Hloniphani Lasebakhulile Labasemkhatsini Wenu

1. Ngusiphi simo lesibuhlungu bantfu labakuso?

BEKUNGASIYO inhloso yaJehova kutsi bantfu bahlushwe yimiphumela lebuhlungu yekuguga. Kodvwa injongo yakhe bekukutsi bantfu bajabulele imphilo lenhle ePharadisi. Nyalo “indalo yonkhe ichubeka ilila kanye kanye futsi isetinhlungwini.” (Rom. 8:22) Ucabanga kutsi Nkulunkulu utiva njani nakabona umonakalo sono lesiwubange kubantfu? Ngetulu kwaloko, kubantfu labanyenti lasebakhulile kuba nesikhatsi ekuphileni kwabo lapho banganakwa khona, lokusikhatsi lapho basuke baludzinga kakhulu lusito.—Hla. 39:5; 2 Thim. 3:3.

2. Kungani emaKhristu abakhatsalela kakhulu lasebakhulile?

² Bantfu baJehova bajabula kakhulu ngekutsi banalasebakhulile emabandleni. Siyazuza ekuhlakanipheni kwabo futsi sibonelo sabo sekukholwa siyasikhutsata. Labanyenti betfu bahlobene nalaba lasebakhulile. Kodvwa-ke ngisho sihlobene nabo nobe cha, siyayikhatsalela inhlalakahle yabo. (Gal. 6:10; 1 Phet. 1:22) Sonkhe sitawuzuza ngekuhlola umbono waNkulunkulu ngebantfu lasebakhulile. Sitawuphindze sihlole imitfwalo emalunga emndeni kanye nelibandla lelinayo ekunakekeleni labo lesebakhulile.

“UNGANGILAHLI”

3, 4. (a) Ngusiphi sicelo lesibalulekile umbhali weTihlabelelo 71 lasenta kuJehova? (b) Yini labo lasebakhulile ebandleni labangayicela kuNkulunkulu?

³ Umbhali lophefumulelwe weTihlabelelo 71:9 wancenga Nkulunkulu watsi: “Ungangilahli esikhatsini sebudzala bami, ungangikhohlwa nase ngiphelelwa ngemandla.” Kubonakala shengatsi lamavi achubeka kuTihlabelelo 70, letinembhalo longenhla lotsi “Sihlabelelo saDavide.” Ngako kungenteka kutsi nguDavide lowenta lesicelo lesisifundza kuTihlabelelo 71:9. Wakhonta Nkulunkulu kusukela asesemncane kwaze kwaba sekugugeni kwakhe, futsi Jehova wamsebentisa ngetindlela letinyenti. (1 Sam. 17:33-37, 50; 1 Khos. 2:1-3, 10) Nanobe kunjalo, Davide wasibona sidzingo sekucela Jehova kutsi achubeke amnakekela.—Fundza Tihlabelelo 71:17, 18.

⁴ Bantfu labanyenti lamuhla bafanana naDavide. Nangetulu kwekukhula ngeminyaka kanye ‘netinsuku tekuhlupheka,’ bayachubeka badvumisa Nkulunkulu ngalokusemandleni abo. (Shu. 12:1-7) Labanyenti abasakhoni kwenta tintfo lebebakhona kutenta ngaphambili, lokufaka ekhatsi umsebenti waJehova. Kodvwa nabo bangathantaza kuJehova kutsi achubeke ajabula ngabo futsi abanakekele. Laba labetsembekile lasebakhulile, bangaciniseka kutsi Nkulunkulu utayiphendvula imithantazo yabo. Imithantazo yabo iyafana naloyo Davide lawenta ngesikhatsi aphefumulelwe nguNkulunkulu.

