunkulu ngemcambimanga.

Takhona: Angikaze ngive kutsi lendzaba iyakhuluma nangaloko.

Calisile: Nakabita Nkulunkulu ngemcambimanga, Sathane waphakamisa inkinga lobekutawudzingeka sikhatsi kutsi isombululeke. Uyabona yini kutsi kungani ngisho njalo?

Takhona: Eyi, angiboni kahle.

Calisile: Mhlawumbe ngingakubekisela kanje: Asesitsi ngalelinye lilanga ngita kuwe ngifike ngikutjele kutsi nginemandla kunawe. Ungangikhombisa njani kutsi ngiyaphosisa?

Takhona: Ngicabanga kutsi singavivinyana ngalokutsite lokungakhombisa kutsi ngubani lonemandla.

Calisile: Yebo kunjalo. Mhlawumbe singakhetsa intfo leyesindzako bese siyabona kutsi ngubani lokhona kuyiphakamisa. Vele kuyintfo lemelula kubona kutsi ngubani lonemandla.

Takhona: Ngikuva kahle.

Calisile: Kodvwa-ke asesitsi esikhundleni sekutsi nginemandla kunawe, ngitsi ngetsembeke kakhulu kunawe. Kungaba lula yini kubona buciniso baloko?

Takhona: Hhayi, ngicabanga kutsi akusimelula.

Calisile: Ucinisile, phela vele kwetsembeka akufani nemandla, wona langabonakala ngesivivinyo nje lesimelula.

Takhona: Yebo, vele kunjalo.

Calisile: Empeleni, lenkinga ingasombululeka kuphela ngekutsi kube nesikhatsi lesenele sekutsi labanye basibuke sobabili kute babone kutsi ngubani mbambambamba lowetsembeke kakhulu.

Takhona: Kuvakala kunengcondvo loko.

Calisile: Ase uphindze ucabange ngaloko lokukuGenesisi. Sathane watsi unemandla yini kunaNkulunkulu?

Takhona: Cha.

Calisile: Nkulunkulu ngabe wamkhombisa kalula nje kutsi nguye lonemandla. Kodvwa, Sathane wenta shengatsi yena wetsembeke kakhulu kunaNkulunkulu. Bekufana nekutsi utsi: ‘Nkulunkulu uyakuyenga, mine ngikutjela liciniso.’

Takhona: Ngikuva kahle sisi.

Calisile: Ngekuhlakanipha kwakhe, Nkulunkulu bekati kutsi indlela lekahle yekusombulula lenkinga kutsi kwendlule sikhatsi lesitsite. Loko bekutawenta kucace kutsi ngubani lobekanemanga nalobekacinisile.

INDZABA LEBALULEKILE

Takhona: Manje kusho kutsi Eva nakafa akuzange yini kubonakale kutsi Nkulunkulu abecinisile?

Calisile: Ngandlela tsite kwabonakala, kodvwa lensayeya yaSathane yayingagcini ngaloko. Ngicela uphindze ubuke livesi 5. Uyakubona yini lokunye Sathane lamtjela kona Eva?

Takhona: Watsi nakadla lesitselo utawuvuleka emehlo.

Calisile: Ushaye khona, wase utsi abetawubese ‘ufana naNkulunkulu akwati lokuhle nalokubi.’ Ngako-ke Sathane bekatsi kunalokuhle Nkulunkulu labagodlela kona bantfu.

Takhona: Sengiyabona.

Calisile: Naloko futsi kwakuyinsayeya lenkhulu.

Takhona: Sewusho kutsini manje?

Calisile: Ngalamavi akhe Sathane bekasho kutsi Eva kanye nabo bonkhe labanye bantfu, bebangaphila ncono ngaphandle kwekubuswa nguNkulunkulu. Nakulesimo, Jehova bekati kutsi indlela lencono kakhulu yekulungisa loko bekutawuba kuniketa Sathane litfuba lekutsi akufakazele. Ngako Nkulunkulu uvumele Sathane kutsi abuse lomhlaba sikhatsi lesitsite. Loko kusenta sibone kutsi yini lebangela kuhlupheka lokungaka emhlabeni—kungenca yekutsi Sathane nguye lobusa umhlaba, hhayi Nkulunkulu.d Kodvwa kunalokujabulisako.

Takhona: Hawu! Ngukuphi loko?

Calisile: LiBhayibheli lisifundzisa naku lokubili lokujabulisako mayelana naNkulunkulu. Kwekucala, Jehova uyasivela nasiselusizini. Asewubuke nje sibonelo saloko kunankha emavi eNkhosi Davide lakuTihlabelelo 31:7. Davide wahlupheka kakhulu nakasaphila kodvwa ngicela unake loko lakusho nakathantaza kuNkulunkulu. Ngicela ulifundze lelivesi.

Takhona: Litsi: “Ngiyakwetsaba ngijabule ngemusa wakho, ngobe wena ukubonile kuhlupheka kwami, watati tinsizi temphefumulo wami.”

Calisile: Nanobe Davide ehlelwa tinsizi, kwamdvudvuta kwati kutsi Jehova abekubona konkhe lokwakumehlela. Kuyakudvudvuta yini wena kwati kutsi Jehova ubona konkhe ngisho nebuhlungu lesikubo labanye bantfu labangeke babubone?

Takhona: Yebo, kuyangidvudvuta.

Calisile: Kwesibili kutsi Nkulunkulu angeke avumele kuhlupheka kuchubeke siphelane. LiBhayibheli lifundzisa kutsi ngekushesha utawucedza kubusa kwaSathane futsi utaticedza nya tonkhe tintfo letimbi letentekako letifaka ekhatsi loko wena namake wakho lenibhekene nako. Ngingabuya yini evikini lelitako ngitokukhombisa kutsi ngusiphi siciniseko lesinaso sekutsi ngekushesha Nkulunkulu utakucedza konkhe kuhlupheka?e

Takhona: Ngingajabula kakhulu.