Sitsa Sekugcina, Lesikufa, Sitawentiwa Lite

1, 2. Yini bo-Adamu na-Eva labebayijabulela ekucaleni, futsi ngumiphi imibuto lephakamako?

NGESIKHATSI bo-Adamu na-Eva badalwa, bebete titsa. Bebabantfu labete sono lebebaphila epharadisi. Bebajabulela kuba nebudlelwane lobusedvute neMdali wabo njengobe bebayindvodzana nendvodzakati yakhe. (Gen. 2:7-9; Luk. 3:38) Nkulunkulu wabaniketa umsebenti lobalulekile. (Fundza Genesisi 1:28.) Kwakutawutsatsa sikhatsi lesitsite kutsi ‘bagcwalise umhlaba, bawuncobe.’ Kodvwa kute bachubeke ‘babusa etikwato tonkhe tilwane letihamba emhlabeni,’ bo-Adamu na-Eva bekutawudzingeka baphile phakadze. Adamu abengeke ayekele kwenta lomsebenti labekaniketwe wona ngesizatfu sekutsi sewufile.

² Kungani timo setishintje kangaka nyalo? Yini leseyibangela kutsi kube netitsa letinyenti letiphatamisa kujabula kwebantfu, njengobe sitsa lesikhulu kunato tonkhe kukufa? Yini Nkulunkulu latayenta kute ente letitsa tibe lite? Timphendvulo talemibuto naleminye lehlobene nayo tingatfolakala eBhayibhelini. Asesicoce ngaletinye tincenye letibalulekile tayo.

SECWAYISO SELUTSANDVO

3, 4. (a) Ngumuphi umyalo Nkulunkulu lawunika bo-Adamu na-Eva? (b) Kwakubaluleke kangakanani kulalela loyo myalo?

³ Nanobe bebanelitsemba lekuphila phakadze, bekunetintfo bo-Adamu na-Eva lobekufanele batente kute bachubeke baphila. Bekufanele baphefumule, banatse, balale futsi badle. Lokubaluleke kakhulu kutsi kuphila kwabo bekusime ebudlelwaneni babo neMniki Kuphila. (Dut. 8:3) Kwemukela sicondziso saNkulunkulu bekuyintfo lebalulekile kute bachubeke bajabulela kuphila. Jehova wakwenta kwacaca loku ku-Adamu ngisho nangaphambi kwekutsi kudalwe Eva. Njani? “Nkulunkulu Simakadze wamyala umuntfu watsi kuye: ‘Ungadla ngekutsandza kwakho tonkhe titselo letilapha ensimini; kodvwa ungasidli sitselo sesihlahla sekwati lokulungile nalokungakalungi, ngobe mhlazana usidla uyakufa nekufa.’”​—Gen. 2:16, 17.

⁴ ‘Sihlahla sekwati lokulungile nalokungakalungi’ besimelela lilungelo laNkulunkulu lekuncuma lokuhle nalokubi. Adamu abekwati kwehlukanisa lokuhle nalokubi; abedalwe ngemfanekiso waNkulunkulu futsi abenanembeza. Lesihlahla besitawukhumbuta bo-Adamu na-Eva kutsi bahlale basidzinga sicondziso saJehova. Kudla kwabo kulesihlahla bekutawusho kutsi bafuna kutibusa, lobekutawuletsa umphumela lomubi kubo nasesitukulwaneni sabo. Umyalo waNkulunkulu nesigwebo labebatasitfola nabangalaleli, kwakukhombisa ingoti yekutsatsa lendlela lengakalungi.

INDLELA KUFA LOKWANGENA NGAYO KUBANTFU

5. Yini leyabangela bo-Adamu na-Eva kutsi bangalaleli?

⁵ Ngemuva kwekudalwa kwa-Eva, Adamu wamtjela ngemyalo waNkulunkulu. Eva abewati kahle lomyalo, futsi emavi awo wakhona kuwaphindza njengobe anjalo. (Gen. 3:1-3) Loko wakwenta kulotsite lowativeta njengenyoka, sidalwa lesasinebucili. Lona lobekakhuluma esikhundleni salenyoka kwakunguSathane Develi, indvodzana yaNkulunkulu lengumoya leyaba nesifiso sekutibusa nesekubonakala inemandla. (Catsanisa naJakobe 1:14, 15.) Kute iphumelelise tento tayo letimbi, yamangalela Nkulunkulu ngekutsi ucala emanga. Yacinisekisa Eva kutsi kutibusa kutamenta afanane naNkulunkulu, futsi ngeke afe. (Gen. 3:4, 5) Eva wakukholelwa loko, wakhombisa kutsi sewuyatibusa ngekutsi asidle lesitselo futsi wancenga na-Adamu kutsi naye asidle. (Gen. 3:6, 17) Develi abecale emanga. (Fundza 1 Thimothi 2:14.) Adamu ‘walalela livi lemfati wakhe.’ Nanobe bekubonakala shengatsi lenyoka ingumngani, Sathane Develi abesitsa lesite umusa lebesiwati umphumela lobuhlungu waloko lesakutjela Eva.