5. Ngumuphi umbono Jehova lanawo ngebantfu labetsembekile lasebakhulile?

⁵ ImiBhalo ikwenta kucace kutsi labo labetsembekile lasebakhulile babaluleke kakhulu kuJehova nekutsi ulindzele kutsi tinceku takhe tibahloniphe. (Hla. 22:24-26; Taga 16:31; 20:29) Incwadzi yaLevithikhusi 19:32 itsi: “Niyawutitfoba embikwalasebakhulile, nibahloniphe, nidvumise Nkulunkulu wenu. NginguSimakadze.” Ngesikhatsi kubhalwa lamavi, kuhlonipha lasebakhulile ebandleni kwakuyintfo lebaluleke kakhulu, futsi kusenjalo nalamuhla. Kodvwa kutsiwani ngekubanakekela? Ngubani lokufanele ente lowo msebenti?

UMTFWALO UMNDENI LONAWO

6. Ngusiphi sibonelo Jesu lasibeka endzabeni yekunakekela batali?

⁶ LiVi laNkulunkulu litsi: “Hlonipha uyihlo nenyoko.” (Eks. 20:12; Ef. 6:2) Jesu wawugcizelela lomyalo ngekutsi alahle baFarisi netati temtsetfo, lebebangafuni kunakekela batali babo. (Mak. 7:5, 10-13) Naye wasibekela sibonelo lesihle kulendzaba. Ngesikhatsi aselugodvweni sekatawufa, Jesu wacela Johane umfundzi wakhe labemtsandza kutsi anakekele make wakhe, lokungenteka abesangumfelokati.—Joh. 19:26, 27.

7. (a) Ngusiphi simiso umphostoli Pawula lasibeka mayelana nekunakekelwa kwebatali? (b) Itsini ingcikitsi yemavi aPawula?

⁷ Aphefumulelwe, umphostoli Pawula wabhala kutsi emaKhristu kufanele anakekele imindeni yawo. (Fundza 1 Thimothi 5:4, 8, 16.) Asewucabange ngengcikitsi yalamavi Pawula lawabhalela Thimothi. Wachaza kutsi ngubani longase akufanele kutfola lusito lwetimali ebandleni nekutsi ngubani longase angalutfoli. Wakwenta kwacaca kutsi bantfwana labakholwako, batukulu, kanye netihlobo tebafelokati lasebakhulile ngibo kakhulu lokufanele babanakekele. Ngako-ke loku bekutawenta kutsi libandla lingabi nemtfwalo ngalokungakadzingeki. Nalamuhla, lenye indlela emaKhristu lakhombisa ngayo “kwesaba Nkulunkulu” kutsi anakekele tihlobo tawo letidzinga lusito.

8. Ngukuphi kuhlakanipha lesikubonako endzabeni yekutsi liBhayibheli lingasitjeli ngalokucondzile kutsi batali lasebakhulile kufanele banakekelwe njani?

⁸ Kalula nje, bantfwana labangemaKhristu lasebakhulile, banemtfwalo wekucinisekisa kutsi tidzingo tebatali babo tiyanakekelwa. Nanobe Pawula abekhuluma ngetihlobo letikholwako, kodvwa nebatali labangasiwo emalunga elibandla lebuKhristu akukafaneli banganakwa. Tindlela bantfwana labanakekela ngato batali babo tiyehluka. Timo tebantfu atifani. Tidzingo, timo kanye nemphilo yalabo labatsintsekako kuyehluka. Labanye bantfu lasebakhulile banebantfwana labanyenti, kantsi labanye banemntfwana munye nje vo. Labanye bangalutfola lusito lwaHulumende kantsi labanye ngeke balutfole. Kantsi futsi tintfo labatifisako bantfu labadzinga lusito atifani. Ngako-ke, ngeke kube kuhlakanipha nobe kukhombisa lutsandvo kutsi sisole indlela umuntfu lotsite layisebentisako kute anakekele tihlobo lesetikhulile. Jehova angasibusisa nobe ngusiphi sincumo lesisekelwe emiBhalweni futsi asente siphumelele, njengobe nje bekunjalo kusukela emalangeni aMosi.—Num. 11:23.

9-11. (a) Ngutiphi timo letimatima labanye labangase bahlangabetane nato? (Buka sitfombe lesisekucaleni kwalesihloko.) (b) Kungani bantfwana lasebakhulile kungakafaneli bajake kushiya umsebenti wasikhatsi sonkhe? Fanekisa.

