IMIBUTO YELIBHAYIBHELI IYAPHENDVULWA
Kusizuzisa ngani kufa kwaJesu?
Ngesikhatsi Nkulunkulu adala bantfu, abehlose kutsi baphile phakadze emhlabeni, bangaguli noma bafe. Nome kunjalo, umuntfu wekucala, Adamu, akazange amlalele uMdali wase ulahlekelwa litsemba lekuphila phakadze. Njengobe sisitukulwane sa-Adamu, sazuza kufa kuye. (Roma 5:8, 12; 6:23) Nkulunkulu weliciniso, Jehova, watfumela iNdvodzana yakhe, Jesu, emhlabeni kute asifele aphindze abuyisele loko lokwalahlwa ngu-Adamu.—Fundza Johane 3:16.
Jesu wafa kute avulele bantfu litfuba lekuphila phakadze. Ucabanga kutsi kutawuba njani kuphila phakadze emhlabeni?
Kufa kwaJesu kusivulela litfuba lekutsetselelwa kwetono tetfu nekuphila phakadze. LiBhayibheli lisitjela ngendlela kuphila emhlabeni lokuyawuba ngayo nasesingasagugi, singasaguli, futsi singasafi.—Fundza Isaya 25:8; 33:24; Sembulo 21:4, 5.
Kufanele sikukhumbule kanjani kufa kwaJesu?
Ngebusuku bangaphambi kwekufa kwakhe, Jesu watjela balandzeli bakhe kutsi bakhumbule kufa kwakhe ngekwenta umkhosi longenamidanti. Kukhumbula kufa kwaJesu ngaleyondlela umnyaka ngamunye kusivulela litfuba lekuzindla ngendlela Jehova naJesu lababatsandza ngayo bantfu.—Fundza Lukha 22:19, 20; 1 Johane 4:9, 10.
Kulomnyaka, Sikhumbuto sekufa kwaJesu sitawuba ngeMsombuluko, April 14, ngemuva kwekushona kwelilanga. Uyamenywa kutsi uhlanganyele kuso kanye naBoFakazi BaJehova basendzaweni yakini.—Fundza Roma 1:11, 12.