6, 7. Nguyiphi indlela Jehova latehlulela ngayo letoni?

⁶ Ngetizatfu tabo tebugovu, bo-Adamu na-Eva bamvukela Loyo lowabanika kuphila nako konkhe lebebanako. Jehova abekwati kahle konkhe loko lebekwentekile. (1 Khr. 28:9; fundza Taga 15:3.) Wavumela laba labatsatfu lebebamvukele kutsi bakhombise indlela labebativa ngayo. Njengobe abenguYise wabo, akungabateki kutsi Jehova weva buhlungu kakhulu. (Catsanisa naGenesisi 6:6.) Kwadzingeka kutsi abe liJaji, futsi wabanika sigwebo labetsite batasitfola.

⁷ Nkulunkulu watsi ku-Adamu: “Mhlazana usidla [sitselo sesihlahla sekwati lokulungile nalokungakalungi] uyakufa nekufa.” Kungenteka kutsi Adamu abecabanga kutsi lelilanga belingema-awa langu-24. Ngemuva kwekwephula umyalo waNkulunkulu, abengacabanga kutsi Jehova utawutsatsa sinyatselo lingakashoni lelolanga. “Ekupholeni kwelilanga,” Jehova wakhuluma na-Adamu na-Eva. (Gen. 3:8) Njengobe aliJaji lelilungile, wacale walalela loko labebakusho. (Gen. 3:9-13) Ngemuva kwaloko wabanika sigwebo. (Gen. 3:14-19) Kube wababulala ngalesosikhatsi, injongo yakhe nga-Adamu na-Eva nesitukulwane sabo beyingaba lite. (Isa. 55:11) Nanobe asikhipha sigwebo sekufa nemiphumela yesono yacala kubonakala, wabavumela kutsi batale bantfwana labebangazuza kulamanye emalungiselelo labekatawenta. Ngako-ke, ngembono waNkulunkulu bo-Adamu na-Eva bafa ngalelilanga labona ngalo, futsi ecinisweni bafa lingakapheli “lilanga” leliyiminyaka lengu-1 000.​—2 Phet. 3:8.

8, 9. Situkulwane sa-Adamu satsintseka njani ngekona kwakhe? (Buka sitfombe lesisekucaleni kwalesihloko.)

⁸ Bantfwana ba-Adamu na-Eva bekungabatsikameta yini loko lobekwentiwe batali babo? Yebo. Roma 5:12 uyachaza: “Ngemuntfu munye sono sangena eveni, nekufa kwangena ngesono, ngenca yaloko kufa kwasakatekela kubo bonkhe bantfu ngobe bonkhe bonile.” Umuntfu wekucala lowafa ngu-Abela lowetsembekile. (Gen. 4:8) Ngako nalabanye esitukulwaneni sa-Adamu baguga futsi bafa. Nabo basitfola yini sono nekufa? Umphostoli Pawula uyaphendvula: “Ngekungalaleli kwemuntfu munye, bantfu labanyenti baba toni.” (Rom. 5:19) Sono nekufa lesakutfola ku-Adamu kwaba titsa letinkhulu tebantfu, futsi bantfu labanesono bayehluleka kutibalekela. Ngeke sikhone kuchaza konkhe lokwenteka ngesikhatsi Adamu endlulisela sono esitukulwaneni sakhe, kodvwa lesiciniseka ngako kutsi sono sendlulela kitsi.

⁹ Kunengcondvo kutsi liBhayibheli lichaza sono nekufa ‘njengesimbonyo lesisibekele tonkhe tive, nendvwangu lembonye tonkhe tive.’ (Isa. 25:7) Lesigwebo sekufa sibambe bonkhe bantfu. Liciniso likutsi “ku-Adamu bonkhe bayafa.” (1 Khor. 15:22) Umbuto lesivame kutibuta wona ufanana nalowo Pawula lawubuta lotsi: “Ngubani lotangikhulula kulomtimba lofako?” Ukhona yini vele?a​—Rom. 7:24.