⁹ Kungaba matima kunakekela batali lasebakhulile nangabe bahlala khashane nebantfwana babo. Kuhhohloka kwemphilo yemtali, mhlawumbe ngesizatfu sekutsi uwile, nobe wephukile, nobe lokunye nje, kungase kwente kutsi kube nesidzingo sekutsi bantfwana baye bayomhlola. Kungase kudzingeka kutsi labatali batfole lusito, mhlawumbe lwesikhashana nobe lwesikhatsi lesidze.a

¹⁰ Tisebenti tasikhatsi sonkhe letabelwe khashane nasekhaya, kungadzingeka kutsi tente tincumo letingasimelula. Labo labakhonta eBethel, nalabatitfunywa telivangeli kanye nebabonisi labajikeletako batsatsa tabelo tabo njengaletibalulekile, nanjengesibusiso lesivela kuJehova. Nanobe kunjalo, nangabe batali babo sebagula, intfo yekucala labangase bayicabange kutsi kudzingeka bashiye sabelo sabo, babuyele ekhaya bayewunakekela batali. Kodvwa-ke kukuhlakanipha kutsi bathantaze bahlole kutsi nguloko yini vele batali babo labakudzingako nobe labakufisako. Umuntfu akudzingeki asheshe ashiye sabelo sakhe, futsi etikhatsini letinyenti loko kungase kungadzingeki. Kungenteka yini kutsi lenkinga yemphilo yesikhashana, futsi mhlawumbe ebandleni umtali lakulo bakhona labangakujabulela kumsita?—Taga 21:5.

¹¹ Asewucabange ngesibonelo semadvodzana lamabili lebekabelwe khashane nasekhaya. Lenye beyisitfunywa selivangeli eNingizimu Melika kantsi lena lenye beyikhonta endlunkhulu yaBoFakazi leseBrooklyn, eNew York. Batali babo labakhulile bebadzinga lusito. Lamadvodzana kanye nebafati bawo bavakashela ekhaya eMphumalanga ye-Asia bayewubona kutsi nguluphi lusito lobeludzingwa batali babo. Ngekuhamba kwesikhatsi, laba labebatitfunywa telivangeli eNingizimu Melika bebacabangela kushiya sabelo sabo babuyele ekhaya. Kwatsi kusenjalo umchumanisi wesigungu salabadzala wasebandleni lapho kuhlanganyela khona batali babo, wabashayela lucingo. Labadzala balelibandla besebacocile ngalesimo futsi bebafuna letitfunywa telivangeli tichubeke esabelweni sato sikhatsi lesidze. Labazalwane bebawujabulela umsebenti lobewentiwa nguletitfunywa telivangeli futsi bebatimisele kwenta konkhe lokusemandleni kute babasite ekunakekeleni batali babo. Bonkhe kulomndeni bakujabulela kakhulu kuboniswa lutsandvo ngalendlela.

12. Yini lokufanele umndeni wemaKhristu uyicabangele mayelana nanobe ngutiphi tincumo lotitsatsako kute unakekele batali?

¹² Nobe ngabe nguyiphi indlela umndeni wemaKhristu loyisebentisako kute unakekele tidzingo tebatali lasebakhulile, lokumcoka kakhulu kuciniseka kutsi loko kulimelela kahle ligama laNkulunkulu. Asifuni nakancane kuba njengebaholi benkholo bangesikhatsi saJesu. (Mat. 15:3-6) Sifuna kutsi tincumo lesitentako tilimelele kahle libandla tiphindze tidvumise Nkulunkulu.—2 Khor. 6:3.

UMTFWALO LIBANDLA LELINAWO

13, 14. Kungani imiBhalo ingasenta siphetse ngekutsi emabandla anendzaba nekunakekela emalunga elibandla lasakhulile?

