IMIBUTO YELIBHAYIBHELI IYAPHENDVULWA
Kungani kufanele sikhumbule kufa kwaJesu?
Kufa kwaJesu kwenta kutsi kube naliphi litsemba ngelikusasa?—Isaya 25:8; 33:24
Kufa kwaJesu kwakuyintfo lebaluleke kakhulu leyake yenteka, ngobe wafa kuze ente kuphila kwebantfu kubuyele esimeni lebekukuso ekucaleni. Umuntfu abengakadalwa anesifiso sekwenta tintfo letimbi, futsi abengakadalelwa kutsi agule nobe afe. (Genesisi 1:31) Kodvwa sono sangena emhlabeni ngemuntfu wekucala, lokungu-Adamu. Jesu wanikela ngekuphila kwakhe kuze asisindzise esonweni nasekufeni.—Fundza Matewu 20:28; Roma 6:23.
Nkulunkulu wakhombisa lutsandvo lwakhe lolukhulu ngekutfumela iNdvodzana yakhe emhlabeni kuze itosifela. (1 Johane 4:9, 10) Jesu watjela balandzeli bakhe kutsi nabakhumbula kufa kwakhe bente umkhosi lomncane, basebentise sinkhwa neliwayini kuphela. Kwenta loku minyaka yonkhe kuyindlela lesikhombisa ngayo kubonga kwetfu ngelutsandvo lesaboniswa lona nguNkulunkulu kanye naJesu.—Fundza Lukha 22:19, 20.
Bobani lokufanele badle sinkhwa futsi banatse neliwayini?
Ngesikhatsi Jesu atjela bafundzi bakhe kwekucala kutsi bakhumbule kufa kwakhe, wakhuluma ngesivumelwane. (Matewu 26:26-28) Lesivumelwane senta kutsi bona kanye nalabanye labambalwa babe nelitsemba lekutsi babe ngemakhosi nebaphristi bakanye naye ezulwini. Nanobe tigidzi tebantfu tikukhumbula kufa kwaJesu, ngulabo labakulesivumelwane kuphela labadla sinkhwa futsi banatse neliwayini.—Fundza Sembulo 5:10.
Sekuphele iminyaka lengaba ngu-2 000 solo Jehova akhetsa labo labayoba ngemakhosi. (Lukha 12:32) Bambalwa ngelinani nabacatsaniswa nalabo labayawuphila phakadze emhlabeni.—Fundza Sembulo 7:4, 9, 17.