SONO NEKUFA LOKWABANGELWA NGU-ADAMU KUTAWENTIWA LITE

10. (a) Ngumaphi lamanye emavesi eBhayibhelini lakhombisa kutsi Jehova utakwenta lite kufa lesakubangelwa ngu-Adamu? (b) Lamavesi embulani ngaJehova neNdvodzana yakhe?

¹⁰ Jehova abengamsindzisa Pawula. Ngemuva nje kwekukhuluma ‘ngesimbonyo,’ Isaya wabhala watsi: “Amite kufa phakadze naphakadze. Somandla longuSimakadze uyawukwesula tinyembeti kubo bonkhe buso.” (Isa. 25:8) Njengababe losusa intfo lehlupha bantfwana bakhe futsi abesule tinyembeti, Jehova ujabula kakhulu ngekutsi utawukwenta lite kufa lesakubangelwa ngu-Adamu. Kulomsebenti wakhe ukhona lomelekelelako. Incwadzi yekucala kubaseKhorinte 15:22 itsi: “Njengobe ku-Adamu bonkhe bayafa, nakuKhristu bonkhe batawutfola kuphila.” Ngendlela lefanako, ngemuva kwekutsi Pawula abute kutsi “Ngubani lotangikhulula?” wachubeka watsi: “Akabongwe Nkulunkulu ngaJesu Khristu iNkhosi yetfu!” (Rom. 7:25) Kuyacaca kutsi lutsandvo lolwabangela Jehova wadala bantfu aluzange luphele ngemuva kwekutsi bo-Adamu na-Eva bamvukele. Naloyo lowahlanganyela naJehova emsebentini wekudala bantfu bekucala, akazange aphelelwe lutsandvo lwakhe ngesitukulwane sa-Adamu. (Taga 8:30, 31) Kodvwa bantfu bebangasindziswa njani?

11. Yini Jehova layenta kute asite bantfu?

¹¹ Kuba nesono nekufa kwebantfu kungumphumela wesono lesentiwa ngu-Adamu nesehlulelo lesilungile lasinikwa nguJehova. (Rom. 5:12, 16) Naku lesikufundzako: “Ngesono sinye, bantfu bato tonkhe tinhlobo balahlwa ngelicala.” (Rom. 5:18) Yini Jehova labengayenta kute asite bantfu ngaphandle kwekungatinaki timiso takhe? Imphendvulo siyitfola emavini aJesu latsi: ‘INdvodzana yemuntfu yetela . . . kutewunikela ngemphefumulo wayo kutsi ube yinhlawulo yalabanyenti.’ (Mat. 20:28) Loyo loyindvodzana yekucala yaJehova lengumoya wakwenta kwacaca kutsi njengobe abetalwe emhlabeni angumuntfu lote sono, abetawuba yinhlawulo. Lenhlawulo beyitawubangela njani kutsi kube nekulunga?​—1 Thim. 2:5, 6.

12. Nguyiphi inhlawulo leyabangela kutsi kube nekulunga?

¹² Njengobe ayindvodza lete sono, Jesu abenelitsemba lelifanako nalelo Adamu labenalo ngaphambi kwekutsi one. Injongo yaJehova yayikutsi umhlaba ugcwaliswe situkulwane sa-Adamu lesite sono. Ngako Jesu wanikela ngekuphila kwakhe kwaba ngumhlatjelo ngobe abenelutsandvo lolujulile ngeYise wakhe nangesitukulwane sa-Adamu. Jesu wanikela ngekuphila kwakhe lokute sono futsi kwakulingana ncamashi naloko lobekulahlwe ngu-Adamu. Ngemuva kwaloko, Jehova wavusa iNdvodzana yakhe yaba sidalwa semoya. (1 Phet. 3:18) Jehova abengamukela umhlatjelo waJesu, indvodza lete sono, njengenhlawulo nobe linani lekutsenga situkulwane sa-Adamu futsi asinikete litsemba Adamu lalilahla. Ngandlela tsite, Jesu watsatsa sikhundla sa-Adamu. Pawula uyachaza: “Kubhaliwe kutsi: ‘Adamu, umuntfu wekucala, waba ngumphefumulo lophilako.’ Adamu wekugcina waba ngumoya lonika kuphila.”​—1 Khor. 15:45.

13. Yini “Adamu wekugcina” latayenta kute kuzuze labafile?

¹³ Sikhatsi sitawufika lapho “Adamu wekugcina” atawuba ‘ngumoya lonika kuphila’ kubantfu. Labanyenti esitukulwaneni sa-Adamu batawubuyiselwa ekuphileni njengobe bafile. Batawudzinga kuvuselwa ekuphileni kwasemhlabeni.​—Joh. 5:28, 29.