¹³ Akusibo bonkhe labangakhona kusita tisebenti tasikhatsi sonkhe ngalendlela lesisandza kukhuluma ngayo. Nanobe kunjalo, simo lesavela ngelikhulu lekucala sakwenta kwacaca kutsi emabandla anendzaba ekunakekeleni tidzingo tabodzadzewetfu nebazalwane lasebakhulile labatibonelo. Naku lokushiwo liBhayibheli ngelibandla lebeliseJerusalema: “Kute ngisho namunye kubo lobekaswele.” Loku akusho kutsi bonkhe bebeme kahle etimalini. Kubonakala shengatsi labanye bebete imali lenyenti, kodvwa “bonkhe bebehlukaniselwa, kuye ngetidzingo temuntfu ngamunye.” (Imis. 4:34, 35) Ngemuva kwaloko, kwavela inkinga kuleyo ndzawo. Kwabikwa kutsi labanye “bafelokati bebangemukeliswa kudla lobekwabiwa malanga onkhe.” Ngaleso sizatfu, baphostoli batsi akukhetfwe emadvodza labewufanele lomsebenti latawucinisekisa kutsi tidzingo talabafelokati tinakekelwa kahle nangendlela lefanako. (Imis. 6:1-5) Kuliciniso kutsi lokwabiwa kwekudla malanga onkhe bekulilungiselelo lesikhashana lekunakekela tidzingo talabo labebasandza kuba ngemaKhristu ngeliPhentekhoste la-33 C.E. labachubeka bahleti sikhashana eJerusalema kute bafundziswe. Ngisho nome kunjalo, loko lokwentiwa baphostoli kuveta kutsi libandla lingakhona kunakekela labo labadzinga lusito.

¹⁴ Njengobe kuvetiwe, Pawula waniketa Thimothi ticondziso lebetitawumsita abone timo lebetingenta bafelokati labangemaKhristu kubafanele kutfola lusito lwelibandla. (1 Thim. 5:3-16) Jakobe, umbhali weliBhayibheli lophefumulelwe, naye walivuma liciniso lekutsi emaKhristu anemtfwalo wekunaka tintsandzane, bafelokati, kanye nalabanye labaselusizini nobe labeswele. (Jak. 1:27; 2:15-17) Umphostoli Johane naye wachaza: “Nobe ngubani lonetintfo tekuphila lotsi nakabona umnakabo eswele angafuni kumvela, lutsandvo lwaNkulunkulu lungahlala kanjani kuloyo muntfu?” (1 Joh. 3:17) Nangabe umKhristu ngamunye anemtfwalo wekunakekela labeswele, kusho kutsi libandla nalo linemtfwalo lofanako.

15. Nasinakekela bazalwane nabodzadze lasebakhulile, ngutiphi tintfo lesingase siticabangele?

¹⁵ Kulamanye emave, bohulumende banika bantfu lasebakhulile imbasha, labanye banetinhlelo tekubanakekela, futsi labanye bahlela kutsi kube nebantfu lababanakekela emakhaya. (Rom. 13:6) Kuletinye tindzawo, kute tinhlelo letinjengaleti. Ngako-ke kutawuya ngetimo kutsi lasebakhulile badzinga lusito lolungakanani etihlotjeni tabo nobe ebandleni. Nangabe bantfwana labangemaKhristu bahlala khashane nebatali babo, loko kungase kulitsintse lizinga labakhona kubanakekela ngalo. Labantfwana batawube benta kahle nabachumana ngekukhululeka nalabadzala basebandleni batali babo labakulo kute baciniseke kutsi bayasicondza simo lomndeni lokuso. Sibonelo saloku kutsi labadzala bangakhona kusita labo lasebakhulile babakhombise kutsi ngutiphi tinhlelo tahulumende tekubanakekela letikhona endzaweni nekutsi bangazuza njani kuto. Bangase banake timo letifana nekutsi laba lasebakhulile bayalihlola yini liposi nobe kutsi imitsi bayinatsa kahle yini, bese bachazela bantfwana lasebakhulile balabatali ngaloku. Kukhulumisana ngalendlela kungenta simo singabi sibi kakhulu futsi kungaholela ekutfoleni tisombululo letisebentisekako. Nangabe kunalabasedvute labasitako nobe labeluleka emalunga emndeni lahlala khashane, kungenta kutsi simo singabi sibi kakhulu nekutsi umndeni ungakhatsateki kakhulu.

16. Lamanye emaKhristu awasita njani emalunga elibandla lasakhulile?

¹⁶ Ngenca yelutsandvo lanalo ngebazalwane lasebakhulile, lamanye emaKhristu anikele ngesikhatsi sawo kanye nemandla awo kute ente konkhe langakwenta ekunakekeleni nobe ngutiphi tidzingo labanato. Ayaciniseka kutsi awanaka kakhulu emalunga elibandla lasakhulile. Emalunga elibandla ayehlukaniselana lemisebenti futsi anakekele tidzingo talaba lasebakhulile ngekushintjana. Ngisho nobe timo tingawavumeli kutsi abe semsebentini wasikhatsi sonkhe, ayakujabulela kusita bantfwana balaba lasebakhulile kutsi bachubeke sikhatsi lesidze etabelweni tabo. Bazalwane labanjalo bakhombisa umoya lomuhle sibili! Nobe kunjalo, kuba nemusa kwalabazalwane akusho kutsi labantfwana sebakhululekile emtfwalweni wekunakekela batali babo.

BONISA INHLONIPHO KULASEBAKHULILE NGEKUKHULUMA EMAVI LAKHUTSATAKO

17, 18. Kuba nesimo sengcondvo lesihle kunayiphi indzima endzabeni yekunakekela lasebakhulile?

¹⁷ Bonkhe labo labafaka sandla ekunakekeleni labakhulile bangetama kukwenta kujabulise loko. Nangabe unendzima ekunakekeleni lasebakhulile, yenta konkhe lokusemandleni kute uhlale unesimo sengcondvo lesihle. Kuletinye timo, kukhula kubanga kungajabuli ngisho nekucindzeteleka. Kungadzingeka wente imetamo lemikhulu kute uhloniphe futsi ukhutsate bazalwane nabodzadze lasebakhulile ngekutsi ukhulume tintfo letakhako. Labo labanemlandvo lomuhle wekutidzela ekukhonteni Nkulunkulu kufanele banconywe ngaloko. Jehova akakukhohlwa loko labamentele kona, nebazalwane nabo abakukhohlwa kutidzela kwabo.—Fundza Malakhi 3:16; Hebheru 6:10.

¹⁸ Ngetulu kwaloko, emalungiselelo amalanga onkhe ekunakekela labakhulile angabeketeleleka kancono ngekutsi labanakekeli nalaba lasebakhulile bahlale bajabulile ngaso sonkhe sikhatsi. (Shu. 3:1, 4) Labo labakhulile bangakhombisa kucabangela ngekutsi bangafuni lusito lolungetulu. Kufanele bati kutsi bantfu bangakujabulela kuchubeka babasita futsi babavakashela nangabe banesimo sengcondvo lesihle. Kuvamile ngetivakashi kutsi tisho nankha emavi: “Ngaya kuyokhutsata lomunye losakhulile, kodvwa nami ngahamba sengitiva ngikhutsatekile.”—Taga 15:13; 17:22.

19. Nguliphi litsemba labasebasha kanye nalabo lasebakhulile labanalo ngelikusasa?

¹⁹ Sibuke embili esikhatsini lapho kutawube sekute kuhlupheka kanye nemiphumela yesono. Kwanyalo, tinceku taNkulunkulu kufanele tichubeke tibeka litsemba lato etintfweni letihlala phakadze. Siyati kutsi kukholwa etetsembisweni taNkulunkulu kuyasicinisa etikhatsini letimatima naleticindzetelako. Ngenca yekukholwa “asipheli emandla, kodvwa ngisho nobe umuntfu lesinguye ngephandle ahhohloka, umuntfu lesinguye ngekhatsi uvuselelwa malanga onkhe.” (2 Khor. 4:16-18; Heb. 6:18, 19) Ngetulu kwekuba nekukholwa lokucinile etetsembisweni taNkulunkulu, yini lengakusita ukhone kuhlangabetana nemtfwalo wekunakekela lasebakhulile? Letinye tindlela letisebentisekako kutawucocwa ngato esihlokweni lesilandzelako.