14. Nguliphi lilungiselelo laJehova lelitawucedza sono bantfu labasitfola ku-Adamu?

¹⁴ Bantfu batawukhululeka njani esonweni labasitfola njengelifa? Jehova wahlela kutsi kube neMbuso lowakhiwa ‘ngu-Adamu wekugcina’ kanye nalabo labatawubusa naye labakhetfwe emkhatsini webantfu. (Fundza Sembulo 5:9, 10.) Labo labatawubusa naJesu ezulwini batawube bati kutsi kunjani kuba nesono. Kubusa kwabo kweminyaka leyinkhulungwane kutawuba lusito kulabo labatawube basemhlabeni, kubasite balwisane nesono labangakhoni kusicedza.​—Semb. 20:6.

15, 16. (a) LiBhayibheli lisho kutsini nalikhuluma ‘ngesitsa sekugcina, lesikufa,’ futsi sitawentiwa nini lite? (b) Ngekusho kwa-1 Khorinte 15:28, yini Jesu latayenta ngekuhamba kwesikhatsi?

¹⁵ Ekupheleni kweminyaka leyinkhulungwane yekubusa kweMbuso, bantfu labalalelako batawube bakhululiwe kuto tonkhe titsa letabangelwa kungalaleli kwa-Adamu. LiBhayibheli litsi: “Njengobe ku-Adamu bonkhe bayafa, nakuKhristu bonkhe batawutfola kuphila, nguloyo naloyo ngekulandzelana kwabo: Kucale Khristu, kutsi ngesikhatsi sekuba khona kwakhe kulandzele labo lababakhe [labo labatawubusa naye]. Ngemuva kwaloko, kutawufika kuphela, lapho atawubuyisela khona uMbuso kuNkulunkulu wakhe longuYise futsi utawube asabente lite bonkhe bohulumende nawo onkhe emagunya kanye nemandla. Ngobe kufanele abuse njengenkhosi kuze kube ngulapho Nkulunkulu asatibeke ngephansi kwetinyawo takhe tonkhe titsa takhe. Njengesitsa sekugcina, kufa kutawukwentiwa lite.” (1 Khor. 15:22-26) Kufa lesakutfola ku-Adamu ekugcineni kutawucedvwa. “Simbonyo” lesimbonye wonkhe umndeni webantfu sitawube sesisuswe phakadze.​—Isa. 25:7, 8.

¹⁶ Umphostoli Pawula wephetsa lamavi akhe laphefumulelwe ngekutsi atsi: “Ngesikhatsi tonkhe tintfo setibekwe ngephansi kwayo, iNdvodzana nayo itawutibeka ngephansi kwaLoyo lowabeka tonkhe tintfo ngephansi kwayo, kute Nkulunkulu abe nguko konkhe kubo bonkhe.” (1 Khor. 15:28) Injongo yekubusa kweNdvodzana itawube seyifeziwe. Ngemuva kwaloko, ngekwenetiseka lokukhulu, itawubuyisela ligunya lekubusa kuJehova bese yetfula kuye umndeni webantfu labatawube bete sono.

17. Ekugcineni, yini Sathane latawentiwa yona?

¹⁷ Kutsiwani ngaSathane, loyo lowabangela wonkhe lomonakalo lofake bantfu enkingeni? Sembulo 20:7-15 siyawuphendvula lombuto. Ekuvivinyweni kwekugcina kwabo bonkhe bantfu labete sono, Sathane utawuniketwa litfuba lekwetama kubadukisa. Develi kanye nalabo lababalandzeli bakhe batawubhujiswa ngalokuphelele ngesikhatsi ‘sekufa kwesibili.’ (Semb. 21:8) Ngesizatfu sekutsi labo labafe kufa kwesibili ngeke baphindze babe khona, kufa kwesibili ngeke kwentiwe lite. Nobe kunjalo, “kufa kwesibili” akusiso sitsa kubantfu labatsandza uMdali futsi labamkhontako.

18. Utawufezwa njani umsebenti Nkulunkulu lawunika Adamu?

¹⁸ Bantfu labatawube bete sono batawemukeleka kuJehova futsi bakufanele kuphila lokuphakadze, bangaphindze babe nato titsa. Umsebenti lobewuniketwe Adamu utawube sewufeziwe ngaphandle kwakhe. Umhlaba utawugcwala bantfwana bakhe labatakujabulela kuwunakekela nekubona indalo leyehlukahlukene. Shengatsi singachubeka sikhombisa kubonga ngendlela yelutsandvo Jehova layisebentisako kute ente sitsa sekugcina, lesikufa, sibe lite!